S.E. PREZIDENTE TAUR MATAN RUAK FÓ SERTIFIKADUAGRADESIMENTU BA BAINAKA ESPESIÁL NE’EBÉ AKOMPAÑA NIA VIZITA BA SUKU SIRA

by Media Team Posted on 22 views

Dili, 27 Abril 2017 – Antes atu remata mandatu hanesan Xefe Estadu iha loron 20 fulan-Maiu mai ne’e, S.E. Prezidente Repúblika, Taur Matan Ruak, hato’o nia agradesimentu ba Administradór Postu no Xefe-suku sira ne’ebé akompaña ona hanesan bainaka espesiál iha Xefe Estadu Nia vizita ba iha suku hirak iha Timor-Leste laran tomak.

Iha serimónia ne’ebé maka hala’o iha kinta-feira ne’e, Xefe Estadu entrega diretamente sertifikadu

agradesimentu nian ba Administradór Postu no Xefe-Suku sira ne’ebé akompaña ona nia hanesan bainaka espesiál durante vizita suku 442 sira iha Timor-Leste tomak.

Objetivu fó sertifikadu ne’e, hanesan jestu agradesimentu Xefe Estadu nian ba Administradór Postu no Xefe-suku sira ne’ebé hatudu sira-nia disponibilidade hodi bainaka espesiál no akompaña vizita Xefe Estadu iha ba suku hirak. Administradór Postu no Xefe-Suku sira mós hetan esperiénsia ida hodi halo komparasaun no mós referénsia ba nivel realizasaun no preokupasaun dezenvolvimentu ne’ebé maka akontese iha sira-nia postu administrativu no suku ho postu administrativu no suku sira seluk.

Hafoin entrega tiha sertifikadu agradesimentu, Xefe Estadu hatete:

“Ita-Boot sira [Administradór Postu no Xefe-Suku-red] ba haree fatin ida ba fatin seluk hodi hetan ideia ida atu halo nu’usá maka ita motiva ita-nia sidadaun sira hakat tuir hanesan sira seluk halo. Ita la bá halo estudu komparativu iha nasaun li’ur kuandu ita mós iha esperiénsia di’ak iha ita-nia rain rasik. Entaun, Ita-Boot sira-nia esforsu no sakrifísiu atu akompaña para haree realidade no sente katak iha realidade seluk ke hanesan imi-nian, ou di’ak liu imi-nian i bele hili buat hirak di’ak liu Ita-Boot sira-nian para hatutan. Ne’e buat ida pozitivu tebes ba ita-nia nasaun.”

 Xefe Estadu hatutan:

“Kuandu ita bá haree realidade seluk, ita-nia vizaun boot liután, ita bele estabelese komparasaun i bele haree saida maka ita bele halo, saida mak labele halo, i oinsá maka bele halo? Entaun, objetivu maka ida-ne’e, lori Ita-Boot sira atu se bele karik bele banati tuir buat ne’ebé di’ak, aprende ho buat ne’ebé sala, para labele repete. Maibé, aprende mós, liuliu buat ne’ebé di’ak hodi halo di’ak liután.”

Xefe Estadu esplika, maski iha difikuldade oioin iha vizita ba suku, tanba suku balu tenke la’o ain oras ba oras, no fasilidade toba nian mós susar. Maibé, bainaka sira-ne’e iha vontade tebes hodi hakarak akompaña Xefe Estadu no aprende hodi haree realidade postu administrativu no suku seluk nian.

La haluha iha biban refere, Xefe Estadu hato’o mós nia agradesimentu ba família sira ne’ebé maka hatudu sira-nia disponibilidade hodi oferese ona sira-nia uma ba Administradór Postu no Xefe-Suku sira hodi deskansa kalan.

Notas:

Durante vizita Xefe Estadu nian ba suku 442 iha territóriu laran, Xefe Estadu konsege konvida Administradór Postu no Xefe-Suku sira hamutuk na’in-90 resin hanesan nia bainaka espesiál hodi akompaña vizita ba suku sira.

Xefe Estadu-Maiór Jenerál, Lere Anan Timur, Korpu Diplomátiku balun, Xefe-Suku sira no uma-na’in sira, inklui bainaka sira seluk mós partisipa ho entuziazmu tebes hodi akompaña programa to’o hotu.HOTU

Author

Media Team