S.E. PREZIDENTE REPÚBLIKA, TAUR MATAN RUAK, HALA’O DIÁLOGU KOMUNITÁRIU HO KOMUNIDADE IHA SUKU TIBAR NO FAHILEBO

by Media Team Posted on

Bazartete, 17 Outubru 2016 – S.E. Prezidente Repúblika, Taur Matan Ruak, iha segunda-feira ne’e kontinua filafali programa diálogu komunitáriu ho komunidade sira, ne’ebé maka programadu ona, hahú ho Suku Tibar iha parte dadeer no kontinua ho Suku Fahilebo iha parte lokraik. Suku rua ne’e pertense ba Postu Administrativu Bazartete, Munisípiu Liquiçá.

Iha suku rua refere, Xefe Estadu refere filafali klarifikasaun hirak ne’ebé maka nia hato’o ona iha suku seluk hirak sobre razaun atu bá suku hirak iha Timor-Leste laran tomak. Hafoin, Xefe Estadu aproveita mós okaziaun hodi subliña sobre dezafius no progresu hirak ne’ebé Timor-Leste hasoru no atinje wainhira harii nasaun. Maibé, Xefe Estadu mós fó motivasaun ba komunidade sira sobre oinsá atu hadi’ak sira-nia ekonomia uma-laran atraves atividade hirak ne’ebé maka bele lori benefísiu ekonomia ba sira, apelu ba sira mós atu investe ba sira-nia oan nia edukasaun, husu mós ba komunidade sira atu kuidadu sira-nia saúde, depois ikusmai, halo mós apelu ba komunidade sira atu kontinua kontribui ba dezenvolvimentu hodi serbisu hamutuk ho sira-nia autoridade lokál.

Xefe Estadu mós la haluha atu refere ba suku balun ne’ebé maka susesu ona iha organizasaun no jestaun suku nian, atu komunidade iha suku rua ne’e bele uza hanesan referénsia atu motiva sira-nia an atu bele banati tuir.

Diálogu iha Suku Tibar, Xefe Estadu aproveita okaziaun apela ba komunidade sira atu mantein pás no hakmatek nune’e bele kontribui ba estabilidade nasaun nian, liuliu iha tempu eleisaun nian ne’ebé besik ona, hanesan eleisaun ba lideransa komunitáriu iha 29 Outubru fulan ne’e, no eleisaun Prezidensiál no Parlamentár iha tinan oin.

Xefe Estadu hatete:

“Iha fulan ida-ne’e ita sei iha eleisaun Suku, ita husu ba Maromak atu ita-nia rain kontinua hakmatek, tan tinan oin mós iha ita sei iha eleisaun prezidensiál no parlamentár. Pás ita kompara karik hanesan ai-funan oan ne’ebé foin família sira kuda. Kerdizer ita-nia estabilidade no pás sei nurak, ne’ebé presiza Timoroan hotu nia kontribuisaun. Tanba ne’e ha’u fiar povu iha Timór laran tomak hakarak moris hakmatek, Timoroan hotu fó kontribuisaun ba estabilidade no pás. Ita-nia rain metin ona maibé sei nurak, tanba ne’e ita hotu presiza kuidadu atu labele monu.”

Hakat fali ba Suku Fahilebo, liuhosi sesaun husu, membru komunidade ida husu ba Xefe Estadu atu sujere ba governu hodi sosa kafé agrikultór sira-nian, tanba wainhira kompañia de’it maka sosa, kompañia sira fó folin ne’ebé mínimu tebes ba komunidade kafé-na’in sira.

Hatán ba ida-ne’e, Xefe Estadu hatete, Governu seidauk iha polítika sosa kafé komunidade sira-nian, hanesan slogan ne’ebé governu hasai ona “Povu Kuda Governu Sosa”. Tanba programa ne’e foin kobre de’it ba sosa hare no koto, maibé ladauk ba produtu seluk. Xefe Estadu mós husu ba komunidade sira iha biban ida-ne’e atu labele dezanima, maibé husu atu tau matan nafatin ba sira-nia kafé, haluan plantasaun kafé nian, husu atu labele oho animal laku, tanba kafé laku-teen maka folin di’ak liu kafé baibain.

Preokupasaun seluk hirak ne’ebé komunidade suku rua hato’o ba Xefe Estadu mak hanesan, husu atu normaliza mota Tibar nian, selae iha tempu udan mota sempre estraga komunidade nia uma, problema edukasaun, hanesan sala lato’o, problema hadau malu rai, falta bee moos, seidauk iha kanalizasaun ba bee moos, fatin rai fini la iha, Ministériu Agrikultura ladún tau atensaun ba reabilitasaun kafé ne’ebé tuan ona, no mós problema reál seluk tan.

Hola parte iha diálogu komunitáriu refere maka hanesan, bainaka sira ne’ebé Xefe Estadu konvida, Defensór Públiku Jerál, Sérgio Hornai, Diretór Nasionál SEFOPE, Administradór Munisípiu Maubisse, Xefe-Suku Mau-Nuno/Ainaro no Xefe-Suku Wagia/Ossu-Viqueque.