LIAFUAN BADAK HOSI S.E. PREZIDENTE TAUR MATAN RUAK IHA OKAZIAUN KONDEKORASAUN HOSI S.E. JOAQUIM CHISSANO EIS-PREZIDENTE REPÚBLIKA MOSAMBIKE HO GRANDE COLAR DA ORDEM DE TIMOR-LESTE

by Media Team Posted on

Dili, 10 Outubru, 2016

Distintus konvidadus, Exelénsia sira,

Ha’u-nia maun doben Prezidente Joaquim Chissano:

Onra boot ida mai ha’u bele simu Exelénsia iha Timor-Leste. Lori Povu Timor-Leste nia naran no ha’u-nia naran rasik, ha’u hakarak hato’o ami-nia rekoñesimentu ba Sua Exelénsia ne’ebé hamriik tuba rai metin hodi fó apoiu ba luta povu no Rezisténsia Timoroan nian ba liberdade no Independénsia.

Akollimentu fraternál, governu no povu Mosambike nia apoiu, inklui mós inisiativa solidariedade oioin ne’ebé hatudu hosi Repúblika Mosambike ba luta povu Timór nian, ba dignidade no direitu ba autodeterminasaun no independénsia, hanesan kapítulu eroiku no úniku iha istória solidariedade no fraternidade mundu nian hosi sékulu XX (20). Solidariedade no fraternidade hirak-ne’e iha ita-nia povu nia fuan, ohin no ba nafatin.

Sua Exelénsia señór Prezidente Joaquim Chissano, no eroi no saudozu Prezidente Samora Machel, ne’ebé Maromak bolu sedu liu, imi-ne’e mak iha nivel hotu-hotu haburas no dudu ba oin solidariedade metin hirak-ne’e, ne’ebé durante tinan 24 harii entre povu Mosambike no povu Timór. Solidariedade ne’e fó kontribuisaun importante tebes ba vitória hosi ita-nia povu nia aspirasaun no mós ba liberdade nasaun ida-ne’e nian.

Sua Exelénsia sempre hatudu hahalok di’ak mai ami iha momentu ne’ebé presiza, hodi fó apoiu ba Rezisténsia Timoroan no eziladu timoroan sira iha Mosambike, no mós ba iha nivel diplomátiku ne’ebé iha momentu ne’ebá hasoru luta barak.

Diplomasia Rezisténsia nian hetan priviléjiu atu benefisia hosi inisiativa diplomátika hirak ne’ebé mai hosi Repúblika Mosambike no nasaun maun-alin sira seluk ne’ebé ko’alia lia-portugés, no mós hosi Ita-Boot nia esperiénsia kle’an no kualidade di’ak hirak nu’udar diplomata no estadista ne’ebé respeitadu iha mundu tomak.

Solidariedade ne’ebé Frelimo no povu no governu Mosambike nian kaer metin ba ita-nia luta ba libertasaun nasionál, halo konvivénsia no kontaktu antigu entre ita-nia povu sira nakfila ba amizade metin ida hanesan maun-alin ne’ebé bele tahan ba tempu naruk.

Exelénsia, ha’u-nia maun doben Prezidente Chissano

Hafoin hala’o tiha responsabilidade aas ne’ebé povu Mosambike husu ba Sua Exelénsia atu sai hanesan xefe Estadu, Uniaun Afrikana ho mundu hetan priviléjiu atu benefisia hosi Ita-Boot nia kualidade nu’udar matenek-na’in kona-ba diplomasia no ema Estadu nian, hodi fó fiar ba Ita-Boot atu kaer misaun diálogu no mediasaun konflitu hirak ne’ebé sensitivu tebes.

Ha’u hakarak temi misaun rua de’it: Prosesu estabilizasaun ne’ebé naruk no kompleksu iha Repúblika Madagaskar no mós konflitu iha Sahara Osidentál ne’ebé halo Timor-Leste sente solidáriu tanba atu hanesan tebes ho ita-nia Kauza no mós tanba kazu ne’e nia natureza koloniál. Ita hotu hatene nia istória nu’udar kombatente hasoru forma opresaun hotu-hotu. Horiuluk kedas, nia envolve an iha luta ba libertasaun Mosambike nian nu’udar nasaun maun-alin. Ami fiar katak Ita-Boot sei dedika Ita-Boot nia enerjia no matenek hodi buka solusaun ida ke justu, pasífiku no bele tahan ba tempu naruk ba konflitu iha Sahara Osidentál.

Serbisu ne’ebé Sua Exelénsia halo nu’udar diplomata no estadista ne’ebé respeitadu iha mundu tomak, hodi promove diálogu, pás no konsiliasaun, hanesan liman-rohan furak tebes ida no ezemplu di’ak ida iha mundu ida ne’ebé relasaun internasionál sira dala barak hali’is ba tensaun no violénsia.

Nune’e maka ho onra no satisfasaun boot tebes maka ha’u simu Sua Exelénsia iha ha’u-nia rain hodi entrega Grande Colar da Ordem de Timor-Leste nu’udar símbolu ba servisu ne’ebé Ita-Boot halo ba Timoroan sira ho Umanidade, no mós ba povu no Estadu Timor-Leste nia admirasaun no konsiderasaun tomak.

Husu boot ba Maromak atu proteje Ita-Boot, Señór Prezidente, no fó-bensa mai ita hotu.