TRANSKRISAUN INTERVENSAUN S.E. PREZIDENTE REPÚBLIKA, TAUR MATAN RUAK IHA SERIMONIA DESPIDIDA HO FUNSIONARIU SIRA PREZIDÉNSIA REPÚBLIKA NIAN

by Media Team Posted on

Palasiu Prezidensial Nicolau Lobato, 12 Maiu 2017

Ha’u nia preokupasaun boot, hodi kalan ha’u hanoin, halo nusa ha’u labele tanis, ida hateke sae de’it ba leten, ida seluk labele hakuak no rei imi, maibé bua manas iha sorin (Jose Alves )ne’e halo ha’u matan been monu tiha, planu sira ne’e la vale hotu, ha’u hatene karik imi nia estratégia ha’u bele iha kontra ataque.

Señor Xefe Kaza Sivíl, Señor Xefe Kaza Militar, Assesor sira, Diretores no Xefe Departamentus sira, Ofisiais F-FDTL no PNTL ne’ebé destakadu iha Kaza Militar, Ha’u-nia katuas sira moradores, Seguransa Sivíl, mana sira ne’ebé serbisu iha kuzina, ha’u-nia bin-alin sira ne’ebé serbisu iha jardim.

Quem parte leva saudes, quem fica saudade sempre.  Tempu badak loos maka ita hamutuk, 5 anos. Ba ha’u ho ha’u-nia família nunka espera katak loron ida mai serbisu ho imi, maibé grasa, konfiansa ida ne’ebé ita-nia povu fó, iha onra no priviléziu mai reprezenta ita-nia nasaun hanesan altu majistratura nasaun nian, Preziente da Repúblika ba Timor no ba Timor-oan hotu. Ita hotu iha ne’e, ita iha mehi ida de’it, saida maka ita bele halo para kontribui ba ita-nia nasaun i ita sira ne’e tim ida loos, ekipa ida loos.

Ha’u nunka iha keixa ba ha’u-nia serbisu, ba imi-nia serbisu. Ha’u kontenti loos, señor Diretór Jeral ohin husu deskulpa, lalika. Tamba ema ne’ebé la halo sala, ne’e ema ne’ebé la halo serbisu, toba de’it ne’e maka la sala. Hotu-hotu ne’ebé halo serbisu sempre sala, tamba iha Portugues dehan, “a derota é a mãe da vitória” derota sira maka ita manan, i iha istória ita-nia nasaun nian ita koñese derotas barak i barak liu dolorozu tebes, ne’ebé lori fitar mai ita-nia vida tomak, ita-nia nasaun tomak.

Ha’u nia-oan ohin kanta kompozitór ne’ebé ita-nia saudozu Hermenegildo Alves ninia oan, nia aman mate iha funu no família sira seluk iha ne’e, nasaun tomak barak ke lakon, balu hela lori fitar hanesan ita-nia Veteranu “Ba Dame” (Sr.Henrique Belarminho, funsionariu Prezidensia Repúblika ne’ebé iha tempu okupasaun subar Xanana Gusmão), i entaun lori derotas maka ita aprende mellora, hadia hodi manan, i ho hanoin katak neneik, neneik ita-nia istituisaun sira hetan maturidade, ita hetan maturidade, la’os de’it halo polítika mas liliu serbí ita-nia nasaun.

Horbainhira ha’u ba DIT, ha’u hateten, ita-nia nasaun sei iha problema, tamba dala ruma ita halo polítika ida iha Portugues dehan, “muito baixo”, baixu demais iha ita-nia rain, ha’u militar primeira vez maka ha’u mai polítika, mas polítika ne’ebé ita halo iha ita-nia rain baixu demais i polítika di’ak maka polítika ida ne’ebé sidadaun hotu-hotu hanesan perante ita-nia nasaun i hotu-hotu iha mehi atu kontribui independentemente ninia grupus, polítikus, ninia reliziaun, grupu étnikus, hotu-hotu iha mehi ida de’it katak Timor ita hotu nian, i nia tenki iha fatin ba ita hotu. Ha’u hakarak imi kontinua nafatin hanesan ne’e, aprende buat di’ak. Ha’u-nia oan sira la mai ami espera katak dia 19 sira bele iha tempu para mai foti liman de’it ba imi no hakarak agradese mós imi. Mas ha’u hakarak hatete katak ha’u privileziu no onra loos serbisu ho imi i hateten ba imi katak la haluha imi, konta ho ha’u-nia apoiu iha ne’ebé de’it, estatutu saida de’it sei kontinua ho imi, i ha’u nia mehi ba imi liliu ba sira ne’ebé kontinua iha uma ida ne’e hakarak sai mellór, ha’u hakarak imi é dos melhores que nós temos em Timor, ne’e ha’u-nia liafuan ida ne’ebé ha’u kuandu mai ko’alia primeira vez, i segunda ves maka ha’u ko’alia ba ne’e, tama mai ko’alia sai ba ko’alia.

Ha’u haree progresu boot, ha’u haree avansu boot, Seidauk diak hotu. Maibé ita kontenti tamba ita bele halo buat ne’ebé ita bele, mas ita la halo buat ne’ebé ita nia hakarak. Ita-nia hakarak boot maibé ita nia kbi’it ne’e naton, entaun ita halo tuir ida ne’e, máximu imposivel, para bele kontribui ba ita-nia nasaun, ba ita-nia rain, tamba ne’e ha’u hakarak hateten ba imi hotu katak ha’u-nia família hadomi imi i trasmiti ba sira iha uma katak Prezidente la haluha, lémbra rekordasaun ne’e halo parte istória ita-nia prekursu i entaun la haluha.

