Diskursu ba Dala Ikus hosi Sua Exelénsia Prezidente Repúblika, Taur Matan Ruak iha Serimónia Komemorasaun Aniversáriu Polísia Nasionál Timor-Leste ba -17

by Media Team Posted on

Dili, 27 Marsu 2017
Señór Prezidente Parlamentu Nasionál,

Señór Primeiru Ministru,

Señór Ministru Interiór no Membrus Governu,

Señór Komandante-Jerál Polísia Nasionál Timor-Leste, Ilustre Konvidadu sira

Señoras no Señores,

Iha momentu ne’ebé ita selebra aniversáriu Polísia Nasionál TimorLeste ba dala 17, ulukliu ha’u hakarak hato’o ha’u-nia saudasaun ba Polísia no Sivíl sira-ne’ebé loroloron kolabora hodi kaer metin seguransa iha rai-laran, hametin legalidade demokrátika, tane aas no asegura ita-nia identidade nasionál, liuhosi uza sira-nia kapasidade hodi serbí ita-nia Rain ho ita-nia povu.

Ha’u hakarak aproveita okaziaun ida-ne’e atu fó parabens ba povu timoroan tomak ba partisipasaun iha eleisaun ne’ebé hala’o foin lailais ne’e ho hakmatek no tuir orden, no ha’u espera katak hahalok hanesan ne’e sei kontinua nafatin iha eleisaun oinmai. Klima seguransa ida-ne’e só bele sai posivel tan knaar importante tebes ne’ebé hala’o hosi PNTL hamutuk ho FFDTL no parseiru sosiál sira, hodi asegura ambiente ida ne’ebé nakonu ho hakmatek, independénsia no neutralidade, tanba ida-ne’e hanesan kondisaun ne’ebé mak presiza hodi harii Estadu Direitu

Iha loron festa ida-ne’e, hanesan onra boot ida ba Prezidente Repúblika atu mai hamutuk ho imi iha fatin ida-ne’e hodi fahe lisuk signifikadu serimónia ida-ne’e nian, reafirma importánsia nasionál hosi misaun hotu-hotu ne’ebé mak Forsas no Servisus Seguransa hala’o ona, no hato’o apresiasaun ba sira-nia dedikasaun no sakrifísiu durante hala’o misaun sira-ne’e

Ha’u agradese mós ba ilustre konvidadu sira ne’ebé mai hola parte iha serimónia ida-ne’e. Obrigadu barak ba imi-nia prezensa.

Iha ha’u-nia vizita despedida ba FALINTIL-Forsas Defeza Timor-Leste foin lailais ne’e, ha’u hato’o ha’u-nia agradesimentu kle’an, nu’udar Prezidente no mós sidadaun, ba serbisu ne’ebé F-FDTL halo ona ba País hodi hatudu dedikasaun, kompeténsia no patriotizmu

Ohin, iha fatin ida-ne’e, ha’u hakarak hato’o ha’u-nia agradesimentu mós ba Polísia Nasionál Timor-Leste, tanba sira mós iha sentidu devér no disponibilidade maka’as tebes atu proteje no serbí ita-nia sidadaun sira no mós Repúblika

Prosesu konstrusaun ba Estadu demokrátiku iha nasaun nurak ida hanesan ita-nian – ne’ebé mai hosi períodu ida ne’ebé nakonu ho konflitu no dezafiu polítiku, ekonómiku no sosiál oioin, inklui mós problema seguransa rai-laran nian – bele hamosu sentimentu inseguransa, ne’ebé ida-ne’e mak razaun tansá nasaun presiza duni imi-nia profisionalizmu no dedikasaun.

Ha’u labele haluha atu hahi’i esforsu ne’ebé halo hosi PNTL hodi hasa’e kapasidade rekursus umanus nian, halo sira-nia atividade operasionál sai efikás liután, hadi’a kondisaun serbisu membrus PNTL nian, intensifika programa polisiamentu komunitáriu tuir modelu VIP (Vizibilidade, Envolvimentu no Profisionalizmu), hametin kooperasaun bilaterál no multilaterál ho Forsas no Servisus Seguransa nasaun seluk nian no hametin PNTL nu’udar instituisaun ida ke importante tebetebes ba seguransa públika, ba pás no mós ba estabilidade iha rai-laran

Liuhosi oportunidade ida-ne’e ha’u hato’o netik liafuan agradesimentu ba Señór Ministru Interiór, Dr. Longuinhos Monteiro, ba profisionalizmu, kompeténsia no dedikasaun ne’ebé nia uluk hatudu nu’udar Komandante Jerál PNTL nian no sei hatudu nafatin nu’udar Ministru, hodi presta servisu ne’ebé aas ba País no mós ba instituisaun Polísia Nasionál. Ha’u hakarak mós hato’o liafuan apresu ba Komandante-Jerál daudaun nian, Komisáriu Julio 3 Hornai, no mós ba Segundu Komandante, Komisáriu Faustino da Costa, ba apoiu boot tebes ne’ebé fó mai ha’u durante hala’o knaar.

