S.E. PREZIDENTE REPÚBLIKA, TAUR MATAN RUAK, HALA’O DIÁLOGU HO KOMUNIDADE SIRA IHA SUKU LEOREMA

by Media Team Posted on

Leorema-Bazartete, 18 Outubru 2016 – S.E. Prezidente Repúblika, Taur Matan Ruak, iha tersa-feira hala’o diálogu komunitáriu ho komunidade sira Suku Leorema iha Postu Administrativu Bazartete, Munisípiu Liquiça.

Iha suku refere, Xefe Estadu refere filafali klarifikasaun hirak-ne’ebé maka nia hato’o ona sobre razaun vizita ba suku hirak iha Timor-Leste laran tomak, depois aproveita mós okaziaun hodi esplika ba komunidade sira sobre dezafius no progresu ne’ebé Timor-Leste hasoru iha prosesu harii nasaun. Hafoin ida-ne’e, Xefe Estadu kontinua fó motivasaun, ka fó korajen ba komunidade sira sobre oinsá atu hadi’ak ekonomia uma-laran, liuhusi atividade hirak ne’ebé maka bele lori benefísiu ekonomia ba sira; husu atu investe ba sira-nia oan nia edukasaun; kuidadu sira-nia saúde; no ikusmai, husu komunidade sira atu kontinua kontribui ba prosesu dezenvolvimentu atraves sira-nia prontidaun atu serbisu hamutuk ho sira-nia autoridade lokál.

Xefe Estadu mós la haluha atu fó ezemplu no referénsia, inklui fó motivasaun ba komunidade iha suku rua refere atu halo tuir suku balun ne’ebé maka susesu ona atu organiza no jere sira-nia suku rasik.

Iha Suku Leorema, ne’ebé hanesan rai moris-fatin eroi boot Prezidente Repúblika Nicolau Lobato nian, Xefe Estadu hahú nia mensajen hodi dehan, Suku Leorema naran-boot iha Timor-Leste, suku ne’ebé hamoris sentimentu nasionalizmu molok da’et ba fatin seluk iha Timor-Leste. Suku ne’e oferese nia oan mane ida ne’ebé barani tebes tiru malu ho Indonézia to’o mate iha batalla, tanba lakohi nasaun seluk mai sama Povu Timor-Leste nia dignidade.

Nune’e, Xefe Estadu dehan:

“Suku Leorema naran-boot iha Timor-Leste, hosi Suku ne’e mak hamoris nasionalizmu hodi buras ba fatin seluk, hosi suku ne’e maka imi oferese oan-mane ida ne’ebé barani tebetebes, ita-nia maun, ita-nia eroi boot, ita-nia mestre, ita-nia Prezidente Nicolau Lobato ne’ebé tiru malu ho Forsa Indonézia to’o mate iha fatin. Tanba nia, hakarak defende Timoroan sira-nia dignidade, nia mate la saugati, nia husik hela nasaun ida ba ita, ne’ebé ohin loron ita goza.”

Xefe Estadu mós hato’o nia apresiasaun ba serbisu Sr. Luis Lobato, eis Vise Ministru Saúde iha Primeiru Governu nian, ne’ebé iha inisiativa loke atividade kuda ai-funan iha Suku Leorema hodi ajuda fó serbisu ba komunidade lokál sira.

Xefe Estadu mós iha oportunidade ne’e dezafia komunidade sira, liuliu joven sira atu esforsu an tempu tomak ba estuda hodi bele hamosu tan Nicolau Lobato 100 iha Suku Leorema.

Entretantu iha sesaun husu no hatán, juventude ida foti kestaun ba Xefe Estadu sobre grupu balun ne’ebé soe isu iha komunidade nia leet katak, Prezidente Nicolau Lobato sei moris no dehan governu ida agora ne’e seidauk definitivu.

Hatán ba ida-ne’e, Xefe Estadu dehan informasaun refere hanesan propaganda falsu ne’ebé ema ka grupu la iha responsabilidade sira soe atu dezestabiliza situasaun. Tuir Xefe Estadu katak, Nicolau Lobato mate duni iha kombate, no wainhira nia mate ema soe nia panfletu iha Timor laran tomak, no daudaun ne’e Estadu halo esforsu hela atu koopera ho Governu Indonézia atu haree oinsá para hetan filafali Nicolau Lobato nia ruin hodi lori fila mai Timor-Leste no haloot ho dignu. Tanba ne’e, Xefe Estadu aproveita biban ne’e hodi apela ba komunidade sira, atu wainhira hetan ema ruma ka grupu ruma ne’ebé soe propaganda falsu, tenke informa PNTL atu bele hodi halo atuasaun ba sira.
Entretantu preokupasoins komunidade sira-nian, kona-ba aldeia haat ne’ebé seidauk hetan asesu ba bee moos, Aldeia ida seidauk asesu ba eletrisidade, estrada ba suku refere aat, Xefe Estadu fó oportunidade ba diretores relevantes ne’ebé mós partisipa iha vizita refere atu hatán ba komunidade sira-nia preokupasoins ne’ebé hato’o.

Hola parte iha diálogu komunitária refere mak hanesan, bainaka espesiál sira ne’ebé Xefe Estadu konvida, Prezidente Defensór Públiku, Sergio Hornai, Diretór Nasionál SEPFOPE, Administradór Postu Administrativu Maubisse, Xefe-Suku Mau-Nuno, Munisípiu Ainaro, no Xefe-Suku Wagia, Postu Administrativu Ossu, Munisípiu Viqueque.