KOMUNIKADU BA MÍDIA S.E. PREZIDENTE REPÚBLIKA, TAUR MATAN RUAK, ENKONTRU KORTEZIA HO NIA ÓMOLOGU HOSI BRAZÍL, MICHEL TEMER

by Media Team Posted on

Brazília, 31 Outubru, 2016 – S. E. Prezidente Repúblika, Taur Matan Ruak, hala’o enkontru kortezia ida ho nia omólogu hosi Brazíl,  Prezidente Michel Temer, iha Palásiu Planalto Brazília iha segunda-feira, 31 Outubru, oras Brazíl nian, tersa-feira, 1 Novembru, oras Timor-Leste nian, iha marjen Simeira CPLP ba dala XI.

Iha enkontru refere, Xefe Estadu Brazíl hato’o nia agradesimentu ba Xefe Estadu Timor-Leste, Taur Matan Ruak, ba pasta prezidénsia rotativa CPLP ne’ebé maka hala’o ona durante tinan rua nia laran, hafoin promete katak, Brazíl sei hatutan susesu ne’ebé Timor-Leste realiza ona durante Prezidénsia tinan rua nia laran, no nia sente haksolok tebes ho serbisu Prezidénsia CPLP nian ne’ebé Timor-Leste hala’o.

Aproveita enkontru refere, Xefe Estadu Timor-Leste husu ba nia omólogu husi Brazíl, Prezidente Michel Temer, ne’ebé tinan rua ba oin sei kaer pasta prezidénsia CPLP, atu bele diskute liután sobre kria oportunidade ba sidadaun paizes membru CPLP nian atu bele tama-sai ba nasaun membrus hirak hodi halo atividade ekonomia no investimentu.

Durante Timor-Leste asume pasta prezidénsia rotativa CPLP nian tinan 2014-2016, Timor-Leste haktuir hotu kompromisu hirak hotu ne’ebé maka marka ona iha ajenda. HOTU