S.E. PREZIDENTE TAUR MATAN RUAK IHA DIÁLOGU KOMUNITÁRIU HO KOMUNIDADE IHA SUKU MACADICI

by Media Team Posted on

Macadici, Uatulari, 7 Setembru, 2016 – S.E. Prezidente Repúblika, Taur Matan Ruak, kuarta-feira hala’o diálogu komunitáriu ba loron datoluk nian ho komunidade Suku Macadici, Postu Administrativu Uatulari, Munisípiu Viqueque.

Iha Suku refere, Xefe Estadu refere filafali klarifikasaun hirak ne’ebé maka nia hato’o ona sobre razaun vizita ba suku hirak iha Timor-Leste laran tomak, depois aproveita mós okaziaun hodi esplika ba komunidade sira sobre dezafius no progresu ne’ebé Timor-Leste hasoru iha prosesu harii nasaun. Aleinde ida-ne’e, Xefe Estadu mós motiva ka fó korajen ba komunidade sira sobre oinsá atu hadi’ak ekonomia uma-laran atraves atividade hirakne’ebé maka bele lori benefísiu ekonomia ba sira-nia an, husu atu investe ba sira-nia oan nia edukasaun, kuidadu sira-nia saúde, no ikusmai, husu komunidade sira atu fó kontribuisaun liuhosi serbisu hamutuk ho sira-nia autoridade lokál.

Aleinde ne’e Xefe Estadu konta mós esperiénsia Suku sira ne’ebé susesu ona iha jestaun hadi’a ekonomia, hodi halo hanesan referénsia atu suku sira seluk bele halo tuir ezemplu refere.
Iha abertura diálogu, Xefe Estadu rekoñese Macadici-oan nia sofrimentu iha tempu okupasaun nia, tanba ne’e Xefe Estadu aproveita diálogu refere hodi Estadu nia naran agradese ba kontribuisaun Macadici oan sira-nian iha prosesu luta ba libertasaun nasionál.

Nune’e iha sesaun husu, membru komunidade ida hatete, hanesan komunidade sira la kontente ho obrigadu de’it hosi Xefe Estadu.

 “Ohin S.E. husu obrigadu ba ami, tanba ami terus ba funu ida-ne’e, mas ami la kontente ho obrigadu tanba dezenvolvimentu iha suku ne’e la iha”, dehan membru komunidade ne’e.

Hatán ba ida-ne’e, Xefe Estadu dehan, dezenvolvimentu presiza lori tempu, tuir Xefe Estadu, nasaun ho tinan barak ne’ebé iha independénsia kleur ona mós la konsege rezolve problema hotu-hotu ba sira-nia sidadaun, satan maka Timor-Leste ne’ebé foin Ukun Rasik An tinan 14.

“Dezenvolvimentu lori tempu naruk, nasaun tinan 14 labele halo buat hotu-hotu, ne’ebé, ha’u husu ba inan-aman sira pasiénsia, sei la haluha imi Macadici, Uatulari. Ita-nia nasaun la halo balu ba anak emas no balu ba anak tiri. Dezenvolvimentu sei to’o imi, mas sei lori tempu. Ne’ebé husu ba imi atu labele lakon harapan”, Xefe Estadu dehan.

Membru komunidade ida mós husu ba Xefe Estadu atu buka took solusaun ruma ba Suku Macadici. Tanba, Suku Macadici iha aldeia barak ho populasaun mós barak ne’ebé dala ruma susar atu kontrola.
Hatán ba ida-ne’e, Xefe Estadu dehan, kestaun la’ós komunidade barak ka la barak. Maibé, importante maka fiar malu, iha konxiénsia no dixiplina, tanba halibur malu maka importante duke fahe malu.

Iha membru komunidade seluk ida ne’ebé maka hato’o nia preokupasaun sobre partidu barak ne’ebé mosu, no barak bele hamosu konflitu. Responde ba asuntu ne’e, Xefe Estadu subliña katak, partidu barak ne’e la’ós problema, tanba sei depende ba sidadaun sira-nia fihir no votu ba partidu ida ne’ebé akumula sidadaun sira-nia interese no hakarak. Hafoin klarifika mós katak, parte husi prosesu demokrasia maka iha partidu barak.

“Partidu barabarak ne’e la’ós problema, depende imi hili ida ne’ebé hadomi imi, hili maka sira, ida-ne’ebé sombong soe tiha. Povu nia lian ne’e Maromak nia lian, imi maka hatún no hasa’e ami lider sira ba Prezidente, ba Primeiru Ministru. Tanba ne’e, imi maka boot, ami ne’e mai para serbí imi, imi maka ami-nia liurai”, hatán Xefe Estadu.
Xefe Estadu mós sente kontente tanba Macadici-Uatulari iha ona mudansa mentalidade, komprende ona no akompaña ona evolusaun iha rai-laran, tanba ne’e la iha ona konflitu.

“Imi iha mudansa boot, hanesan imi nia-oan ha’u kontente, tanba ne’e
ha’u husu imi atu fiar malu nafatin, fiar imi-nia liurai, soe buat ne’ebé aat. Uluk imi iha ne’e fahe malu ba Makasae no Naueti, mais ohin imi hamutuk. Ha’u horibainhira mai, haree imi Makasae ho Naueti serbisu hamutuk buka restus mortais, ha’u hare ne’e tanis tanba imi bele muda ona imi-nia mentalidade. Ne’e sinál di’ak, ne’ebé ha’u fó parabens ba imi”,
tenik Xefe Estadu.

Hola parte iha diálogu komunitáriu refere maka, hanesan bainaka espesiál Xefe Estadu nian, hanesan, Administradór Postu Fatululik (Covalima), Xefe-Suku Lobunu no Leimea Leten(Atsabe-Ermera), Xefe-Suku Duyung (Metinaro-Dili), no Xefe-Suku Fatucalo (Turiscai-Manufahi).

Diálogu loron tuirmai iha Suku Uaitame, parte dadeer no lokraik kontinua ba Suku Afaloicai, Postu Administrativu Uatulari, Munisípiu Viqueque.