DISKURSU SUA EXELÉNSIA PREZIDENTE REPÚBLIKA, TAUR MATAN RUAK, IHA SERIMÓNIA TOMADA POSE BA PROKURADÓR JERÁL REPÚBLIKA, DR. JOSÉ DA COSTA XIMENES, HAFOIN RONA TIHA GOVERNU  

by Media Team Posted on

 

Señór Prezidente Parlamentu Nasionál, Exelénsia,

Señór Prezidente Tribunál Rekursu, Exelénsia,

Señór Primeiru Ministru, Exelénsia,

Señora no Señór Ministru no Sekretáriu Estadu sira,

Señora no señór Deputadu sira,

Señór Prokuradór-Jerál Repúblika,

Señora no Señór Meritísimu Majistradu Judisiál sira no Ministériu Públiku nian,

Señór Defensór Públiku Jerál,

Exelénsias,

Señoras no señores,

Prokuradór Jerál Repúblika nia tomada pose, ne’ebé mak ita ohin komemora, hanesan selebrasaun ba afirmasaun Estadu Direitu Demokrátiku nian, ne’ebé sai fali ita-nia objetivu nasionál hafoin restaurasaun independénsia.

Objetivu hirak-ne’e la’ós fasil liu duké objetivu ida-ne’ebé sai matadalan ba ita-nia luta ba libertasaun nasionál no ezije nafatin buat barak hosi ita. Atu harii Estadu ida ne’ebé bele hatán ba ita-nia Povu nia aspirasaun ezije sakrifísiu, determinasaun no laran tomak, hanesan akontese mós ho luta ba direitu ba ita-nia Povu nia autodeterminasaun.

Ita halo justisa hodi Povu nia naran tanba Povu mak kaer soberania, no Estadu nia kbiit Povu mak fó.

Ministériu Públiku mós partisipa iha ezersísiu justisa lori Povu nia naran no hodi reprezenta Povu nia interese sira. Ita-nia Konstituisaun hahú hodi temi kona-ba Prinsípiu Estadu Direitu no Soberania Populár nian, no Ministériu Públiku rasik hanesan pilár importante liu ida iha prosesu harii Estadu ida ne’ebé Justu, hakru’uk ba Lei ho Direitu.

Hafoin liu tinan 15, Ministériu Públiku nia asaun bele sukat bazeia ba knaar ne’ebé mak nia hala’o iha komunidade nia moris, tuir Konstituisaun haruka, ho kompeténsia atu kaer metin legalidade demokrátika no promove banati tuir lei, reprezenta Estadu, hala’o asaun penál no defende labarik sira, ema ne’ebé la iha no inkapasitadu sira.

Prosesu harii ita-nia Nasaun ne’ebé independente, dezenvolvimentu ita-nia país nian no kompleksidade ne’ebé boot ba ita-nia
moris iha sosiedade hamosu dezafiu lubuk ida ba Ministériu Públiku ne’ebé importante no susar ba beibeik.

Globalizasaun hamosu dezafiu kriminál foun hirak ne’ebé Ministériu Públiku presiza hatán ba: krime kadavés kompleksu liután, ninia rekursus sai barak ba beibeik, ho ligasaun iha mundu tomak, presiza de’it komputadór, ne’ebé mak hasusar ninia prevensaun no kombate.

Luta hasoru korrupsaun kontinua sai nu’udar preokupasaun ita hotu nian atu bele promove distribuisaun ida ne’ebé di’ak liu ba rikusoin nasionál entre ita-nia sidadaun sira, hodi tau matan ba ema kbiit-laek sira. Serbisu hirak-ne’e ezije Ita hotu nia kolaborasaun ho Ministériu Públiku hodi kria kultura sivizmu ida no halo denúnsia ba tentativa korrupsaun ne’ebé de’it.

Mezmu iha reprezentasaun Estadu, dezafiu sira-ne’ebé hetan iha dezenvolvimentu Estadu kadavés ezije liu hosi Ministériu Públiku.

Hodi bele hasoru dezafiu foun sira-ne’e, Ministériu Públiku presiza meius ne’ebé adekuadu hodi hala’o ninia misaun. Kapasitasaun ba Prokuradór sira Ministériu Públiku nian, liuliu formasaun ba Majistradu no funsionáriu sira, hanesan serbisu ida ne’ebé lapara. Investimentu iha rekursus ne’ebé disponivel ba Ministériu Públiku atu uza hodi hala’o investigasaun kriminál no mós iha infraestrutura hodi bele hala’o nia kompeténsia sira, mós hanesan serbisu permanente ida.

Polísia ho órgaun investigasaun kriminál seluseluk la iha meius ne’ebé adekuadu hodi hala’o ninia atividade prevensaun, investigasaun no represaun kriminál.

Hodi fasilita objetivu ida-ne’e, fundamentál katak ita bele konta ho operadór judisiáriu sira atu halo lei ne’ebé klaru, ne’ebé la hamosu dúvida kona-ba ninia aplikasaun no bele rezolve ita-nia sidadaun sira-nia problema reál. Ministériu Públiku nia atuasaun sei la serve karik juis sira labele hatán ba Povu nia halerik ba Justisa ho razaun tan de’it lei sira ladún klaru.

Hamutuk ho meiu materiál sira, ita hotu tenke promove kondisaun sira independénsia no autonomia Ministériu Públiku nian atu
bele kumpre ninia misaun. Ministériu Públiku nia independénsia nu’udar imperativu Konstitusionál ida tanba lahó Ministériu Públiku ida ne’ebé independente duni hosi podér polítiku no interese privadu mak la iha podér judisiál ida ne’ebé independente, no bele tau iha kauza Estadu Direitu rasik ho Demokrasia.

Iha lia-maklokek ba livru komemorasaun ba aniversáriu Ministériu Públiku nian ba dala 15, ha’u dehan katak “eroi foun konstrusaun Estadu nian mak ita-nia maluk sidadaun sira ne’ebé loroloron fó sira-nia moris tomak, pesoál, profisionál no sosiál, atu hadi’ak ita-nia Povu nia kondisaun moris”.

Ida-ne’e mak dezafiu ne’ebé ha’u koloka nafatin ba ema hotu-hotu. Resposta ida ne’ebé afirmativu mak sei bele loke dalan atu realiza buat hirak ne’ebé ita-nia luta ba independénsia nasionál promete ba ita. Ha’u fiar katak ha’u bele konta ho apoiu ema hotu-hotu nian, liuliu Sr. Prokuradór Jerál Repúblika ne’ebé mak ohin toma pose, hodi hatán ba dezafiu hirak-ne’e.

Dr. José da Costa Ximenes hatudu dezempeñu di’ak tebetebes durante hala’o knaar nu’udar Prokuradór Jerál Repúblika, hodi hala’o ninia kompeténsia konstitusionál no legál sira ho izensaun, imparsialidade no lideransa hakmatek ida iha Ministériu Públiku. Dala ida tan ha’u hato’o ha’u-nia votus susesu ba Sr. Prokuradór Jerál Repúblika nia mandatu foun ne’e, ne’ebé sei sai susesu ita hotu nian mós.

PALÁSIU PREZIDENSIÁL NICOLAU LOBATO, 28 ABRÍL, 2017