S.E. PREZIDENTE REPÚBLIKA, TAUR MATAN RUAK, IHA DIÁLOGU KOMUNITÁRIU HO KOMUNIDADE IHA SUKU LUCULAI NO DARULETE

by Media Team Posted on 11 views

Liquiçá Villa, 20 Outubru 2016 – S.E. Prezidente Repúblika, Taur Matan Ruak, iha kinta-feira hala’o diálogu komunitáriu ho komunidade sira hosi Suku Luculai iha parte dadeer nian no kontinua iha parte lokraik iha Suku Darulete, ne’ebé mós hola parte ba Postu Administrativu Liquiçá, Munisípiu Liquiçá.

Iha suku rua refere, Xefe Estadu refere filafali klarifikasaun hirak-ne’ebé maka nia hato’o ona sobre razaun vizita ba suku hirak iha Timor-Leste laran tomak, depois aproveita mós okaziaun hodi esplika ba komunidade sira sobre dezafius no progresu ne’ebé Timor-Leste hasoru no realiza ona iha prosesu harii nasaun. Aleinde ida-ne’e, Xefe Estadu mós motiva ka fó korajen ba komunidade sira sobre oinsá atu hadi’ak ekonomia uma-laran atraves atividade hirak-ne’ebé maka bele lori benefísiu ekonomia ba sira; husu atu investe ba sira-nia oan nia edukasaun, kuidadu sira-nia saúde, no ikusmai, Xefe Estadu mós husu komunidade sira atu kontinua fó nafatin sira-nia kontribuisaun hodi koopera ho sira-nia autoridade lokál.

Xefe Estadu mós kontinua fahe nia observasaun sobre suku balun ne’ebé maka susesu ona halo organizasaun no jestaun ba sira-nia suku rasik, no husu atu esperiénsia hirak-ne’e bele sai ezemplu no referénsia ba komunidade suku Luculai no Darulete atu banati tuir.

Iha Suku Luculai, veteranu ida, Sr. Mario Gomez, iha sesaun husu no hatán, preokupa ho lei pensaun vitalísia, tanba konsidera habokur de’it elite balun iha nasaun ne’e wainhira ema ne’ebé luta durante tinan 24 la hetan buat ida hosi Estadu.

 Entaun, Sr. Mario Gomez husu hodi hatete:

“Kuandu lei ida-ne’e la halakon, ami veteranus sei hamriik halo asaun hodi husu ba Estadu kona-ba ami-nia direitu tinan 24. Ami la’ós kontra Governu. Maibé, ami hamriik atu husu tanba sá maka diskrimina veteranus, ema sira ne’ebé serbisu tinan lima de’it hetan pensaun, oinsá ho ami ne’ebé luta iha ai-laran tinan barak. Pensaun vitalísia ne’e hamate povu ki’ik no hariku de’it grupu ida.”

Hatán ba preokupasaun ne’e, Prezidente Repúblika Taur Matan Ruak hatete povu iha Timór laran tomak kontra lei ida-ne’e, maibé fila fali ba boa vontade Parlamentu Nasionál nian atu haree ba preokupasoins povu nian.

Hatán ba preokupasaun ida-ne’e, Xefe Estadu dehan:

“La’ós veteranus sira mesak maka la konkorda ho lei pensaun vitalísia ne’e, no la’ós ha’u mesak maka kontra, maibé ema barak iha Timor-Leste mós la konkorda. Tanba ne’e, ko’alia beibeik i ko’alia maka’as liután iha tinan ida-ne’e nia laran. Ne’ebé, ita espera ita-nia membru Parlamentu Nasionál bele rona ita-nia preokupasoins.”

Xefe Estadu hatutan, nia kontra lei ida-ne’e dezde sei Jenerál, tanba veteranu sira funu durante tinan 24 simu ki’ik liu fali Ministru ho deputadu sira ne’ebé serbisu la to’o tinan lima.

Hakat fali ba iha Suku Darulete, veteranu ida, Sr. Armindo Martins, agradese tebes vizita Xefe Estadu nian ba sira-nia suku, hodi hasoru malu ho komunidade sira no buka hatene komunidade nia difikuldades ho matan rasik. Veteranu Armindo mós aproveita husu Xefe Estadu atu harii monumentu em memória ba saudozu sira Darulete oan ne’ebé iha tempu okupasaun fó ona sira-nia vida ba nasaun ne’e.

Hatán ba ida-ne’e Xefe Estadu dehan, Estadu labele halo monumentu iha suku-suku, tanba sei iha limitasoens lubuk barak. Maibé, Estadu la haluha saudozu sira-ne’ebé sakrifika ona sira-nia an ba libertasaun nasionál.

Nune’e Xefe Estadu hatán no dehan:

“Ne’e símbolu ba memória koletiva nasaun nian, ita-nia mate-ruin sira barak seidauk hakoi hotu, iha munisípiu balun sei rai hela. Mas, imi labele nonook, imi tenke konta istória ba oan sira hodi hakerek iha surat-tahan, kuandu imi mate istória labele lakon, i ha’u fiar agora maka seidauk maibé ba futuru sei halo ba em memória ne’ebé maka ita hala’o tiha ona iha pasadu.”

Entretantu preokupasoins seluk ne’ebé komunidade sira iha Suku Luculai no Darulete hato’o ba Xefe Estadu mak hanesan, ezije halakon tiha lei pensaun vitalísia, hadi’ak dadus veteranus nian ne’ebé hamosu polémika, dada eletrisidade ba aldeia ne’ebé seidauk asesu eletrisidade, loke estrada ba aldeia ne’ebé seidauk iha asesu, no problema reál sira seluk.

Hola parte iha diálogu komunitária refere mak hanesan, bainaka sira ne’ebé Xefe Estadu konvida, hanesan Prezidente Defensór Públiku, Sérgio Hornai, Diretór Nasionál SEPFOPE, Administradór Munisípiu Maubisse, Xefe-Suku Mau-Nuno, Ainaro Villa, Ainaro, no Xefe-Suku Wagia, Ossu, Viqueque.

 

Author

Media Team