KOMUNIKADU BA MIDIA :S.E. PREZIDENTE TAUR MATAN RUAK HATO’O SENTIDU KONDOLÉNSIAS BA FALESIMENTU SENADORA TOMIKO OKAZAKI

by Media Team Posted on

Dili, 23 Marsu, 2017 – S.E. Prezidente Repúblika, Taur Matan Ruak, kinta-Feira semana ne’e hato’o sentidu kondolénsias ba falesimentu Senadora Japaun nian, Tomiko Okazaki, ne’ebé iis kotu iha loron 19 fulan-Marsu 2017 ho idade 73.

Sentimentu hosi S.E. Prezidente Repúblika, Taur Matan Ruak:

“Sente triste rona notísia kona-ba Sra. Tomiko Okazaki nia mate. Sra. Okazaki ema ida ne’ebé dedika mós nia tempu lubuk ida hodi apoiu luta Timor-Leste nian iha nia rain Japaun no mós iha Novaiorke iha tempu okupasaun nian, i ninia mate hanesan lakon boot ba Timor-Leste.

Nune’e aproveita biban ne’e, lori povu Timor-Leste nia naran no ha’u-nia naran rasik hakarak hato’o sentimentu solidariedade no kondolénsias ba família Okazaki nian. Sra. Okazaki nia dedikasaun no apoiu ba Luta Ukun-Rasik An timoroan nian sei metin iha povu Timor-Leste nia fuan to’o rohan-laek.”

Senadora Tomiko Okazaki, hosi Sidade Fukushima, moris iha loron 16 fulan-Fevereiru, 1944. Nia hanesan ema polítiku Japaun nian ba Partidu Demokrata Japaun, membru Kámara ba Konselleiru (House of Councillors) iha Dieta (Lejizlatura Nasionál) iha tinan 1997. Iha tinan 1980, nia luta ba rekoñesimentu restaurasaun RDTL nian ne’ebé la’ós de’it iha Japaun maibé mós iha Novaiorke, Estadus Unidus. Nia dedika nia tempu lubuk ida ba luta Timor-Leste nian inklui halo moris filafali lia-tetun liuhosi Darwin Tetum school iha tempu ne’ebá. Ho nia dedikasaun sira-ne’e, nia hetan apresiasaun hosi timoroan barak inkluidu Kay Rala Xanana Gusmão no atuál Xefe Estadu, Taur Matan Ruak.  Ba nia dedikasaun refere, Senadora Tomiko Okazaki hetan rekoñesimentu hosi Estadu Timor-Leste ho kondekorasaun Ordem de Timor-Leste iha loron 9 fulan-Setembru, 2015, iha Tókiu.  HOTU