Diskursu hosi Sua Exelénsia Prezidente Repúblika, Taur Matan Ruak iha Serimónia Despedida ba FALINTIL-Forsa Defeza Timor-Leste

by Media Team Posted on

Kuartél-Jenerál, iha Fatuhada, 2 Fevereiru, 2017

Señór Prezidente Parlamentu Nasionál,

Señór Primeiru Ministru,

Señór Ministru Defeza no Membrus Governu,

Señór Xefe Estadu-Maiór Jenerál FALINTIL-Forsa Defeza Timor-Leste,
Ilustre Konvidadu sira,

Señoras no Señores,

Ha’u hakarak hahú hodi hato’o saudasaun ba Militár no Sivíl sira-ne’ebé ho dedikasaun no empeñu tomak serbisu loroloron iha FALINTIL-FDTL nia laran, hodi serbí ita-nia nasaun. Onra no priviléjiu boot tebes mai ha’u atu partisipa iha serimónia komemorasaun aniversáriu FALINTIL-FDTL ba dala sanulu-resin-neen, tanba okaziaun ida-ne’e iha signifikadu boot tebes ba Timoroan hotu-hotu.

Ha’u agradese mós ba ilustre konvidadu sira ne’ebé mai hola parte iha serimónia ida-ne’e, liuliu ita-nia militár no veteranu sira. Nasaun deve barak sira.

Ida-ne’e hanesan ha’u-nia diskursu ba dala ikus liu nu’udar Komandante Supremu Forsa Armada sira-nian. Ha’u-nia diskursu ne’e dirije ba feto no mane sira-ne’ebé serbí Instituisaun Militár ida-ne’ebé ha’u rasik orgullu atu serbí no dedika parte hosi ha’u-nia moris atu harii.

Ha’u hakat mai iha ne’e hodi hato’o obrigadu no mós atu ko’alia kona-ba orgullu ne’ebé ha’u sente ba Ita-Boot sira.

Ha’u mai fali iha Uma ida-ne’e, la’ós atu halo despedida, maibé atu hato’o liafuan gratidaun no fidelidade. Ha’u hakarak imi hatene katak, nu’udar sidadaun, ha’u-nia gratidaun rohan-laek nafatin, tanba sai Timor-Leste nia soldadu ida hanesan priviléjiu boot liu iha ha’u-nia moris tomak.

Ohin, iha fatin ida-ne’e, ha’u hanoin hikas fali kona-ba sai nu’udar Soldadu, no mós kona-ba prinsípiu sira-ne’ebé sai hanesan matadalan no inspirasaun ba ha’u-nia moris tomak.

Bainhira ha’u haree progresu ne’ebé ita-nia nasaun halo ona iha tempu badak nia laran,ha’u lembra filafali momentu, iha 2001, ne’ebé ita hotu konsentra iha Aileu hafoin tiha luta armada ida ne’ebé naruk no susar tebetebes hasoru okupasaun estranjeiru, hodi hein ho ansi atu haree objetivu hosi luta ne’ebé ita halo durante besik tinan 25 sai realidade: independénsia Timór nian.

Dezde inísiu kedas ha’u konxiente kona-ba dezafiu ne’ebé iha ita-nia oin no mós katak ita atu halo istória. Ha’u konxiente mós katak foufoun ita presiza ajuda internasionál ba knaar importante tebes ida: atu harii instituisaun sira Estadu nian no hametin pás no estabilidade. Iha momentu ne’ebá ha’u hatene katak ita iha dalan naruk atu la’o hodi halo Forsa Gerrilla nakfila ba Forsas Armadas – FDTL – no mós katak dalan hirak-ne’e ezije esforsu no solidariedade ita hotu nian.

Haktuir Konstituisaun katak, Prezidente Repúblika maka garantia ba independénsia nasionál no unidade Estadu nian, nune’e mós nia maka Komandante Supremu Forsa Armada sira-nian. Prezidente Repúblika nia asosiasaun konstitusionál ba Forsas Armadas subliña no intensifika ninia karakter nasionál no la’ós partidáriu. Ida-ne’e hanesan objetivu ida ke tenke hetan konsensu ne’ebé luan no atensaun maka’as hosi ajente polítiku no órgaun soberania hotu-hotu.

Hodi hala’o knaar nu’udar Komandante Supremu Forsa Armada sira-nian, tuir Konstituisaun haruka, ha’u konsidera nu’udar relevante tebetebes atu hametin instituisaun militár ne’e nia koezaun, dixiplina no naran-kmanek nu’udar soberania nia rezerva estratéjika ikusliu no ai-riin estruturante no fundamentál ba iha identidade nasionál.

Iha ita-nia istória foin daudaun nian dala barak ita hasoru situasaun hirak ne’ebé fó ameasa ba solidariedade hirak-ne’e no mós ba konfiansa povu nian ba ita-nia instituisaun sira. Maibé povu timoroan matenek no pasiente, to’o ikusliu, liuhosi partisipasaun ema hotu nian, ita konsege hakat liu konflitus no hametin konfiansa ba instituisaun demokrátika sira.

