S.E. PREZIDENTE TAUR MATAN RUAK IHA DIÁLOGU KOMUNITÁRIU HO KOMUNIDADE IHA SUKU WAIMORI

by Media Team Posted on

Liaruca-Ossu, 14 Setembru 2016 – S.E. Prezidente Repúblika, Taur Matan Ruak, iha kuarta-feira hala’o diálogu komunitária ho komunidade sira Suku Waimori, Postu Administrativu Ossu, Munisípiu Viqueque.

Iha suku refere, Xefe Estadu refere filafali klarifikasaun hirak ne’ebé maka nia hato’o ona sobre razaun ba nia vizita ba suku hirak iha Timor-Leste laran tomak. Depois, Xefe Estadu mós aproveita okaziaun hodi esplika ba komunidade sira sobre dezafius no progresu ne’ebé Timor-Leste hasoru iha prosesu harii nasaun. Aleinde ida-ne’e, Xefe Estadu mós la haluha atu kontinua fó motivasaun, ka fó korajen ba komunidade sira sobre oinsá atu hadi’ak ekonomia uma-laran atraves atividade hirak ne’ebé maka bele fó benefísiu ekonomia ba sira-nia an, husu atu investe iha sira-nia oan nia edukasaun, kuidadu sira-nia saúde, no ikusmai, husu komunidade sira atu fó kontribuisaun liuhosi kooperasaun ho sira-nia autoridade lokál.

Xefe Estadu mós kontinua nia istória sobre esperiénsia iha suku hirak ne’ebé maka hetan ona susesu iha organiza an iha jestaun hadi’ak ekonomia, no halo sira-nia suku hirak sai hanesan ezemplu ba suku sira seluk.

Iha nia intervensaun ba komunidade Suku Waimori nian, Xefe Estadu dehan:

“Waimori uluk ema la iha, ami maka iha ne’e la’o ba la’o mai, mas ohin imi iha ne’e barak, ne’e hatudu saida? Ne’e hatudu mudansa, Timór ukun an dala ida. Tanba ne’e, Ita-Boot sira maka eroi, tanba lori imi ami moris, lori imi nasaun moris, obrigadu tebes, imi-nia sofrimentu ami labele selu, nasaun mós labele selu.”

Hafoin, Xefe Estadu hatutan liután:

“Ukun-an la’ós tujuan ikus, mas ukun-an hanesan ponte atu ita hakat ba buka moris-di’ak. Ita terus para atu hetan moris-di’ak, kerdizer, iha uma di’ak, han loron ida dala tolu, sasán folin iha, oan sira matenek, estrada di’ak, bee mós iha, eletrisidade lakan iha uma-uma, maibé ne’e lori tempu. Ita serbisu hamutuk, Prezidente mesak labele, governu mesak labele, imi sidadaun mesak mós labele, ita hamutuk maka bele, ne’e istória maka hatete katak, ema ida mesak labele, so hamutuk.”  

 Wainhira hakat fali ba iha sesaun husu no hatán, iha membru komunidade feto ida ne’ebé husu ba Xefe Estadu, atu halo uma ba faluk no família kbiit-laek sira, tanba sira la iha kbiit atu harii uma mesak.

Hatán ba ida-ne’e, Xefe Estadu dehan, harii uma ba família kiak no feto faluk sira-ne’e, obrigasaun governu nian atu tau matan ba sidadaun sira. Maibé, governu hasoru problema, tanba, uma MDG hirak ne’ebé governu halo ona iha munisípiu, barak liu maka komunidade sira la utiliza, no barak mós la iha kondisaun atu ema hela. Tuir Xefe Estadu governu halo uma MDG fó han de’it ba kompañia.

Xefe Estadu halo klarifikasaun hodi hatán katak:

“Ita-nia governu, uluk iha programa bolu uma lima ba aldeia ida, mas ikusmai iha alterasaun ba fali uma MDG, maibé, uma ida-ne’e kualidade ladi’ak. Balun uza, mas barak soe hela ona, entaun governu para tiha. La’ós la halo ona, sei halo, mas sei haree didi’ak lai. La’ós gasta osan de’it para populasaun la uza. Iha fatifatin, uitoan de’it maka ema hela, ate balu la kompletu agora maka sira atu hadi’a. Tanba ne’e, ita iha problema ba uma MDG, mas ita hein, karik sira iha programa foun. Tanba ne’e devér governu nian atu tau matan ba sidadaun liuliu ba kbiit-laek sira.”

Komunidade sira mós husu ba Xefe Estadu atu halo monumentu Sebastião Gomes nian iha Suku Waimori, nu’udar onra ba nia luta. Tanba, matebian mós hanesan Waimori oan.

Hatán ba kestaun ida-ne’e, Xefe Estadu dehan, bele halo, maibé presiza tempu. Tanba, oras ne’e daudaun, Estadu sei iha nesesidade barak ne’ebé maka tenke tau matan uluk. Nune’e, ba oras ne’e, Estadu seidauk bele halo.

Preokupasaun seluk hirak ne’ebé komunidade sira aprezenta maka hanesan, fó ajuda painél solár, la iha rede telekomunikasaun ba TT, Telemor no Telekomcel, ajuda eskpator atu dudu bee ba kanu hasan, dada eletrisidade no problema reál seluseluk hirak tan.

Suku Waimori iha aldeia 5 ne’ebé kompostu husi total uma-kain 519, ho totál ema na’in-2.000. Suku ne’e, iha tinan 1999, sai hanesan fatin konsentrasaun ikus ba FALINTIL sira antes tama ba referendum iha loron 30 Agostu 1999.

To’o oras ne’e, Suku Waimori, seidauk hetan asesu ba eletrisidade 24 oras, depois, mezmu iha estrada ba suku ne’e, maibé ho kondisaun aat.

Partisipa mós iha diálogu refere, bainaka Xefe Estadu nian hanesan, Xefe-Suku Ritabou husi Munisípiu Bobonaro no Xefe-Suku Fahisoi husi Munisípiu Aileu.