S.E. PREZIDENTE TAUR MATAN RUAK ENTREGA SERTIFIKADU AGRADESIMENTU BA UMA-NA’IN NE’EBÉ OFERESE UMA HODI XEFE ESTADU DESKANSA DURANTE VIZITA SUKU

by Media Team Posted on 15 views

Dili, 27 Abríl, 2017 – Antes remata mandatu iha dia 20 Maiu, S.E. Prezidente Repúblika, Taur Matan Ruak, hato’o mós agradesimentu ba uma-na’in sira-ne’ebé maka oferese ona sira-nia uma ba Xefe Estadu hodi deskansa ba wainhira hala’o diálogu iha vizita suku hirak.

Iha serimónia hanesan, Xefe Estadu mós simbolikamente entrega sertifikadu agradesimentu nian ba reprezentante uma-na’in hamutuk sanulu (10) hosi uma-na’in 159 ne’ebé Xefe Estadu deskansa ba wainhira hala’o vizita ba suku 442 iha territóriu laran

Objetivu fó sertifikadu ba uma-na’in sira-ne’e, hanesan jestu agradesimentu sinseru husu Xefe Estadu nian ba família sira ne’ebé maka onestamente oferese ona sira-nia uma ba Xefe Estadu hodi deskansa wainhira hala’o vizita no diálogu iha suku hirak iha Timor-Leste tomak.

Hafoin entrega tiha sertifikadu agradesimentu, Xefe Estadu iha nia intervensaun hatete:

“Ha’u hakarak fó ha’u-nia agradesimentu sinseru ba família sira, inan-aman sira ne’ebé simu ha’u toba iha imi-nia uma. Ha’u horibainhira ba Marobo, iha família ida ke tanis, tanba uma sira-nian so ami na’in-rua ka tolu maka bele toba, sira seluk ne’ebé isin boot kama la serve ba sira, kama labarik sira-nian maka ami toba ba i família ne’e tanis loos hodi dehan, ‘ha’u nunka hanoin katak, Señór Prezidente bele mai toba iha ami-nia uma, ami-nia uma aat’. Nia tanis no halo ha’u sente loos. Ha’u dehan, ‘ne’e ba ha’u sorte, tanba ha’u tinan 24 uma la iha, toba ai-tahan leten, toba fatuk-kuak, ne’ebé ba ha’u sorte’. Ha’u-nia maluk sira-ne’ebé mate tiha ona ke la iha oportunidade atu mai toba iha mahon ida, tanba ne’e obrigadu barak ba Ita-Boot sira-nia ospitalidade, imi-nia domin hakarak simu ha’u.”

Xefe Estadu hatutan:

“Balu dehan, ‘Señór Prezidente, ami nunka hanoin atu mai toba iha ami-nia uma’. Ha’u mós nunka hanoin atu ba toba iha Ita-Boot sira-nia uma. Tanba ne’e, ha’u lori ha’u-nia kaben, ha’u-nia oan sira, hakarak agradese imi (uma-na’in).”

Xefe Estadu hatutan liután nia sentimentu orgullu no privilejiadu bele sai Xefe Estadu hodi iha oportunidade vizita suku sira iha territóriu laran para haree realidade moris povu nian iha baze no ko’alia ho governu atu bele halo esforsu hodi tau atensaun realidade ne’ebé deskobre, no preokupasaun hirak ne’ebé povu hato’o ona.

Nune’e, Xefe Estadu hatutan:

“Ha’u iha priviléjiu Ita-Boot sira hili ha’u para tau matan ba ita-nia nasaun durante tinan liman nia laran, ha’u hakarak halo liután, mas la konsege, no uitoan ne’ebé ha’u halo, halo ho fuan, halo ho domin tomak, tanba ne’e obrigadu ba imi hotu, i transmite ba imi-nia família no kolegas hotu katak, ita la iha dalan seluk, dalan mesak de’it maka moris-di’ak. Ita-nia matebian ne’ebé mate nia klamar sei kontente, tanba ita serbisu maka’as atu hadi’ak futuru ida di’ak liu hodi husik hela ba ita-nia oan sira.

Molok remata, Xefe Estadu mós aproveita hato’o mós agradesimentu ba liñas ministeriais Governu nian ne’ebé fó ona apoiu ba Xefe Estadu nia vizita hodi bele hetan susesu, liuliu SEPFOPE no Obras Públikas ne’ebé konsege loke estrada rurál ba suku sira-ne’ebé durante Xefe Estadu vizita la iha asesu estrada.

Xefe Estadu-Maiór Jenerál, Lere Anan Timur, membru korpu diplomátiku balun, Xefe-Suku sira no uma-na’in sira, inklui bainaka sira seluk mós partisipa ho entuziazmu tebes hodi akompaña programa to’o hotu.

Notas:

Durante vizita Xefe Estadu nian ba suku 442 iha territóriu laran, Xefe Estadu konsege toba iha komunidade nia uma hamutuk 159 resin, toba iha salaun eskola 8, Sede Suku no Uma PNDS 15, Postu Saúde 3, propriedade relijioza sira-nian 17, no Uma bainaka komunitária (guesthouse) 15.

HOTU

Author

Media Team