KOMUNIKADU BA MEDIA: S.E. PREZIDENTE REPÚBLIKA, TAUR MATAN RUAK, HATO’O SENTIDU KONDOLÉNSIA BA LIURAI TAILÁNDIA NIA-MATE

by Media Team Posted on

Dili, 14 Outubru 2016 – S.E. Prezidente Repúblika, Taur Matan Ruak, iha esta-feira, ohin hato’o nia sentidu kondolénsias ba Liurai Reinu Tailándia, Sua Majestade Bhumibol Adulyadej, ne’ebé mate iha Bangkok, Tailándia, iha kinta-feira, 13 Outubru.

Bazeia ba informasaun ne’ebé hetan husi fontes balun katak, matebian Liurai Bhumibol Adulyadej iha kondisaun saúde ne’ebé maka ladún di’ak iha tinan hirak ikus ne’e nia laran, no ladún marka prezensa iha públiku.

Haktuir fali ba ansiedade husi públiku, palásiu ikus mai anúnsiu, no informa sobre liurai nia mate iha kinta-feira kalan iha Ospitál Siriraj, iha Bangkok, Tailándia.

Haktuir fali ba notísia ne’e, Sua Exelénsia Prezidente Repúblika, Taur Matan Ruak, hodi Estadu no Povu Timor-Leste nia naran, hato’o sentidu kondolénsias ho liafuan hirak tuirmai:

“Ha’u sente triste wainhira rona notísia kona-ba Sua Majestade nia mate. Sua Majestade hanesan lider estadista ne’ebé povu tailandés sira respeita no admira tebes. Iha nia lideransa, Sua Majestade sempre hakbesik an ba nia povu, kaer valores dame, unidade no bem-estar ba interese povu Tailándia nian.

 Nune’e, ha’u hakarak aproveita momentu susar ida-ne’, hodi Estadu no Povu Timor-Leste nia naran, no mós ha’u-nia naran rasik hato’o profunda sentidu kondolénsias ba Sua Majestadu nia mate. Sua Majestade nia mate, la’ós de’it ba povu Tailándia maka sente lakon, maibé mundu mós lakon lideransa di’ak ida.”

Palásiu Prezidente Nicolau Lobato, 14 Outubru 2016.