Tinan kotuk mak ida hosi momentu sira be refere. Iha períodu konsolidasaun no evolusaun demokrasia ne’ebé ita moris daudaun, ha’u hakarak hato’o liafuan apresu liuliu ba militár sira FALINTIL-FDTL nian ne’ebé esforsa an atu halo ita-nia polítiku sira respeita prinsípiu transparénsia no étika, nune’e kontribui ba hametin ambiente koezaun, estabilidade no seguransa iha rai-laran. Sira hein desizaun polítika ho laran-hakmatek no hatudu profisionalizmu ne’ebé aas, maturidade demokrátika, respeitu institusionál no sentidu servisu ba Timor-Leste.

Militares.

Señoras no señores,

Timor-Leste labele haluha sira-ne’ebé fó an ba mate ba nasaun ida-ne’e.

Valór sira-ne’ebé uluk motiva jerasaun kombatente oioin no halo sira fó sira-nia an tomak no luta ba, hanesan ho valór sira ohin loron nian, ne’ebé konkretiza iha defeza ba Timor-Leste nu’udar valór boot liu hotu. Mai ita fó onra no respeita valór no tradisaun sira.

FALINTIL-Forsa Defeza Timor-Leste nia Estandarte Nasionál hanesan depozitáriu ba legadu servisus hirak ne’ebé aas presta hosi forsa FALINTIL ba kauza libertasaun nasionál no fó naran-boot, onra no prestíjiu ba Instituisaun Militár hirak-ne’e no mós ba Nasaun.

Kondekorasaun ne’ebé mak Prezidente Repúblika no Komandante Supremu fó ba imi-nia Estandarte Nasionál, hakarak selu fali aten-barani no determinasaun ne’ebé hatudu hosi gerrilleiru sira ba Libertasaun Nasionál ne’ebé luta no mate iha luta. Ida-ne’e hanesan onra ba Ita-Boot sira no mós ba Forsas Armadas.

Rekoñesimentu públiku ne’ebé mak ha’u fó iha serimónia ida-ne’e hodi kondekora Estandarte Nasionál F-FDTL nian ho Orden FALINTIL no prega insígnia ba iha Estandarte Nasionál, rekoñesimentu ne’e justu duni.

Militares.

Iha momentu despedida ida-ne’e, ha’u hakarak hato’o ho laran tomak ha’u-nia omenajen ba Timor-Leste nia Soldadu ida, Majór-Jenerál Lere Anan Timur, ne’ebé fó nia moris tomak ba Pátria, onra no devér. Ninia ezemplu tenke sai hanesan inspirasaun ba jerasaun sira oinmai.

Ha’u ho Jenerál Lere koñese malu tinan haatnulu resin ona, hosikedas loron primeiru ami hamriik hamutuk iha frente armada hodi luta ba libertasaun nasionál. Desizaun atu hili nia hodi troka ha’u ba kargu nu’udar Komandante FALINTIL-FDTL hanesan desizaun ne’ebé adekuadu duni tanba nia ema ida ke iha valór boot tantu nu’udar ema no militár, tanba ninia atitude iha instituisaun militár nia laran no mós tanba ninia kapasidade atu kaer knaar ida-ne’e.

Ne’e duni, ha’u hakarak hato’o ha’u-nia gratidaun ba nia no rekoñese ninia esforsu, dedikasaun no serbisu ne’ebé halo ona nu’udar lideransa Forsas Defeza nian iha períodu ida ke ezijente tebetebes maibé mós gratifikante, tanba durante períodu hirak-ne’e konsege halo progresu boot hodi hametin koezaun no dignifika Instituisaun Militár hirak-ne’e.

Ema no militár ida-ne’e mak Komandante Supremu Forsa Armada sira-nian hakarak kondekora ho MedallaMéritu Timor-Leste nian.

Ha’u hakarak agradese mós ba Vise Xefe Estadu-Maiór Jenerál Brigadeiru Filomeno Paixão no Xefe Estadu-Maiór FALINTIL-FDTL nian, Koronél Falur Rate Laek, ba kontribuisaun boot tebes ne’ebé fó mai ha’u durante hala’o knaar. Obrigadu barak!

Militares.

Señoras no señores,

Hanesan ho organizasaun seluseluk, hodi avalia Forsas Armadas ita tenke haree ba sira-nia produtu finál: sira-nia kontribuisaun ba seguransa iha rai-laran.

Tuir ha’u-nia komprensaun, ita tenke haree ba Forsas Armadas hosi pontu de vista Nasaun nian. Transformasaun hosi instituisaun FALINTIL-Forsa Defeza Timor-Leste hanesan prosesu polítiku ida ne’ebé iha hela evolusaun nia laran, iha ne’ebé Forsas Armadas tenke simu orientasaun hirak ne’ebé adekuadu hodi halo mudansa no transformasaun ne’ebé presiza.

