S.E. PREZIDENTE TAUR MATAN RUAK IHA DIÁLOGU KOMUNITÁRIU HO KOMUNIDADE IHA SUKU UAITAME NO AFALOICAI

by Media Team Posted on

Uatulari, 8 Setembru, 2016 – S.E. Prezidente Repúblika, Taur Matan Ruak, iha kinta-feira ne’e, hala’o diálogu komunitáriu ho komunidade sira ba loron haat iha Suku Uaitame iha parte dadeer no kontinua iha lokraik ho Suku Afaloicai iha Postu Administrativu Uatulari, Munisípiu Viqueque.

Iha suku rua refere, Xefe Estadu kontinua halo esplikasaun hirak sobre razaun hirak halo nia ba vizita suku hirak iha Timor-Leste laran tomak. Nia mós aproveita oportunidade ne’e hodi esplika ba komunidade sira sobre dezafius no progresu ne’ebé Timor-Leste realiza ona no hasoru iha prosesu harii nasaun oras ne’e. Hafoin, Xefe Estadu kontinua motiva ka fó korajen mós ba komunidade sira sobre oinsá atu hadi’ak ekonomia uma-laran liuhusi atividade hirak ne’ebé maka bele lori benefísiu ekonomia ba sira-nia an; husu mós atu investe iha sira-nia oan nia edukasaun, kuidadu sira-nia saúde, no ikusmai, husu atu komunidade sira kontinua fó kontribuisaun iha períodu independénsia nia hodi serbisu hamutuk ho sira-nia autoridade lokál.

Hakat ba iha sesaun husu no hatán, membru komunidade ida hato’o nia preokupasaun sobre unidade entre lideransa sira-nian. Tanba, sira preokupa tebes katak, wainhira lider la iha unidade bele prejudika armonia no prosesu dezenvolvimentu.

Hatán ba ida-ne’e, Xefe Estadu dehan:

“Ami la fahe malu, dala ruma hirus malu uitoan. Ita aprende ona lisaun iha 1975, ita fahe malu mosu konflitu. 2006 fahe malu, mosu krize ne’ebé agora la fahe malu.”

 Hafoin, membru komunidade ida mós aprezenta preokupasaun sobre konflitus entre membru F-FDTL ho PNTL ikuikus ne’e, tanba bele hamosu instabilidade nasionál.

Ba ida-ne’e, Xefe Estadu responde katak problema refere la’ós entre instituisaun, maibé ne’e problema entre elementus hosi instituisaun rua ne’ebé refere, tanba falta dixiplina no komportamentu ladi’ak. Tanba ne’e, Xefe Estadu husu ba komunidade sira atu tau nafatin konfiansa ba instituisaun rua refere. Tanba, Xefe Estadu husu ona atu buka rezolve problema iha instituisaun rua ne’e nia laran iha nia enkontru ho komandante Jerál F-FDTL no PNTL, no mós Ministru sira ne’ebé tutela ba instituisaun rua.

Hatán sobre problema hadau malu natar, hamosu sujestaun ba komunidade sira atu sira maka tenke rezolve duni atraves dalan rua: komunidade ho komunidade buka malu no rezolve ho ulun-malirin, pois ida seluk mak lori ba tribunál.

Entaun, Xefe Estadu husu atu kontinua ho esforsu tomak atu ko’alia nafatin ba malu, maibé fó hanoin mós ba komunidade sira katak, esforsu no prosesu hotu sei lori tempu, no Estadu sei halo esforsu hotu.

Hakat fali ba diálogu ho komunidade iha Suku Afaloicai, atraves sesaun husu no hatán, juventude ida foti kestaun sobre projetu hirak ne’ebé kompañia lokál sira kaer, maibé la iha kualidade hodi estraga de’it orsamentu Estadu nian. Hatán ba ida-ne’e, Xefe Estadu dehan, nia apresia krítika komunidade sira-nian, tanba ho maneira refere maka bele ajuda kontrola implementadores projetu sira atu hala’o serbisu ne’ebé di’ak no kualidade.

Xefe Estadu klarifika katak:

“Projetu la iha kualidade sim, tanba ne’e, iha ne’e ba oin sidadaun sira tenke kritika beibeik, ko’alia beibeik para sira labele dukur, para sira uza povu nia osan ho di’ak. Ita Timór kuandu halo tiha projetu laiha kualidade, mas la tama kadeia. Tanba, ita bobar tun-sa’e, sees an hosi justisa, mas iha nasaun sira avansadu hahalok hanesan ne’e ba para iha tribunál.”

Hola parte iha diálogu komunitáriu refere maka, hanesan bainaka espesiál Xefe Estadu nian, hanesan, Administradór Postu Fatululik (Covalima), Xefe-Suku Lobunu no Leimea Leten (Postu Administrativu Atsabe, Munisípiu Ermera), Xefe-Suku Duyung (Postu Administrativu Metinaro, Munisípiu Dili), no Xefe-Suku Fatucalo (Postu Administrativu Turiscai, Munisípiu Manufahi).