DISKURSU SUA EXELÉNSIA PREZIDENTE REPÚBLIKA, TAUR MATAN RUAK, IHA SERIMÓNIA TOMADA POSE BA PREZIDENTE TRIBUNÁL REKURSU, JUIS DEOLINDO DOS SANTOS  

by Media Team Posted on

 

Señór Prezidente Parlamentu Nasionál, Exelénsia,

Señór Prezidente Tribunál Rekursu, Exelénsia,

Señór Primeiru Ministru, Exelénsia,

Señora no Señór Ministru no Sekretáriu Estadu sira,

Señora no señór Deputadu sira,

Señór Prokuradór-Jerál Repúblika,

Señora no Señór Meritísimu Majistradu Judisiál sira no Ministériu Públiku nian,

Señór Defensór Públiku Jerál,

Exelénsias,

 Señoras no señores,

 Onra boot ida mai ha’u atu observa katak nomeasaun ba reprezentante aas liu podér judisiál Timór nian nu’udar ezemplu di’ak ida hosi instituisaun demokrátika sira-nia lala’ok regulár.

Prezidente Tribunál Rekursu nia substituisaun iha kondisaun estabilidade nia laran hatudu ita-nia relasaun institusionál nia maturidade demokrátika, liutiha tinan 15 dezde restaurasaun independénsia.

 Podér judisiál ida ne’ebé Forte, Independente no ho Kapasidade, hanesan kondisaun esensiál atu harii Estadu Direitu Demokrátiku tuir Konstituisaun haruka no ne’ebé ita luta ba durante tinan barak nia laran. Ita-nia vizaun kona-ba Estadu independente ida, ne’ebé sai matadalan ba ita-nia luta ba libertasaun nasionál no ema barak lakon sira-nia vida ba, hanesan mós vizaun ida kona-ba Estadu ida ne’ebé Justu no ne’ebé respeita sidadaun sira-nia Direitu sira iha kondisaun igualdade.

Realizasaun ba mehi hirak-ne’e mak ita ohin selebra ho nomeasaun ba Prezidente Tribunál Rekursu foun.

 Iha oportunidade ida-ne’e ha’u hakarak aproveita atu hato’o liafuan agradesimentu ba Juis Guilhermino da Silva ne’ebé mak ohin ramata nia knaar nu’udar Prezidente Tribunál Rekursu. Mandatu ne’ebé mak ohin remata hanesan ezemplu ida kona-ba izensaun, dignidade no aten-barani hodi defende Tribunál sira-nia independénsia, juis sira-nia kondisaun profisionál no Tribunál sira-nia kualidade.

Ha’u hein katak ninia ezemplu sei fó forsa ba joven majistradu sira Nasaun nian.

 Ha’u fiar katak Prezidente Tribunál Rekursu foun sei bele hatán ba dezafiu sira-ne’ebé Tribunál Rekursu sei enfrenta hela, liuliu sira-ne’ebé urjente liu.

Instituisaun demokrátika sira-nia lala’ok regulár hanesan responsabilidade mahuluk Prezidente Repúblika nian iha tempu pás nia laran. Nune’e, nia labele halai hosi ninia responsabilidade sira to’o nia mandatu nia loron ikus. Tribunál Rekursu tenke serbisu loroloron no oras ne’e daudaun nia enfrenta hela dezafiu lubuk ida ne’ebé importante ba ita hotu, hanesan fiskalizasaun preventiva ba konstitusionalidade Lei sira-nian, desizaun kona-ba rekursu sira-ne’ebé urjente ho arguidu detidu no kompeténsia eleitorál iha tinan ida-ne’e ne’ebé espesiál tebetebes.

 Juis Deolindo dos Santos majistradu ida ne’ebé iha esperiénsia naruk no karreira ida ne’ebé distintu. Ita fó ona ita-nia konfiansa tomak ba nia atu kaer órgaun soberania ida-ne’e, ne’ebé tenke independente hosi kontrolu Estadu nian nu’udar garantia ba sidadaun sira-nia direitu sira no ita-nia moris iha sosiedade nia lala’ok regulár.

 Justisa ida ne’ebé loroloron funsiona ba ita-nia sidadaun sira hanesan fatór importante tebetebes ida atu nune’e ema HOTU-HOTU bele rekoñese asaun Estadu nia laran-luak.

Ida-ne’e mós fatór importante tebetebes ida ba ita-nia dezenvolvimentu. Hodi dada mai investimentu hosi rai-li’ur, fundamentál tebes ita fó garantia kona-ba sistema justisa ida n’ebé funsiona duni. Sira-ne’ebé hakarak investe sira-nia osan iha ita-nia ekonomia presiza la’ós de’it estrada ka infraestrutura seluseluk maibé presiza mós Justisa ida ne’ebé la’o.

 Atu Justisa bele la’o, ita presiza luta ba independénsia judisiál. Ha’u fiar katak Tribunál sira, liuliu Prezidente Tribunál Rekursu foun, hatene oinsá atu defende garantia murak liu hosi ninia lala’ok izentu, imparsiál no ikusmai justu.

