S.E. PREZIDENTE TAUR MATAN RUAK SIMU IHA AUDIÉNSIA BA DAHULUK PREZIDENTE REPÚBLIKA ELEITU DR. FRANCISCO GUTERRES LU-OLO

by Media Team Posted on

 Dili, 11 Abríl, 2017 – S.E. Prezidente Repúblika, Taur matan Ruak, tersa-feira ohin iha Palásiu Prezidensiál Nicolau Lobato, simu iha audiénsia ba dahuluk S.E. Prezidente Repúblika eleitu, Dr. Francisco Guterres Lu-Olo, ho nia ekipa hodi ko’alia kona-ba preparasaun ba prosesu tranzisaun hosi Xefe Estadu atuál ba Xefe Estadu eleitu ne’ebé sei entrega iha loron 20 fulan-Maiu oinmai ne’e.

Hafoin remata enkontru ne’ebé hala’o kuaze oras ida nia laran ne’e, S.E. Prezidente Repúblika Taur Matan Ruak akompaña Prezidente Repúblika eleitu, Dr. Francisco Guterres Lu-Olo, hodi lori tun mai iha korredór Prezidénsia Repúblika nian no halo entrevista ho jornalista sira ne’ebé hein hela iha korredór refere.

Ba jornalista sira Xefe Estadu atuál hatete:

“Señór Prezidente eleitu ohin mai vizita ha’u, mai koñese uma ne’ebé nia sei hela, ne’ebé ha’u kontente loos i ita hotu fó apoiu ba ita-nia Prezidente eleitu para kuandu nia mai serbisu iha ne’e para bele tau matan ba ita hotu.”

 Entretantu Prezidente Repúblika Eleitu, Dr. Francisco Guterres Lu-Olo ba jornalista sira esplika: “Ha’u mai ho ha’u-nia ekipa, hasoru malu ho S.E. Prezidente Repúblika para atu hato’o hela katak, ha’u-nia ekipa prepara ona programa ho kalendáriu hotu atividades ninian ne’ebé sei hala’o iha fulan-Abríl ne’e mai hamutuk ho ekipa S.E. Prezidente Taur Matan Ruak nian, para atu sira halo tranzisaun pasajen de testemuñu.”

Prezidente eleitu, Lu-Olo esplika liután katak, nia ekipa tranzisaun ne’ebé sei lidera hosi Sr. Francisco Vasconcelos ho tan ema na’in-sanulu (10) mak sei hahú serbisu iha Palásiu Prezidente Nicolau Lobato iha loron 13 fulan-Abril ne’e hodi prepara ba prosesu tranzisaun nian hamutuk ho ekipa hosi Xefe Estadu atuál nian.

Xefe Estadu eleitu mós kontente no elojia ho Xefe Estadu atuál nia hanoin ne’ebé hakarak tranzisaun ne’e la’o didi’ak.

“Señór Prezidente ko’alia ho muito atensaun hakarak tranzisaun ne’e di’ak liu mai ha’u-nia liman, ne’e S.E. Prezidente Taur ninian hanoin, no nia liafuan rasik, katak nia lakohi atu husik buat ne’ebé naksalak mai ha’u-nia liman, maibé nia hakarak ekipa rua ne’e servisu para bele fó tranzisaun ida-ne’e mai ha’u-nia liman labele ho sabraut, hanesan labele sala maibé tenke entrega buat loos, buat di’ak, ne’ebé ha’u kontente tebes wainhira Prezidente Repúblika ko’alia hanesan ne’e”, dehan Xefe Estadu eleitu hodi haktuir Xefe Estadu atuál nia liafuan.

Hola parte iha enkontru refere mak hanesan hosi parte Xefe Estadu atuál nian mak Xefe Casa Civil Interinu, Dr. Carlos Peloi dos Reis, no Xefe Casa Militar, Koronél José da Costa “Trix”, enkuantu hosi Xefe Estadu Eleitu nian, mak Dr. Francisco de Vasconcelos no Sr. Harold Maria Menezes Moucho.

Enkontru entre Xefe Estadu atuál ho Xefe Estadu eleitu la’o iha ambiente ne’ebé amigavel tebes.HOTU