S.E. PREZIDENTE, TAUR MATAN RUAK, HALA’O DIÁLOGU KOMUNITÁRIU HO KOMUNIDADE IHA SUKU LIARUCA

by Media Team Posted on

Liaruca, Ossu, 14 Setembru 2016 – S.E. Prezidente Repúblika, Taur Matan Ruak, iha kuarta-feira hala’o diálogu komunitária ho komunidade sira Suku Liaruca, Postu Administrativu Ossu, Munisípiu Viqueque.

Iha suku refere, Xefe Estadu refere filafali klarifikasaun hirak-ne’ebé maka nia hato’o ona sobre razaun ba nia vizita ba suku hirak iha Timor-Leste laran tomak. Depois, Xefe Estadu mós aproveita okaziaun hodi esplika ba komunidade sira sobre dezafius no progresu ne’ebé Timor-Leste hasoru iha prosesu harii nasaun. Aleinde ida-ne’e, Xefe Estadu mós kontinua motiva, ka fó korajen ba komunidade sira sobre oinsá atu hadi’ak ekonomia uma laran atraves atividade hirak ne’ebé maka bele fó benefísiu ekonomia ba sira-nia an, husu atu investe ba sira-nia oan nia edukasaun, inklui hamenus lia-mate no lia-moris, kuidadu sira-nia saúde, no ikusmai, husu atu komunidade sira kontinua fó kontribuisaun atraves kooperasaun ho sira-nia autoridade lokál.

Xefe Estadu mós kontinua nia istória sobre esperiénsia iha suku hirak ne’ebé maka hetan ona susesu iha organiza an iha jestaun hadi’ak ekonomia, no halo sira-nia suku hirak sai hanesan ezemplu ba suku sira seluk.

Informa mós katak, molok hala’o diálogu komunitáriu ho komunidade Suku Liaruca, Xefe Estadu ba vizita uluk nia subar-fatin iha foho Borobaha iha suku refere, ne’ebé iha tempu rezisténsia entre tinan 1994 to’o 1997, atuál Xefe Estadu subar bá wainhira sei hanesan gerrilleiru hamutuk ho Lu-Olo no sira seluk.

Xefe Estadu mós hato’o iha nia intervensaun katak, Liaruca hanesan nia uma rasik, tanba durante funu ba libertasaun nasionál, nia subar-fatin ida mós maka iha suku refere. Nune’e, Xefe Estadu dehan:

“Ne’e ha’u-nia uma, ha’u uluk subar iha ne’e hamutuk ho imi. Mas, ohin, ha’u mai hanesan aman ba nasaun, inan-aman sira ne’ebé uluk subar ha’u, imi maka eroi ba nasaun. Imi la espera katak, ema ne’ebé imi subar ne’e iha loron ida sai imi-nia Prezidente da Repúblika. Tanba ne’e, hakarak agradese ho fuan boot ba inan-aman sira-nia sakrifísiu, subar ha’u ho ha’u-nia elementus iha tempu difisil nia laran.”

Wainhira tama ba iha sesaun husu no hatán, maioria husi komunidade sira, hato’o sira-nia preokupasaun sobre ligasaun estrada entre Suku Liaruca ho Postu Administrativu Ossu ne’ebé sei iha kondisaun aat, no halo difisil ba agrikultór sira atu fa’an sira-nia produtu agrikultór ba merkadu, inklui mós sira-nia preokupasaun sobre falta asesu ba eletrisidade durante 24 oras nia laran.

Hatán ba ida-ne’e, Xefe Estadu dehan:

“Tebes imi-nia estrada ladi’ak, ohin, ha’u mai haree rasik. Mas, la’ós imi-nian de’it maka aat, iha suku balun aat liu imi-nian, i ate balun estrada la iha. Mas, ha’u espera, imi-nian iha ne’e bele hadi’ak. Agora, kona-ba eletrisidade, hanesan ohin hahú, ha’u dehan katak, eletrisidade, ita iha avansu boot. Tanba, populasaun 90% maka hetan ona naroman eletrisidade, sei falta 10%, i ha’u espera imi-nian iha ne’e bele hetan, tanba imi iha estrada.”

Juventude ida mós, hato’o nia pedidu/husu ba Xefe Estadu atu kandidata an filafali ba Prezidente Repúblika iha períodu 2017-2022.

Hatán ba ida-ne’e, Xefe Estadu dehan, agradese ba apoiu refere, maibé Xefe Estadu lakohi ona kontinua ba períodu tuirmai. Nune’e Xefe Estadu hatán:

Obrigadu ba alin nia hanoin. Mas, ha’u lakohi ona, ha’u-nia mandatu dala ida-ne’e de’it. Ha’u husu obrigadu, tanba imi hili ona ha’u sai Prezidente Repúblika. Mas, ha’u sei serbisu hamutuk nafatin ho imi hadi’ak ita-nia nasaun, tanba ha’u mós terus ba nasaun ne’e.”

Entretantu, preokupasoins seluk ne’ebé komunidade sira aprezenta mós maka hanesan: husu altera Lei Pensaun Vitalísia; aumenta médiku (doutór) ba postu saúde; troka foos merenda eskolár ba foos lokál, tanba foos importasaun la iha kualidade; aldeia balun la asesu rede telekomunikasaun, inklui ho problema real seluk hirak ne’ebé maka iha ligasaun ba komunidade sira-nia moris.

Suku Liaruca, iha aldeia lima ho xefe família hamutuk 432, abitantes feto 962 no mane 1.030, total hamutuk 1.992.

Hola parte mós iha diálogu refere, bainaka Xefe Estadu nian hanesan, Xefe-Suku Ritabou husi Munisípiu Bobonaro no Xefe-Suku Fahisoi husi Munisípiu Aileu.