Ha’u hakat mai iha ne’e hodi hato’o obrigadu

Señoras no señores, Tuir Konstituisaun, Prezidente Repúblika mak garante independénsia nasionál, unidade Estadu nian, instituisaun demokrátika sirania lala’ok regulár no mós kumprimentu ba prinsípiu Estadu Direitu. Tanba ne’e mak Prezidente Repúblika fó fiar ba Forsas no Servisus Seguransa, liuliu ba Forsa Polísia sira, atu hametin orden públika, pás sosiál no seguransa komunidade sira-nian.

Seguransa hanesan kestaun Estadu nian ida, maibé sei la limita de’it ba buat hirak-ne’e. Seguransa hanesan direitu fundamentál sidadaun hotu-hotu nian, ne’ebé Estadu tenke promove no asegura. Laiha Seguransa mak la iha moris-di’ak, estabilidade no dezenvolvimentu ekonómiku. Laiha Seguransa mak la iha Demokrasia.

Estadu, liuhosi Governu, nia misaun prinsipál mak asegura seguransa iha rai-laran no tau matan ba seguransa sidadaun hotu-hotu nian, hodi respeita sira-nia direitu fundamentál sira.

Forsas no Servisus Seguransa, ne’ebé inklui mós Polísia, prontu atu serbí komunidade sira. Hosi parte seguransa, sira iha devér atu adapta sirania realidade no lala’ok tuir nesesidade sira sosiedade nian.

Polítikas seguransa nian tenke buka konseitu foun hirak kona-ba seguransa ba defeza no protesaun sosiedade sira-nian, ne’ebé sei envolve komunidade tomak no orienta bazeia ba pontu fundamentál tolu hosi polítika seguransa interna: Sidadania, modernizasaun no prosimidade.

Sidadania, tanba ohin loron sidadaun sira pertense ba sosiedade ida ne’ebé globál no globalizada. Oras ne’e daudaun ita enfrenta hela problema 4 “défise sidadania”. Ita haree katak ohin loron sidadaun sira komesa neineikneineik lakon ona sentimentu “pertense” ba komunidade ida. Ida-ne’e bele sai hanesan kauza prinsipál ida ba inseguransa. Kestaun seguransa ka inseguransa la’ós problema ida ne’ebé Polísia de’it mak tenke rezolve. Ida-ne’e hanesan mós problema ida ne’ebé liga ba sosiedade ho sivilizasaun

Hodi investe ihaForsa sira-nia modernizasaun no mós iha dignidade knaar Polísia nian,ita tenke investe maka’as liután lapara iha infraestrutura no ekipamentu hirak, ho objetivu atu hasa’e Forsa sira-nia kapasidade operasionál no valoriza ajente sira-nia karreira hodi rekoñese kondisaun Polísia nia espesifidade sira.

Polítika prosimidade entre Estadu-Sidadaun haree liu ba oinsá Estadu no sidadaun sira bele hakbesik malu, hodi halo sidadaun sira sente integradu liután no simu medidas ne’ebé mak hola hosi podér sentrál hasoru kriminalidade liuhosi kontribuisaun hosi setór sosiedade nian hotu-hotu. Kriminalidade hanesan problema ida ke bele rezolve ho modelu polisiamentu prosimidade ne’ebé foka liu ba halo prevensaun duké hein to’o problema mosu mak halo atuasaun. Nune’e, tuir ha’u-nia hanoin, importante liu mak Polísia kaer metin ba prinsípiu sira-ne’ebé define polisiamentu komunitáriu atu nune’e bele hasa’e sentimentu seguransa iha komunidade sira-nia leet no hamenus kriminalidade ki’ik no média.

Atu harii nasaun ida ke livre hosi korrupsaun no impunidade, ita tenke hamutuk. Lei fó kompeténsia investigasaun kriminál ba PNTL. Ha’u ko’alia beibeik ona kona-ba nesesidade atu hametin órgaun polísia kriminál ho setór Justisa tomak sira-nia rekursus. Ita hotu tenke hamutuk hodi prevene no hasoru Korrupsaun no impunidade, hanesan dalan úniku atu asegura distribuisaun ida ne’ebé justu liu ba ita-nia rikusoin, inklui mós dezenvolvimentu ida ne’ebé mós justu liu iha ita-nia rain.

Nune’e, iha aspetu tolu ne’ebé mak ita tenke fó atensaun: ida mak asaun komandu no lideransa ne’ebé tenke esklaresidu, ida seluk mak Forsas no Servisus Seguransa sira-nia koezaun no dixiplina. Aspetu ida seluk mak 5 rekursus umanus nia formasaun no espesializasaun ne’ebé tenke sai hanesan rekursu estratéjiku ida ho objetivu atu hasa’e kualidade servisu ne’ebé mak presta ba sosiedade.

 

Señoras no señores,

Ita hotu hakarak Timoroan sira seguru liu no atu sente seguru liu. Timoroan sira hein katak Estadu sei iha kapasidade atu prevene no halakon kriminalidade hodi respeita sidadaun sira-nia liberdade, direitu no garantia sira.