Independénsia judisiál hanesan impozisaun konstitusionál ida ne’ebé ITA HOTU tenke kumpre no respeita tanba ida-ne’e mak solusaun di’ak liu ba Estadu nia lala’ok. Lahó ta’uk ita tenke husik Ministériu Públiku halo investigasaun, husik Advogadu no Defensór Públiku sira halo defeza no husik mós Juis sira foti desizaun. Sira foti tiha desizaun karik, ita tenke simu no halo tuir sira-nia desizaun! Ne’e mak Justisa nia lala’ok normál ne’ebé ita tenke promove.

 Sei iha buat barak atu halo hodi hadi’ak setór Justisa.

Ita presiza hadi’ak infraestrutura sira hodi investe iha kualidade edifísiu sira-ne’ebé sai serbisu-fatin ba tribunál sira, Ministériu Públiku no mós ba setór apoiu ba Justisa seluseluk.

Importante mós ita investe iha ema.

Ita presiza hadi’ak operadór judisiál hotu-hotu nia kualifikasaun hodi investe iha formasaun ho permanente. Tanba ne’e mak ita presiza investe iha ensinu no formasaun iha ita-nia Universidade sira, inklui mós iha Sentru Formasaun Jurídika no Judisiária. Ita presiza mós asegura, iha ne’ebé nesesáriu, apoiu internasionál ba hanorin ita-nia foin-sa’e sira, no fó formasaun no akompaña ita-nia juis sira hodi kria kondisaun estabilidade ba juis internasionál sira ne’ebé kualifikadu no esperiente atu hala’o knaar.

 Presiza mós investe maka’as liután iha Lei sira-nia kualidade hodi buka solusaun hirak ne’ebé di’ak liu nu’udar matadalan ba ita-nia sidadaun sira-nia moris. Ita-nia Lei sira tenke simples, fasil atu implementa no tuir ita-nia realidade. Sira tenke foka liu ba rezolve ita-nia sidadaun sira-nia problema no labele hamosu problema ba operadór jurídiku sira durante prosesu implementasaun.

Diagnóstiku ida-ne’e halo tiha kleur ona. Tempu to’o ona atu sira-ne’ebé responsavel ba halo lei komesa book an.

 Organizasaun judisiária ne’ebé mak prevee iha Konstituisaun hodi aprova lei sira-ne’ebé sei pendente sei iha prosesu hela.

Seidauk harii Supremu Tribunál Justisa ho Tribunál Administrativu no Tributáriu sira nu’udar kondisaun importante tebetebes ida hodi bele harii Estadu Direitu Demokrátiku iha ita-nia leet.

 Fundamentál katak Kámara Kontas Tribunál Rekursu nian bele asegura kontrolu ne’ebé efetivu ba despeza Estadu nian, hodi fila fali ba limite sira-ne’ebé prevee nanis kedas molok revizaun 2013 nian.

 Seidauk halo mós artikulasaun ne’ebé di’ak entre “Justisa Tradisionál” no desizaun sira-ne’ebé foti iha ámbitu justisa formál Estadu nian. Ita labele haluha importánsia estrutura tradisionál nian hodi rezolve konflitu, liuliu ninia potensiál boot atu harii pás sosiál, ne’ebé nasaun seluseluk maski dezenvolvidu ona buka halo tuir. Maski nune’e, realidade tradisionál hirak-ne’e labele la’o hasoru Estadu nia autoridade no unidade.

 Tribunál sira tenke implementa iha territóriu nasionál tomak no asegura kobertura hale’u Timór laran tomak hodi garante asesu sidadaun hotu-hotu nian ba Direitu ho Tribunál sira.

 Investimentu iha justisa nu’udar kondisaun atu luta hasoru problema boot liu ida ne’ebé afeta hela ita-nia sosiedade, katak korrupsaun. Luta hasoru korrupsaun envolve meius Estadu hotu-hotu, inklui mós sidadaun hotu-hotu. Ita presiza haree filafali lei sira karik nesesáriu, maibé importante liu maka ita fó meius ba sira-ne’ebé implementa lei sira-ne’e, respeita prokuradór ho juis sira-nia autonomia no kumpre desizaun ne’ebé sira foti. Atu luta hasoru korrupsaun presiza mós muda mentalidade sidadaun, Administrasaun Públika no titulár kargu polítiku sira-nian. Ita hotu iha papél ida atu hala’o iha luta foun ne’e.

 Aktu ne’ebé ita ohin kumpre mak aktu signifikativu liu ida hosi ita-nia ordenamentu konstitusionál. Investimentu iha Justisa mak investimentu ida ne’ebé sei fó retornu. Nune’e, ha’u hakotu hodi hato’o ha’u-nia votus susesu ba Prezidente Tribunál Rekursu foun. Susesu hosi Prezidente Tribunál Rekursu nia mandatu mak sei sai susesu ita hotu nian.

PALÁSIU PREZIDENSIÁL NICOLAU LOBATO, 28 ABRÍL, 2017