Haree ba ita-nia limitasaun orsamentál ne’ebé rigorozu, ita tenke habesik ita-nia vizaun estratéjika kona-ba Forsas ne’ebé adekuadu no efisiente – ho Sistema Forsas ida ke proporsionál ba kondisaun nasaun nian – ba iha objetivu sira-ne’ebé ita hakarak to’o ba no mós ba ita-nia kapasidade no posibilidade sira.

Hodi halo nune’e ita presiza adapta enkuadruamentu konseptuál tomak ba meius ne’ebé mak iha ho modun realista no adekuadu, ho objetivu atu lori koerénsia ba diploma hotu-hotu ne’ebé iha ona. Ida-ne’e signifika katak diploma sira-ne’e tenke sai hanesan rezultadu hosi planeamentu estratéjiku ida adekuadu ne’ebé dala ruma tenke liu hosi prosesu revizaun ida.

Timor-Leste nia Konseitu Estratéjiku Defeza no Seguransa Nasionál dahuluk kontribui ba objetivu ida-ne’e. Konseitu hirak-ne’e fó análize ne’ebé klaru no barani kona-ba ambiente seguransa iha sékulu 21. Ita hotu espera katak konseitu ne’e sei avalia hikas fali instituisaun defeza no seguransa Estadu sira-nia papél no knaar no mós sei sai hanesan baze atu halo planeamentu ba investimentu ba tempu naruk ne’ebé tenke primeiru adekuadu haree ba kumprimentu hosi F-FDTL nia misaun sira, segundu bele implementa tanba la’o tuir limite orsamentu nian no ikusliu iha probabilidade aas atu hetan aprovasaun en termus polítikus.

Klaru ke ohin loron ekipamentu importante tebes, tanba ne’e mak ita luta naba-naba atu halo ita-nia forsa sira sai ekipadu di’ak liután. Maibé sira-ne’ebé koñese ita-nia istória hatene mós katak ema rasik no sira-nia vontade atu luta mak halo diferensa. No ita sei kontinua nafatin hanesan ne’e. Instituisaun Militár ne’e ba futuru tenke kompostu hosi ema militár no sivíl ke iha kompeténsia no motivasaun, ne’ebé tuir padraun aas liu ba formasaun, kualifikasaun no treinu.

Nu’udar Komandante Supremu ha’u koñese FALINTIL-FDTL sira-nia realidade, kapasidade, limitasaun no ambisaun sira. Ha’u avalia sira-nia dezempeñu hanesan razaun lejítimu ida ba Timoroan hotu-hotu atu fó fiar no sente orgullu ba.

Ita tenke hahi’i esforsu ne’ebé halo hosi F-FDTL hodi fó kapasitasaun ba sira-nia rekursus umanus, hasa’e forsa sira-nia kapasidade tátika no operasionál sira, hametin kooperasaun bilaterál no multilaterál, hasa’e sira-nia partisipasaun iha ezersísiu nasionál no konjuntu hirak no hametin F-FDTL nu’udar instituisaun ida ke importante tebetebes ba estabilidade no seguransa iha rai-laran.

Militares.

Despedida sempre hanesan momentu susar ida. Iha momentu despedida ita-nia laran sempre dodok tebetebes. Makdalek portugés sira hatete hanesan ne’e “Quem parte leva saudades, quem fica saudades tem!” Maibé ita-nia moris ne’e hanorin ha’u katak dala ruma momentu despedida la’ós momentu tristeza ida. Dala barak momentu despedida hanesan oportunidade di’ak ida atu hahú buat di’ak liu ida!

Ohin ha’u mak hato’o obrigadu. Onra no priviléjiu boot ida mai ha’u bele sai imi-nia Komandante Supremu.

Ha’u deve barak ba Forsas Armadas. Imajen ne’ebé ha’u hakarak husik hela ba joven sira mak imajen hosi soldadu ida ne’ebé sente orgullu tebes hodi serbí Forsas Armadas no País durante liu tinan 40. Imi-nia espíritu serbisu, dedikasaun no kamaradajen ha’u sei rai didi’ak iha ha’u-nia fuan.

Tanba ne’e maka ha’u fó omenajen ba imi. Ha’u sei tau atensaun nafatin ba asuntu hotu-hotu relasiona ho Instituisaun Militár no ha’u sei solidáriu nafatin ho família militár ne’ebé ha’u pertense ba.

Ho votu esperansa mak ha’u fó korajen ba imi atu serbí nafatin ita-nia Pátria hanesan imi sempre halo, hodi fiar iha futuru ida ne’ebé di’ak liután, nune’e fó onra nafatin ba Timor-Leste.

Viva Timor-Leste!