Resposta ida ne’ebé di’ak ba ameasa, risku no dezafiu sira-ne’ebé iha, ezije Forsa sira organiza an tuir modelu seguransa kooperativu ida ne’ebé foka liu ba ema no mós ba nesesidade atu defende sira-nia moris, sasán no maneira atu moris.

Atu harii seguransa ho rekursus públikus ne’ebé limitadu tebes, ita presiza halo jestaun rekursus sai efisiente liután iha área intervensaun Estadu nian hotu-hotu. Jestaun hirak-ne’e tenke rigorozu no haree liu ba oinsá atu uza didi’ak rekursus ne’ebé mak ita iha, inklui mós hamosu reforma hirak ne’ebé sei kontribui ba hasa’e kapasidade operasionál.

Ida-ne’e atu dehan katak ita presiza define estratéjia foun ida kona-ba seguransa nasionál hodi aproveita didi’ak kapasidade sira-ne’ebé ita iha ona, bazeia ba konseitu “polivalénsia”, “fleksibilidade”, “interdependénsia” no “komplementaridade” rekursus sira-nian. Tuir loloos, labele halo duplikadu ba kapasidade sira-ne’ebé hakarak kria. Só bele halo nune’e iha situasaun exesionál ho objetivu espesífiku ruma.

Foin lailais ne’e Governu aprova Konseitu Estratéjiku Defeza no Seguransa Nasionál (CEDSN) ne’ebé bazeia ba vizaun ida ne’ebé tau hamutuk sistema seguransa militár, sistema seguransa interna, sistema informasaun, sistema justisa no sistema protesaun sosiál, inklui mós fatór 6 polítiku, ekonómiku no sosiál seluseluk ne’ebé mak kontribui ba atinje seguransa nasionál nia objetivu estratéjiku sira.

Ha’u fiar katak Konseitu hirak-ne’e – nu’udar matadalan ba Estadu nia estratéjia globál no hanesan referénsia ida ba estratéjia setoriál sira – sei dudu ita atu avalia hikas fali instituisaun defeza no seguransa Estadu sira-nia papél no knaar, no mós atu halo revizaun ba prátika no kapasidade sira-ne’ebé sei presiza dezenvolve.

Membrus PNTL, feto ho mane,

Ita moris hela iha nasaun ida ne’ebé, maski sei nurak hela nu’udar Estadu maibé aprende hosi sala sira-ne’ebé halo tiha ona, no agora daudaun konsidera hanesan rain ida ne’ebé seguru no hakmatek. Dala ruma ita haluha katak ita-nia maneira moris, liberdade, estabilidade no hakmatek ita deve liuliu ba ita-nia Forsas Seguransa.

Ohin ita mai hamutuk iha fatin ida-ne’e hodi fó omenajen ba ita-nia Demokrasia nurak ne’e nia konsolidasaun, através knaar ne’ebé hala’o hosi Polísia Nasionál hodi hametin legalidade demokrátika, seguransa rai-laran nian no Timoroan sira-nia direitu sira. Nune’e, nu’udar Prezidente Repúblika ha’u hakarak fó sasin kona-ba kompeténsia no lealdade ne’ebé mak Polísia sempre hatudu mai ha’u. Ha’u hakarak mós fó omenajen ba sira feto ho mane ne’ebé loroloron fó sira-nia kontribuisaun maski dala barak la iha rekoñesimentu no arriska sira-nia moris hodi defende no hadi’ak sidadaun sira-nia moris, atu nune’e Timor-Leste bele sai hanesan Estadu Direitu Demokrátiku ida.

Ha’u fiar katak rekoñesimentu públiku ne’ebé mak ha’u fó iha serimónia ida-ne’e hodi kondekora imi-nia Instituisaun ho Colar da Ordem de Timor-Leste no prega insígnia ba iha Estandarte Nasionál, hanesan rekoñesimentu ida ne’ebé justu duni.

Nune’e, ho sentimentu gratidaun ida-ne’e no hodi fó rekoñesimentu ba Polísia Nasionál tomak liuhosi jestu ida-ne’e, mak ha’u hakarak uza oportunidade ida-ne’e mós atu kondekora Komisáriu Julio da Costa Hornai ho Insígnia da Ordem de Timor-Leste ba servisu hirak ne’ebé nia presta ona ba Nasaun iha Komandu Jerál PNTL nia laran. Ho laran-ksolok tebes mak ha’u kondekora nia ho insígnia.

Iha momentu despedida ida-ne’e, Prezidente Repúblika hatene katak Polísia Nasionál Timor-Leste fó prestíjiu no dignidade ba Repúblika Timoroan no sei kaer metin nafatin ba prinsípiu “sosiedade ida ne’ebé justu, livre no seguru liu”. Sira-nia dezempeñu hanesan motivu lejítimu ida ba Timoroan sira atu sente konfiansa no orgullu.

 

Viva PNTL !

Viva Timor-Leste!