S.E. PREZIDENTE TAUR MATAN RUAK, SIMU ONA PEDIDU REZIGNASAUN JUIS GUILHERMINO DA SILVA, NOMEIA ONA PREZIDENTE TRIBUNÁL REKURSU FOUN, JUIS DEOLINDO DOS SANTOS

by Media Team Posted on 26 views

Sua Exelénsia Prezidente Repúblika aprova ona pedidu rezignasaun ne’ebé mak Prezidente Tribunál Rekursu, Juis Guilhermino Silva, hato’o tanba razaun saúde. Iha okaziaun ida-ne’e, Prezidente Repúblika hato’o obrigadu ba serbisu ne’ebé Prezidente Tribunál Rekursu hala’o durante ninia mandatu hodi defende podér judisiál nia independénsia, promove juis sira-nia kondisaun profisionál no hasa’e Tribunál sira-nia kualidade, liuliu kualidade desizaun judisiál sira-nian.

Tribunál Rekursu hanesan instánsia judisiál boot liu Timor nian, ne’ebé kaer kompeténsia importante tebes hirak hodi fiskaliza konstitusionalidade lei sira-nian, foti desizaun kona-ba kazu judisiál hirak ne’ebé importante, balun inklui arguidu detidu ho natureza urjente no, tinan ida-ne’e, Tribunál Rekursu kaer hela kompeténsia lubuk ida ne’ebé fundamentál tebes relasiona ho prosesu eleisaun, tanba ne’e mak importante asegura ninia lala’ok regulár.

Sua Exelénsia Prezidente Repúblika, Taur Matan Ruak, nomeia tiha ona Juis Deolindo dos Santos ba hala’o knaar nu’udar Prezidente Tribunál Rekursu. Prezidente Tribunál Rekursu foun ne’e lisensiadu hosi Fakuldade Direitu Universidade Pattimura, Ambon, lndonézia. Nia hahú nia karreira nu’udar majistradu judisiál iha tinan 2000 no iha tinan 2011 kedas hetan nomeasaun ba Tribunál Rekursu,

Tomada pose sei hala’o iha sesta oinmai, 28 Abríl, tuku 9 dader.

Palasiu Prezidente Nicolau Lobato, 26 Abril 2017

 

 

Author

Media Team