KOMUNIKADU IMPRENSA : PREZIDENTE REPÚBLIKA MARKA ONA DATA ELEISAUN LEJIZLATIVA BA LORON 22 FULAN-JULLU

by Media Team Posted on 38 views

Sua Exelénsia Prezidente Repúblika, Taur Matan Ruak, marka ona data eleisaun lejizlativa nian ba iha loron 22 fulan-Jullu tinan 2017.

Hafoin restaura tiha Tribunál Rekursu nia kompozisaun hodi bele hala’o nia kompeténsia legál sira relasiona ho prosesu eleitorál, karik presiza, no depoiz de remata tiha prazu ba Tribunál Rekursu atu hato’o paresér kona-ba Lei Eleitorál ba Parlamentu Nasionál, Prezidente Repúblika deside atu marka loron eleisaun lejizlativa, tanba konsidera katak nia iha obrigasaun atu asegura lala’ok regulár instituisaun demokrátika sira-nian to’o nia mandatu nia rohan no mós katak labele atraza tan markasaun ba eleisaun tanba bele afeta ba kalendáriu eleitorál.

Prezidente Repúblika hein katak atividade hotu-hotu ne’ebé mak envolve iha prosesu eleisaun ba Parlamentu Nasionál, inklui resenseamentu, hatama kandidatura, halo kampaña, vota, fó sai rezultadu eleitorál no konstitui Parlamentu Nasionál no Governu foun, sei la’o ho livre, justu no hakmatek, atu nune’e prosesu eleisaun hirak-ne’e bele sai festa Demokrasia ida tan.

Palasiu Prezidente Nicolau Lobato, 2 Maiu 2017

 

Author

Media Team