KOMUNIKADU IMPRENSA : PREZIDENTE REPÚBLIKA PROMULGA TIHA ONA LEI ELEITORÁL BA PARLAMENTU NASIONÁL ATU NUNE’E ELEISAUN PARLAMENTÁR BELE LA’O HO HAKMATEK, MASKI SEI IHA DÚVIDAS KONA-BA NORMA BALUN

by Media Team Posted on

Sua Exelénsia Prezidente Repúblika, Taur Matan Ruak ohin promulga ona alterasaun ba Lei Eleitorál ba Parlamentu Nasionál atu nune’e eleisaun parlamentár bele la’o ho hakmatek, maski nia sei iha nafatin dúvidas kona-ba solusaun balun ne’ebé mak temi iha lei refere.

Iha nia mensajen ba Parlamentu Nasionál hodi akompaña promulgasaun, Prezidente Repúblika dehan katak nia la konkorda ho opsaun atu hakotu mandatu deputadu sira-nian ne’ebé la halo tuir regras dixiplina partidária, no di’ak liu promove Demokrasia nia lala’ok saudavel hodi asegura kontraditóriu nu’udar meius ida atu hetan solusaun hirak ne’ebé di’ak liu ba ita-nia destinu koletivu. Nune’e mós, Prezidente fiar katak previzaun ba tipu krime foun ida ne’ebé bolu dehan “uza sala sigla ka símbolu” bele limita kampaña eleitorál sira-nia kualidade. Ikusmai, Prezidente Repúblika afirma dala ida tan katak nia prefere solusaun ida ne’ebé bele hametin CNE nia podér regulamentár sira hodi defende ninia independénsia iha supervizaun ba aktu eleitorál sira.

Molok atu hakotu, Prezidente Repúblika, Taur Matan Ruak refere katak asegura instituisaun demokrátika sira-nia lala’ok regulár maka Prezidente Repúblika nia obrigasaun dahuluk iha tempu dame nian no espera katak eleisaun parlamentár oinmai sei la’o ho hakmatek, livre no justu hodi bele sai festa Demokrasia ida tan.

Palasiu Prezidente Nicolau Lobato, 5 Maiu 2017

 

Leave a Reply

Your email address will not be published. Required fields are marked *