S.E. PREZIDENTE TAUR MATAN RUAK IHA DIÁLOGU KOMUNITÁRIU HO KOMUNIDADE IHA SUKU VESSORU NO UANI-UMA

by Media Team Posted on

Viqueque, 9 Setembru 2016 – S.E. Prezidente Repúblika, Taur Matan Ruak, iha sesta-feira hala’o diálogu komunitáriu ba loron neen ho komunidade sira iha Suku Vessoru, Postu Administrativu Uatulari iha parte dadeer, hafoin kontinua ho parte lokraik nian iha Suku Uani-Uma, Postu Administrativu Uatu-Carbau, Munisípiu Viqueque.

Iha suku rua refere, Xefe Estadu klarifika fila-fali esplikasaun hirak sobre razaun hirak halo nia ba vizita suku hirak iha Timor-Leste laran tomak. Nia mós aproveita oportunidade ne’e hodi esplika ba komunidade sira sobre dezafius no progresu ne’ebé Timor-Leste realiza ona no hasoru iha prosesu harii nasaun oras-ne’e. Hafoin, Xefe Estadu kontinua motiva ka fó korajen mós ba komunidade sira sobre oinsá atu hadi’ak ekonomia uma-laran, liuhusi atividade hirak-ne’ebé maka bele lori benefísiu ekonomia ba sira-nia an; husu mós atu investe iha sira-nia oan nia edukasaun, kuidadu sira-nia saúde, no ikusmai, husu atu komunidade sira kontinua fó kontribuisaun iha períodu independénsia nia hodi serbisu hamutuk ho sira-nia autoridade lokál.

Xefe Estadu mós konta istória sobre suku hirak ne’ebé maka hetan susesu iha hadi’ak jestaun ekonomia, nune’e husu atu suku sira seluk uza hanesan referénsia ka ezemplu.

Wainhira tama ba iha sesaun husu no hatán, estudante ida husu Xefe Estadu atu ajuda tau muru hale’u sira-nia eskola. Hatán ba ida-ne’e Xefe Estadu dehan, ida-ne’e susar uitoan atu implementa, tanba prioridade governu nian sei haree liubá nesesidade importante seluk. Depois, Xefe Estadu fó ezemplu sobre joven ida ne’ebé husu ba Embaixadór EUA atu ajuda halo muru hale’u sira-nia eskola, maibé embaixadór ne’e dehan, Amérika maski nasaun super poténsia iha mundu, maibé nia eskola sira didin ho ai, tanba sá maka Timor-Leste, ne’ebé nasaun kiik no kiak, mas hakarak eskola hotu tau muru? Xefe Estadu uza nia esplikasaun no kestaun refere atu fó hanoin ba diretór sira oinsá halo jestaun ne’ebé fasil no simples atu asegura eskola hirak, no la presiza buat ne’ebé todan no karun.

Membru komunidade ida mós halo kestaun sobre irrigasaun ne’ebé aat tinan haat resin ona no afeta no halo natar ektares 400 sai abandonadu. Hatán ba ida-ne’e, Xefe Estadu dehan, irrigasaun iha Timór laran tomak kuaze iha problema, ho razaun, tanba problema inundasaun, maibé Xefe Estadu espera katak, governu sei tau matan ba preokupasoins komunidade sira-nian.

Entretantu iha Suku Uani-Uma, eis veteranus ida husu Xefe Estadu atu halo ‘avaliasaun’ ba serbisu Komisaun Omenajen nian, tanba sira deskonfia mosu irregularidade, hanesan fasilita família hodi simu pensaun, ne’ebé ikusmai mosu veteranus falsu barabarak.

Hatán ba ida-ne’e Xefe Estadu klarifika no dehan:

“Ita iha dezorganizasaun uitoan depois funu hotu. Ita iha duni problemas, ita agora iha tahu laran, hasai ai ida, ain sorin tama fali. Ne’ebé, ha’u espera katak, iha tempu oinmai, ita bele hetan solusaun. Tanba ne’e, ha’u husu ba imi atu servisu hamutuk hanesan uluk, tanba uluk imi organizadu no imi maka hatene malu, sé maka halo boot, sé mak halo ki’ik.”

Xefe Estadu mós husu ba veteranus sira ne’ebé iha dadus sobre ema falsifika dokumentus hodi simu pensaun veteranus nian, keixa ba Komisaun Omenajen no Tribunál atu sira bele responsabiliza, karik sira komete duni, sei lakon estatutu hanesan veteranus. Xefe Estadu mós subliña liután atu muda lei sobre veteranus nian ne’ebé depende ‘boa vontade’ governu no Parlamentu Nasionál nian, Prezidente Repúblika só hakarak fó opiniaun.

Iha Suku rua refere, kestoins seluk hirak ne’ebé levanta maka hanesan, problema veteranus, irrigasaun aat, fatin turizmu abandonadu hirak, sujere hamoos lei pensaun vitalísia, loke sentru formasaun ba juventude sira, inklui problema reál seluk ne’ebé liga ba komunidade sira-nia moris.

Hola parte iha diálogu komunitáriu refere maka, hanesan bainaka espesiál Xefe Estadu nian, hanesan, Administradór Postu Fatululik (Covalima), Xefe-Suku Lobunu no Leimea Leten (Postu Administrativu Atsabe, Munisípiu Ermera), Xefe-Suku Duyung (Postu Administrativu Metinaro, Munisípiu Dili), no Xefe-Suku Fatucalo (Postu Administrativu Turiscai, Munisípiu Manufahi).

Diálogu tuirmai sei hala’o iha Suku Bahatata, Postu Administrativu Uatu-Carbau, Munisípiu Viqueque.