KOMUNIKADU BA IMPRENSA: S.E. PREZIDENTE, TAUR MATAN RUAK OHIN DEZLOKA BA BRAZIL ATU INTREGA PREZIDÉNSIA ROTATIVA CPLP NIAN

by Media Team Posted on

Dili, 27 Outubru 2016 – S.E. Prezidente Repúblika, Taur Matan Ruak, Kinta feira ohin dezloka ba Brazil atu entrega Prezidénsia Rotativa Komunidades País  sira Ko’alia Lian Portugés (CPLP) ba Brazíl, hafoin Timor-Leste asume durante tinan 2 nia laran husi 2014-2016.

Xefe Estadu Timor-Leste sei entrega formalmente Prezidénsia rotativa CPLP nian ba Brazil atraves Simeira Xefe Estadu no Xefe Governu País CPLP nian ba dala XI ne’ebé sei hala’o iha Brazília, Kapitál Brazíl, iha loron 31 fulan-Outubru 2016, tuir zona tempu Brazíl nian, ka loron 1 fulan-Novembru tuir zona tempu Timor-Leste nian.

Haktuir filafali ba prosedimentu ne’ebé maka iha, tuir loloos Timor-Leste entrega ona Prezidénsia CPLP ba Brazíl iha fulan-Jullu liubá, maibé adianta to’o fulan-Outubru tinan ne’e tanba situasaun polítika iha Brazíl.

Entretantu iha époka simeira Xefe Estadu no Xefe Governu ba dala XI nian ne’e, Xefe Estadu Timor-Leste sei enkontru kortezia mós ho Xefe Estadu no Xefe Governu hosi nasaun membru CPLP nian sira.

 Kondekorasaun Grande Colar Ordem de Timor-Leste ba Eis Prezidente Repúblika Portugál, Jorge Sampaio ho Mário Soares

Informa mós katak, antes kontinua ba Brazíl, Xefe Estadu sei hakat liu uluk ba Portugál hodi aproveita kondekora eis Prezidente Repúblika na’in-rua, Jorge Sampaio ho Mário Soares, inklui mós entidade portugés na’in-rua, Amerikanu na’in-ida no Timoroan iha diaspora na’in-hitu, ne’ebé iha tempu okupasaun fó apoiu maka’as ba luta autodeterminasaun Timor-Leste nian.

Naran hirak refere maka lista kompletu nu’udar refere iha kraik atu simu kondekorasaun hosi Xefe Estadu:

 Kondekorasaun Grande Colar Ordem de Timor-Leste

  1. Jorge Sampaio eis Prezidente Repúblika Portugál (1996-2006)
  2. Mário Soares eis Prezidente Repúblika Portugál (1986-1996 no eis Primeiru Ministru (1976-1978, 1983-1986)
  • Medalla Ordem de Timor-Leste
  1. Major Jenerál Arnaldo José Ribeiro da Cruz, Portugés.
  2. Arnold S. Khoen, Americana
  3. Carlos Eduardo de Medeiros Gaspar, Portugés
  • Insígnia Ordem de Timor-Leste
  1. Carlos Henriques de Araújo Pereira Jerónimo (Títulu Póstumu), Timoroan diaspora.
  2. Prisca Lopes de Carvalho (Títulu Póstumu), Timoroan diaspora.
  3. Hélder Alberto Neves, (Títulu Póstumu), Timoroan diaspora.
  4. Eugénio da Silva, (Títulu Póstumu), Timoroan diaspora.
  5. Maurício Pereira, (Títulu Póstumu), Timoroan diaspora.
  6. Francisco Pinto Boavida, (Títulu Póstumu), Timoroan diaspora.
  7. Inocência Filomena Ximenes Neves, Timoroan diaspora.

Tuir planu ne’ebé maka iha, Xefe Estadu ho komitiva tomak sei fila mai Timor-Leste iha loron 8 fulan-Novembru 2016.