S.E. PREZIDENTE, TAUR MATAN RUAK, FÓ POSE BA PREZIDENTE TRIBUNÁL REKURSU FOUN NO RE-POSE PROKURADÓR JERÁL REPÚBLIKA

by Media Team Posted on

Dili, 2 Maiu, 2017 – S.E. Prezidente Repúblika, Taur Matan Ruak, iha sesta-feira semana kotuk, iha Palásiu Prezidente Nicolau Lobato, fó pose ba Prezidente Tribunál Rekursu foun, Juis Deolindo do Santos, hodi troka Juis Guilhermino da Silva ne’ebé rezigna an ona hosi nia kargu tanba moras, no iha loron ne’ebé hanesan, Xefe Estadu mós hatutan Prokuradór José Ximenes ba Prokuradór Jerál Repúblika ba mandatu tuirmai.

Hafoin fó tiha pose, iha nia diskursu ba Prezidente Tribunál Rekursu foun, Xefe Estadu hatete: “Juis Deolindo dos Santos majistradu ida ne’ebé iha esperiénsia naruk no karreira ida ne’ebé distintu. Ita fó ona ita-nia konfiansa tomak ba nia atu kaer órgaun soberania ida-ne’e, ne’ebé tenke independente hosi kontrolu Estadu nian nu’udar garantia ba sidadaun sira-nia direitu sira no ita-nia moris iha sosiedade nia lala’ok regular.”

 Tuir Xefe Estadu katak “atu Justisa bele la’o, ita presiza luta ba independénsia judisiál. Ha’u fiar katak, Tribunál sira, liuliu Prezidente Tribunál Rekursu foun, hatene oinsá atu defende garantia murak liuhosi ninia lala’ok izentu, imparsiál no ikusmai justu”.

Xefe Estadu realsa liután katak, presiza hadi’ak liután setór justisa hanesan iha área infraestrutura, rekursus umanus no lei hirak atu nune’e bele fasilita prosesu justisa loloos ba sidadaun sira. Tanba, tuir Xefe Estadu, investimentu iha justisa maka investimentu ida ne’ebé sei fó retornu. Hafoin, Xefe Estadu mós la haluha atu agradese mós Prezidente Tribunál Rekursu sesante, Juis Guilhermino da Silva, ne’ebé dedika nia an ho dignu no barani hodi defende Tribunál nia independénsia, juis sira-nia kondisaun profisionál no Tribunál sira-nia kualidade.

Iha parte seluk, ba Prokuradór Jerál Repúblika, José Ximenes, Xefe Estadu hatete:

“Dr. José da Costa Ximenes hatudu dezempeñu di’ak tebetebes durante hala’o knaar nu’udar Prokuradór Jerál Repúblika, hodi hala’o ninia kompeténsia konstitusionál no legál sira ho izensaun, imparsialidade no lideransa kalma ida iha Ministériu Públiku. Dala ida tan, ha’u hato’o ha’u-nia votus susesu ba Sr. Prokuradór Jerál Repúblika nia mandatu foun ne’e, ne’ebé sei sai susesu ita hotu nian mós.”

Xefe Estadu realsa Ministériu Públiku presiza meius ne’ebé adekuadu hodi hala’o ninia misaun, liuliu kapasitasaun ba Prokuradór sira no formasaun ba Majistradu no funsionáriu ne’ebé la para, sai hanesan investimentu iha rekursu ne’ebé disponivel ba Ministériu Públiku atu uza hodi hala’o investigasaun kriminál.

Biografia Prezidente Tribunál Rekursu foun

Naran: Deolindo dos Santos

Moris iha Postu Administrativu Atabae, Munisípiu Bobonaro, loron 7 fulan-Jullu 1974, hosi maun-alin na’in-hitu (7). Ensinu Báziku iha Atabae, no kontinua pre-sekundária no sekundária iha Dili.

Hasai kursu lisensiatura iha direitu hosi Universidade Pattimura, Ambon, Indonézia, tinan 1999.

Iha 2000 to’o 2003, Juis Deolindo hahú envolve iha treinamentu judisiál legál nian iha Timor-Leste atu hasa’e nia kapasidade.

Iha 2005, nomeadu sai Konsellu Majistratura Judisiál nian, haree liu ba krime grave sira. 2000-2003 Governu Tranzisaun UNTAET hili ba Juis iha Tribunál Baucau. Iha 2011 nomeadu hosi Konsellu Majistradu Judisiál sai hanesan juis konselleiru iha Tribunál Rekursu. HOTU