LIAFUAN BADAK HOSI S.E. PREZIDENTE TAUR MATAN RUAK IHA OKAZIAUN ATRIBUISAUN ORDEM TIMOR-LESTE BA SERVIDÓR DISTINTU SIRA ESTADU NIAN

by Media Team Posted on

Dili, loron 5 fulan-Maiu tinan 2017

Ha’u agradese ba servisu importante sira mak responsável aas sira ne’ebé hetan kondekorasaun ohin ho Ordem Timor-Leste, hato’o ba nasaun iha lala’ok ba sira-nia funsaun oin-oin, iha tempu naruk no esperiénsia.

Kualidade pesoál no profisionál sira-ne’ebé hatudu iha lala’ok ba sira-nia responsabilidade públika, sai nu’udar ezemplu servisu sira-ne’ebé notável. Buat sira-ne’e bele hetan admirasaun no sai nu’udar ezemplu hosi parte kuadru sira nian ho responsabilidade iha Administrasaun públika, ba nível sira hotu-hotu.

Iha lideransa ba orgaun sira soberania nian—Governu, Parlamentu Nasionál no Tribunál Rekursu—no mós hanesan ho instituisaun fundamentál ida seluk ba Estadu Direitu—Prokuradoria-Jerál Repúblika—no iha instituisaun sira Defeza no Seguransa nian—Falintil-FDTL no PNTL—servisu sira-ne’ebé hato’o ne’e, sai estraordinariamente importante no fó-onra ba instituisaun sira no ba Nasaun.

Kondekoradu sira-ne’e, iha kazu barak, hala’o ona servisu públiku distintu molok funsaun sira-ne’ebé sira dezempeña tiha ona ka dezempeña to’o iha tempu ikus ne’e. Iha kazu sira oin-oin, sira hato’o tiha ona servisu ba Timor no ba timoroan sira, dezde antes Restaurasaun Independénsia.

Maibé, ha’u hakarak iha momentu ida-ne’e, foka ho maneira espesiál, ba sira-nia kontribuisaun importante iha kultura kolaborasaun leál ida entre orgaun soberania sira no solidaridade entre instituisaun sira Estadu nian, ne’ebé hotu-hotu hatudu durante ha’u-nia mandatu hanesan Prezidente Repúblika.

Iha tinan lima ikus ne’e, Ita-Boot sira serbisu ho leál hamutuk ho Prezidente Repúblika, sempre iha respeitu absolutu ba separasaun poder no responsabilidade hosi instituisaun sira ida-idak.

Relasaun institusionál sira-ne’e kontribui ba iha konsolidasaun no funsionamentu di’ak Estadu Timor-Leste nian.

Konsolidasaun ba kultura kolaborasaun entre orgaun soberania nian sira-ne’e, no mós solidaridade entre instituisaun sira, sai nu’udar sinál maturidade ida Estadu nian, ne’ebé halo ha’u iha laran haksolok tebes. Postura ezersísiu ba kargu aas sira Nasaun nian reflete preokupasaun—sai komun tiha ona ba ita hotu—no mós importánsia ne’ebé ita atribui ba prezervasaun atu hametin estabilidade no prioridade ba dezenvolvimentu Nasaun nian.

Kualidade pesoál no profisionál no konsideraaun ne’ebé Ita-Boot sira sempre hatudu ba interese públiku no ba importánsia atu reforsa instituisaun sira, sai nu’udar kontributu ho interese ne’ebé boot liuhotu ba iha konsolidasaun Estadu no ba aperfeisoamentu Demokrasia Timor-Leste nian.

Tanba razaun sira-ne’e mós mak ha’u manifesta ha’u-nia rekoñesimentu no apresu boot ba titulár sira orgaun soberania nian, ne’ebé agrasiadu:

Parlamentu Nasionál, ne’ebé reprezenta hosi nia prezidente, Señor Adérito Hugo da Costa, no mós ninia eis-prezidente, Señor Vicente da Silva Guterres;

Tribunál Rekursu, liuhosi ninia eis-prezidente, Señor Dr. Guilhermino da Silva;

Governu, liuhosi Señor Primeiru-Ministru Dr. Rui Maria de Araújo, titulár ne’ebé ha’u serbisu ho direta liu no regularmente iha tinan lima ikus ne’e, no ne’ebé ha’u agradese tanba kolaborasaun tomak ne’ebé ha’u hetan mós hosi parte membru Governu nian sira hotu.

Ha’u-nia rekoñesimentu, ne’ebé reprezenta hosi Prokuradór-Jerál Repúblika, Señor Dr. José da Costa Ximenes, hato’o ba iha lideransa ida-ne’ebé jere tiha ona instituisaun guardiaun atu iha respeitu ba legalidade demokrátika.

Ikus liu, ha’u hato’o rekoñesimentu ba Segundu Komandante PNTL nian, señor Komisáriu Faustino da Costa, no ba ha’u-nia kamarada sira funu nian durante tinan barak, señor Brigadeiru-Jenerál Filomeno Paixão no Koronel Falur Rate Laek.

Kapasidade aas atu hala’o servisu hosi responsável sira-ne’e no koñesimentu klean ba instituisaun respetivu sira, inspira respeitu no konfiansa hosi ema hotu sira-ne’ebé serbisu hamutuk ho sira no mós hosi nasaun. Solidaridade entre instituisaun sira Seguransa no Defeza nian no kolaborasaun leál ho Prezidente Repúblika—no mós ho autoridade sivil sira hotu—sai nu’udar fatór sira ba konsolidasaun Estadu demokrátiku.

Importante atu repete mós katak, nu’udar sinál maturidade boot hosi timoroan sira no hosi instituisaun polítik sira-ne’ebé ita kria, foin de’it iha tinan 15 nia laran, atu tau moris di’ak povu Timor-Leste nian iha ita-nia neon no vontade boot tebes atu hak’iak pás iha ita-nia fuan-laran.

Obrigadu barak ba Ita-Boot sira. Kmanek wa’in.