MENSAJEN HUSI PREZIDENTE REPÚBLIKA TIMOR-LESTE, TAUR MATAN RUAK, BA PARLAMENTU NASIONÁL KONA-BA PROMULGASAUN ALTERASAUN LEI PENSAUN VITALISIA

by Media Team Posted on 17 views

Ne’ebé mak akompaña promulgasaun ba Dekretu Parlamentu Nasionál nr. 35/III – Aprova Lei kona-ba Pensaun ba Deputadu sira no halo Alterasaun Dahuluk ba Lei nr. 5/2004, hosi loron 5 fulan-Maiu kona-ba Estatutu Deputadu sira-nian, inklui mós Alterasaun Dahuluk ba Lei nr. 7/2007, hosi loron 25 fulan-Jullu, kona-ba Estatutu Titulár Órgaun Soberania sira,

 

Sr. Prezidente Parlamentu Nasionál, Dr. Adérito Hugo da Costa, EXELÉNSIA,

Señora no Señór Deputadu sira, EXELÉNSIAS,

Mensajen ida-ne’e, ne’ebé tuir art. 86 e) Konstituisaun nian, akompaña promulgasaun ba Dekretu Parlamentu Nasionál nr. 35/III – Aprova Lei kona-ba Pensaun ba Deputadu sira no halo Alterasaun Dahuluk ba Lei nr. 5/2004, hosi 5 Maiu kona-ba Estatutu Deputadu sira-nian, inklui mós Alterasaun Dahuluk ba Lei nr. 7/2007, hosi 25 Jullu, kona-ba Estatutu Titulár Órgaun Soberania sira, no hanesan meius partisipasaun Prezidente Repúblika nian iha prosedimentu lejizlativu importante ida hanesan ne’e.

 

EXELÉNSIAS,

  • 1. Prezidente Repúblika sempre kontra opsaun polítika sira-ne’ebé mak hamosu “Pensaun Vitalísia”.
  • 1.1 Benefísiu exesionál hirak-ne’e hanesan priviléjiu ida ne’ebé la justifikavel ba klase polítika, liuliu tanba ita-nia sidadaun barak liu sei moris hela iha kondisaun mukit nia laran, hasoru deznutrisaun, la iha asesu ba bee-hemu ka meius subsisténsia ne’ebé mínimu.
  • 1.2 Atu promove kondisaun moris ne’ebé di’ak liután ba ita-nia sidadaun sira hanesan objetivu ida ita hotu nian, ne’ebé ita hotu haka’as an atu asegura repartisaun ida ne’ebé justu liu ba ita-nia rikusoin no enkargus Estadu nian, nune’e kumpre prinsípiu Estadu Direitu Demokrátiku nu’udar hatuur iha Konstituisaun nia art. 1.
  • 1.3 Foin lailais ne’e Parlamentu Nasionál aprova lei lubuk ida kona-ba protesaun sosiál, ne’ebé konsidera hanesan insersaun sistemátika ne’ebé loos ba reforma lejizlativa hirak-ne’e, hodi asegura kondisaun igualdade ba sidadaun nasionál seluseluk tuir haruka iha art. 16 Konstituisaun nian.

EXELÉNSIAS,

  • 2. Maski Konstituisaun rasik la fó-bandu tuir Tribunál Rekursu nia hareen, maski iha opiniaun jurídiku hirak ne’ebé dehan oin-seluk, nasaun barak foti ona opsaun polítika hirak ne’ebé justu liu hodi halakon klase polítika nia priviléjiu sira-ne’e ho objetivu atu asegura igualdade repartisaun rikusoin ne’ebé ita hotu nian no enkargus ne’ebé fó todan mai ita hotu.

EXELÉNSIAS,

  • 3. Rekursus ne’ebé mak disponivel ba Estadu atu uza labele “dada naruk” no sei la tahan ba nafatin. Tanba ne’e mak ita presiza haree oinsá fahe rikusoin ne’ebé iha hodi define prioridade hirak ne’ebé loos. Aleinde ne’e ita presiza fó atensaun boot liután ba ita-nia sidadaun sira ne’ebé terus no mukit; ita-nia taxa natalidade ne’ebé aas tebes ezije ita investe maka’as liután iha edukasaun, liuliu iha ensinu pre-eskolár no báziku; kondisaun sanitasaun ne’ebé ladún di’ak ezije ita investe maka’as liután iha infraestrutura báziku hirak hanesan saneamentu no bee-hemu.

EXELÉNSIAS,

Prezidente Repúblika hakarak dezenvolvimentu sosioekonómiku ida ne’ebé di’ak liután hodi foka liu ba ema no promove kondisaun moris ne’ebé di’ak liután ba ema hotu-hotu. Opsaun polítika sira-ne’ebé temi iha Dekretu Parlamentu Nasionál nr. 35/III (Aprova Lei kona-ba Pensaun ba Deputadu sira no halo Alterasaun Dahuluk ba Lei nr. 5/2004, hosi loron 5 fulan-Maiu kona-ba Estatutu Deputadu sira-nian, inklui mós Alterasaun Dahuluk ba Lei nr. 7/2007, hosi loron 25 fulan-Jullu, kona-ba Estatutu Titulár Órgaun Soberania sira), lahó prejuízu ba buat hirak ne’ebé temi iha mensajen ida-ne’e, sei hamenus diskriminasaun entre no sidadaun sira seluk. Ha’u hein katak ida-ne’e hanesan hakat ida atu halakon “pensaun vitalísia” ba titulár kargu polítiku sira no atu harii kondisaun hirak ne’ebé justu liu ba repartisaun rikusoin no enkargus Estadu nian.

 

Prezidente Repúblika,

________________________________________

TAUR MATAN RUAK

Author

Media Team