PALESTRA HOSI S.E. PREZIDENTE REPUBLIKA, TAUR MATAN RUAK IHA KONFERÉNSIA KONA-BA JUSTISA IHA TIMOR-LESTE, ORGANIZA HOSI FAKULDADE DIREITU-UNIVERSIDADE NASIONAL TIMOR LOROSA’E (UNTL)

by Media Team Posted on 25 views

Magnífiku Reitór,

Señoras no Señores Dekanus,

Señoras no Señores Profesores,

Alunu sira,

Ho laran-ksolok boot mak ha’u mai hasoru ho imi iha Universidade Nacional de Timor-Lorosa’e hodi haree alunus no profesores barak oin-nurak ne’e. Ida-ne’e hatudu vitalidade ita-nia sosiedade nian.

Edukasaun hanesan prioridade ida ba ha’u, ohin loron no ba nafatin. Ita nu’udar nasaun nurak liu ida iha mundu no ita nia populasaun maioria klosan kompara ho nasaun seluseluk. No futuru foin-sa’e sira mak kaer!

Tanba ne’e mak ita presiza investe iha Edukasaun: investe iha fasilidade sira no hasa’e mestre sira-nia kapasidade atu nune’e sira bele hanorin foin-sa’e sira no kria kondisaun ba joven sira atu tau iha prátika buat hirak ne’ebé sira aprende tiha ona.

Hanesan Ita-Boot sira hotu hatene, ha’u vizita suku hotu-hotu iha Timór laran tomak durante ha’u-nia mandatu. Durante ha’u-nia vizita sira-ne’e, foin-sa’e sira mak halo ha’u impresionadu tebes! Iha suku no aldeia hotu-hotu, hosi fatin urbanu ba to’o iha izoladu liu, labarik no foin-sa’e sira mak sempre akompaña ha’u iha ha’u-nia viajen. Investimentu iha Juventude hanesan investimentu iha sira-nia Edukasaun atu nune’e bele hetan futuru ida ne’ebé di’ak liután. Edukasaun hanesan liman-rohan boot liu ne’ebé ita bele husik hela ba ita-nia oan sira!

Klaru ke dala ruma edukasaun la to’o. Ita presiza kombate hasoru dezempregu juventude nian liuhosi polítika serbisu hirak ne’ebé ativu.

Tanba ne’e mak ha’u sempre ko’alia ho Governu no Parlamentu kona-ba nesesidade atu investe maka’as liután iha Edukasaun no mós iha Foin-sa’e sira, tanba sira mak jere fundus públikus iha aprovasaun ba Orsamentu Jerál Estadu. Sr. Reitór, señores professores, alunu sira: ha’u promete katak ha’u sei defende nafatin investimentu boot liu iha Edukasaun nu’udar futuru ita hotu nian.

Konvite atu hakat mai UNTL mai hosi Dekana Dra. Maria Ângela Carrascalão hosi Fakuldade Direitu maski nia ohin labele dezloka an mai iha ne’e tanba razaun saúde. Tanba ne’e mak ha’u sei ko’alia uitoan kona-ba difikuldades no dezafius ne’ebé ha’u identifika tiha ona iha setór Justisa. Justisa hanesan ho Edukasaun tenke sai nu’udar prioridade boot liu ida Estadu nian. Prioridade rua ne’e hasoru malu iha Fakuldade Direitu UNTL.

Setór Justisa ida ne’ebé funsiona hanesan kondisaun ne’ebé presiza hodi halo prinsípiu Estadu Direitu Demokrátiku sai realidade, tuir Konstituisaun haruka.

Ida-ne’e rasik hanesan valór ida ne’ebé ita luta ba durante tinan barak nia laran. Ita la luta hodi troka Estadu opresór ida ba fali Estadu naranaran de’it, maibé ita luta ba Estadu ida be Livre, Justu no Demokrátiku. Justisa ida ne’ebé loroloron funsiona ba ita-nia sidadaun sira hodi rezolve konflitu ba malu no ho Estadu rasik, hanesan fatór importante tebetebes ida ba rekoñesimentu hosi asaun Estadu nia laran-luak.