Por tantu asesores internasionais, Timor-oan nasionais, liliu sira ne’ebé sei hela iha uma ida ne’e, ha’u hakarak fó espesial ba hau-nia moradór sira ne’ebé dader tuku haat ho balu iha ne’e, tuku lima iha ne’e tiha ona, ha’u-nia Sekretáris Solange ne’e servisu ho ha’u tinan 15, nia laiha ne’e nia iha leten ne’ebá. Ba ha’u nia seguransa sira PNTL, F-FDTL, Komandante seguransa, komandante moradores, seguransa sivil, ne’ebé dader ha’u mai dalaruma ha’u mai propózitadamente para haree imi iha uluk ka la’e, sempre imi iha uluk, ne’e signifika imi hader uluk ha’u, ne’ebé obrigadu barak, kontinua nafatin hanesan ne’e.

Maun ‘Lú’ nia rítimu serbisu oin-seluk mas ha’u hakarak imi kontinua nafatin hanesan ne’e, ita-nia maun ‘Lú’ Prezidente foun mai imi kontinua serbisu ho nia nafatin, haree nia hanesan mós imi haree ha’u, i ha’u fiar katak nia sei kontinua nafatin tau matan ba imi, mellora imi-nia kondisoens iha ne’e liliu ba espasu. Espasu ita la iha, espasu servisu nian la iha, ha’u dalaruma fihir iha imi nia eskritóriu na’in lima na’in neen, hitu sena malu ha’u hanoin loos, tamba ha’u uluk iha F-FDTL mós hanesan ne’e, i ha’u mai Prezidente mós hanesan ne’e sai mós hanesan ne’e, i entaun ha’u hanoin loos imi, mas hahú sempre hanesan ne’e, i dalaruma ha’u kuandu ko’alia kona-ba oinsa maka dezenvolvimentu ita nian, hau sempre konta istória.

Uluk ha’u sei iha forsa, sana atu tein laiha, toba fatin la iha, ida-idak lori bikan husi uma maka mai, kareta la iha, ha’u uluk iha Land Rover ida ami hotu uza ida ne’e, i kuandu primeira vez ami simu kareta oferta ida, la’os Governu Timor nian, ne’e oferta husi Austrália, nia karosa la iha, tula soldadu kurva ba karuk soldadu monu ba lós, kurva ba lós soldadu monu ba karuk.

Uluk ami iha ai-laran ami uza telefone satélite, ha’u bele ko’alia ho Prezidente Estadus Unidus, Prezidente iha mundu ne’e kuandu ha’u hakarak ko’alia ha’u bele ko’alia de’it, ha’u-nia komandante sira mós hanesan, mai fali ha’u lori rakal ida kalan-kalan husi ha’u nia uma ba Kamea foho tutun ne’ebá mak ko’alia, kalan ida ha’u hirus ha’u soe tuun tiha iha buat ne’e. Ha’u dehan, ha’u uluk fuik komunikasaun avansadu, mai ukun-a’an atrazadu liu fali, não é. Mas ne’e hatudu ita hahú hanesan ne’e i entaun iha evolusaun hanesan ne’e, ha’u hanoin ne’e tempu ida ba tempu seluk situasaun la hanesan, kondisoens la hanesan, maibé ita-nia hakarak nasaun ida ne’e progrente i nia progresaun depende liu iha ita nia esforsu no ita-nia vontade ita, nia determinasaun, ne’ebé ha’u fiar katak iha ne’e ba oin mudansa ba iha imi-nia serbisu fatin, meius serbisu kondisoens ne’ebé imi iha bele iha mudansa liu tan. Ne’ebé hakarak husu obrigadu barak ba imi hotu, desde Señór Kaza Sivil eis no atual, Señor Xefi Kaza Militar to’o família sira iha uma, señor Diretór Jeral no señor Diretór sira seluk ne’ebé tau matan ba ita-nia uma lulik, obrigadu barak i husu para imi tau matan ba ita-nia Prezidente ita-nia maun Lú, ne’ebé sei mai loron hirak tan hanesan mós imi sira serbisu ho ha’u iha ha’u-nia mandatu tinan lima.

Ema troka malu, maibé Timor la’o nafatin i presiza ita hotu nia kontribuisaun tamba ne’e dala ida tan ha’u lori ha’u nia kaben Dona Isabel, ha’u nia oan sira nia naran agradese boot loos ba ita-boot sira no previléziu boot ba ami la’o iha tinan lima ne’e nia laran. Ha’u la husu deskulpa ba imi tamba ha’u hakarak imi serbisu no hakarak ita halo sala para avansa nafatin ba oin. Ha’u dalaruma hateten, só ke halo sala ita tenki atensaun, ema dehan, ema matenek maka ema ne’ebé aprende ho ema seluk nia sala, ema beik maka aprende ho ninia sala, bulak maka ida ne’ebé la aprende ho ninian mas la ho aprende ho ema nian, entaun tolu ne’e imi hanoin nafatin. Ida, ema ne’ebé matenek aprende ho ema seluk nia sala, ida ne’ebé beik aprende ho nia sala, ida ne’ebé bulak la aprende nein ho ninian nein ho ema seluk nian. Ne’ebé ha’u hanoin ita sira ne’e la’os kategoria ida ne’e.

kategoria ida primeiru ne’e aprende ho sira seluk nia sala, ne’ebé dala ida tan obrigadu barak ba imi hotu i desejo tudo de bom, buat hotu di’ak ba imi, ba imi-nia família no imi-nia kareira profesional é. Obrigadu barak.