S.E. PREZIDENTE TAUR MATAN RUAK FÓ ENTREGA PRÉMIU BA MANAN-NA’IN PRÉMIU NUTRISAUN LIDERANSA NASIONÁL NO FAMÍILIA SAUDAVEL  

by Media Team Posted on 14 views

Dili, 27 Abríl, 2017 –S.E. Prezidente Repúblika, Taur Matan Ruak, iha kinta-feira semana ne’e, entrega Prémiu Nutrisaun kategoria Lideransa Nasionál ba manán-na’in hosi Suku Bahamori Postu Administrativu Venilale, munisípiu Baucau ba edisaun tinan 2017, no kategoria Família Saudavel ba Grupu Feto Hafuco hosi Suku Triloca, Munisípiu Baucau.

Wainhira hato’o nia intervensaun, Xefe Estadu hatete katak, prémiu refere tenke sai hanesan motivasaun ba Suku no grupu feto sira atu serbisu badinas liután atu iha kompetitividade entre suku no grupu feto atu oinsá hadi’ak nutrisaun iha rai-laran, liuliu iha suku no grupu laran. Tanba, informa mós katak, nutrisaun sai hanesan problema boot ida iha Timor-Leste.

Xefe Estadu dehan:

“Ita fó prémiu ba sira-ne’ebé halo esforsu atu hadi’ak ka kombate malnutrisaun iha ita-nia rain. Prémiu ida-ne’e valoriza Ita-Boot sira-nia serbisu no hatete ba sira seluk katak, karik Ita-Boot sira serbisu hanesan ne’e, Ita-Boot sira sei hetan prémiu. Valoriza Ita-Boot sira-nia jestu hirak atu halonu’usá maka serbisu ba imi-nia komunidade rasik.”

Xefe Estadu mós fiar katak, Prezidente Repúblika foun sei hatutan programa ida-ne’e, tanba programa refere iha impaktu ne’ebé pozitivu atu muda komunidade nia moris iha baze em relasaun ho nutrisaun.

“Ha’u fiar katak ita-nia Prezidente ne’ebé sei troka ha’u loron hirak mai, sei kontinua nafatin ida-ne’e. Tanba, ha’u gosta, ita hotu gosta programa ida-ne’e atu hala’o nafatin, em parseria ho komunidade internasionál nian, Governu, Prezidénsia Repúblika, liuliu ho komunidade, Amu-Liurai sira, Amu-Administradór sira atu nune’e ita bele kombate inimigu boot ida-ne’e iha ita-nia nasaun. Ha’u fiar katak, ita sei manán, maibé ita so manán se ita badinas, se ita serbisu hamutuk, se ita valoriza hahalok ki’ikoan sira-ne’e”, Xefe Estadu hatutan.

Xefe Estadu mós hato’o liután agradesimentu wain ba Governu Austrália liuhosi nia Embaixada iha Dili, Uniaun Europeia ne’ebé fó ona sira-nia apoiu finanseira atu ikusmai programa ne’e bele realiza no la’o susesu.

La haluha, Xefe Estadu hato’o mós agradesimentu ba ekipa juri hosi liñas Ministeriais no Universidade Nasionál Timor Lorosa’e, UNTL ne’ebé fó ona valór ba suku lima no grupu feto lima ne’ebé tama lista badak.

Suku no grupu feto manán-na’in ba Prémiu Nutrisaun Lideransa Nasionál maka Suku Bahamori, Postu Administrativu Venilale, no Grupu Feto Hafuco husi Suku Triloca, Postu Administrativu Baucau Villa, husi Munisípiu Baucau hotu. Prémiu ne’ebé Suku Bahamori no Grupu Feto Hafuco manán iha valór osan hamutuk US$10.000.

S.E. Prezidente Repúblika, Taur Matan Ruak, maka foti inisiativa ba kompetisaun Prémiu Nutrisaun Lideransa Nasionál no Família Saudavel ne’ebé hahú iha tinan 2013 no hetan parseria husi Governu Austrália no Uniaun Europeia.

Objetivu husi kompetisaun ne’e maka atu hamosu espíritu no inisiativa entre suku no grupu feto iha Timor-Leste laran tomak atu kompete no kontribui ba luta atu hamenus malnutrisaun iha Timor-Leste laran tomak, liuliu fó korajen ba grupu feto sira atu iha kriatividade atu hadi’ak liután kualidade ai-han lokál iha komunidade sira-nia leet atu kontribui ba melloramentu nutrisaun iha nivel komunidade nian.

Tuir loloos serimónia fahe prémiu ne’e hala’o iha okaziaun loron Restaurasaun Independénsia no loron Proklamasaun Independénsia. Maibé, Xefe Estadu hakarak fó iha loron 27 fulan-Abríl ne’e, tanba Xefe Estadu sei remata nia mandatu iha loron 20 fulan-Maiu.HOTU

Author

Media Team