Ida-ne’e mós fatór importante tebetebes ida ba ita-nia dezenvolvimentu. La iha kompañia ida mak hakarak investe osan iha ita-nia rain karik nia la iha garantia katak ita-nia sistema justisa la’o ho di’ak. Setór Justisa ida ne’ebé funsiona hanesan kondisaun atu dada mai investimentu hosi rai-li’ur. Kompañia sira atu investe iha ita-nia rain, buat ne’ebé importante liu ba sira mak Justisa ida ne’ebé la’o di’ak, la’ós estrada ka infraestrutura seluseluk. Justisa nia importánsia ba sira só bele kompara ho traballadór nasionál sira-nia kualifikasaun, ne’ebé Universidade ne’e rasik promove.

Atu Justisa bele la’o ho di’ak, sei iha buat barak atu halo no mós atu la halo.

Labele fó presaun ba Justisa, ba juis sira no mós ba prokuradór sira. Setór Justisa nia independénsia hanesan garantia mahuluk katak Justisa serbisu ho izensaun, imparsiál no ikusliu Justu! Independénsia judisiál hanesan garantia konstitusionál ida ne’ebé tenke kumpre duni no respeita tanba ida-ne’e solusaun di’ak liu ba Justisa nia lala’ok! Lahó ta’uk ita tenke husik Ministériu Públiku halo investigasaun, husik Advogadu no Defensór Públiku sira halo defeza no husik mós Juis sira foti desizaun. Sira foti tiha desizaun karik, ita tenke simu no halo tuir sira-nia desizaun! Ne’e mak Justisa nia lala’ok normál ne’ebé ita tenke promove.

Aleinde halakon presaun ba Justisa, sei iha buat barak atu halo hodi hadi’ak setór Justisa.

Ita presiza hadi’ak infraestrutura sira hodi investe iha kualidade edifísiu sira-ne’ebé sai serbisu-fatin ba tribunál sira, Ministériu Públiku no mós ba setór apoiu ba Justisa seluseluk.

Importante mós ita investe iha ema.

Ita presiza hadi’ak operadór judisiál hotu-hotu nia kualifikasaun hodi investe iha Formasaun ho permanente. Universidade ida-ne’e investe iha foin-sa’e sira-ne’ebé aban-bainrua sei kaer knaar ruma iha setór Justisa. La dook hosi fatin ida-ne’e, iha Sentru Formasaun Jurídika no Judisiária, sira investe iha atór judisiál hotu-hotu. Ita presiza mós asegura, iha ne’ebé nesesáriu, apoiu internasionál ba hanorin ita-nia alunu sira no akompaña ita-nia juis sira hodi kria kondisaun estabilidade ba juis internasionál sira ne’ebé kualifikadu no esperiente atu hala’o knaar.

Maski nune’e, ita presiza mós loke foin-sa’e sira-nia asesu ba karreira setór Justisa nian no halo sira atu dada foin-sa’e sira-nia interese, ho posibilidade progresaun iha karreira. Juis sira-nia karreira paralizadu kleur ona tanba la iha inspesaun, maibé la’ós sira mesak mak hasoru problema ne’e. Atór judisiál seluseluk mós enfrenta problema hanesan.

Lei sira-ne’ebé mak regula ita-nia rain tenke liu hosi debate ida, maibé presiza tempu naruk hodi identifika solusaun hirak ne’ebé adekuadu liu ba ita-nia realidade. Ita presiza investe maka’as liután iha lei sira-ne’ebé regula ita-nia sistema justisa. Diagnóstiku halo tiha kleur ona. Tempu to’o ona atu halo buat ruma.

Iha asuntu balun ne’ebé bele benefisia hosi revizaun konstitusionál ida, hanesan porezemplu relasaun entre Lei Parlamentu Nasionál no Dekretu-Lei Governu nian. Maski nune’e, ne’e la posivel karik iha tempu badak nia laran, ita presiza harii lailais organizasaun judisiária ida-ne’ebé prevee iha Konstituisaun, ne’ebé to’o oras ne’e seidauk iha: Supremu Tribunál Justisa, Tribunál Administrativu no Fiskál sira, Tribunál Kontas, inklui mós sira-nia lei prosesuál sira.

Tribunál Administrativu no Tributáriu sira, nu’udar tribunál espesífiku hodi rezolve konflitus entre Estadu no sidadaun, hanesan mós kondisaun importante tebetebes ida hodi bele harii Estadu Direitu Demokrátiku iha ita-nia leet. Só kontrolu efetivu hosi sidadaun sira ba Estadu nia asaun mak bele hadi’ak Estadu nia lala’ok rasik. Ida-ne’e hatudu mós katak Estadu la ta’uk sidadaun sira-nia kontrolu. Ida-ne’e akontese mós ho kontrolu ba Tribunál Kontas, daudaun ne’e bolu naran Kámara Kontas. Estadu labele ta’uk Kámara Kontas nia kontrolu maibé tuir loloos nia tenke agradese kontrolu hirak-ne’e tanba bele garante Estadu nia legalidade no evita problema mosu fali iha futuru. Fundamentál ita fila fali ba limite kontrolu despeza Estadu nian molok revizaun 2013 nian no haluan nia atividade ba setór Estadu nian hotu-hotu.

Ita presiza Tribunál iha territóriu nasionál tomak. Tribunál sira tenke kobre Timór laran tomak hodi garante asesu ba Tribunál ba sidadaun hotu-hotu.

Seidauk halo mós artikulasaun ne’ebé di’ak entre “Justisa Tradisionál” no desizaun sira-ne’ebé foti iha ámbitu justisa formál Estadu nian. Ita labele haluha importánsia estrutura tradisionál nian hodi rezolve konflitu, liuliu ninia potensiál atu harii pás sosiál, ne’ebé nasaun seluseluk maski dezenvolvidu ona buka halo tuir. Maski nune’e, realidade tradisionál hirak-ne’e labele la’o hasoru Estadu nia autoridade no unidade.

Investimentu iha justisa nu’udar kondisaun atu luta hasoru problema boot liu ida ne’ebé afeta hela ita-nia sosiedade, katak korrupsaun. Luta hasoru korrupsaun envolve meius Estadu hotu-hotu, inklui mós sidadaun hotu-hotu. Ita presiza haree filafali lei sira karik nesesáriu, porezemplu kona-ba kontratasaun públika, maibé importante liu maka ita fó meius ba sira-ne’ebé implementa lei sira-ne’e, respeita prokuradór ho juis sira-nia autonomia no kumpre desizaun ne’ebé sira foti. Importante mós atu harii mekanizmu kooperasaun hirak ne’ebé adekuadu ho nasaun estranjeiru hirak. Maski nune’e, atu luta hasoru korrupsaun presiza mós muda mentalidade sidadaun, Administrasaun Públika no titulár kargu polítiku sira-nian. No dala ida tan ha’u tenke temi hikas fali kona-ba importánsia Edukasaun ne’ebé Universidade ida-ne’e promove!

Prezidente Repúblika aprende mós, hanesan mós ho Universidade ne’e nia alunu sira. Nia aprende buat barak iha tinan hirak ikus ne’e. Oras ne’e nia koñesimentu boot liu kona-ba país, ninia problemas no dezafius. Investimentu iha ema mak aban-bainrua sei lori mai rezultadu ne’ebé di’ak liu. Tanba ne’e, só ho unidade no liuhosi “korrije” ita-nia an rasik atraves edukasaun no investimentu iha Justisa, mak ita sei bele la’o tuir dalan konstrusaun Estadu ida ne’ebé Forte, Povu ida ne’ebé Livre no Nasaun ida ne’ebé Dezenvolvidu.

Dili, 28 Marsu, 2017

Author

Media Team