Prezidente-da-Repúblika Francisco Guterres Lú Olo sei loke sorumutu Klubu-de-Madrid

by prtlwebmaster Posted on

 

 

 

 

KOMUNIKADU IMPRENSA

Prezidente-da-Repúblika Francisco Guterres Lú Olo sei loke sorumutu Klubu-de-Madrid, aban Domingu (30/07), iha Salaun Nobre, Ministériu Negósius Estranjeiru, Díli.

Xefe-de-Estadu sei halo diskursu hodi hato’o benvindu ba partisipante sira.

Sorumutu ne’ebé realiza ho apoiu husi Gabinete eis Prezidente-da-Repúblika, José Ramos Horta ne’e, sei halibur hamutuk eis Xefe-de-Estadu no Governu hosi Asia no Oseania.

Iha sorumutu ne’ebé sei hala’o husi loron-30 to’o 31 fulan-Jullu ne’e, sei ko’alia kona-ba “Futuru Demokrasia iha Asia no Oseania”, ho tópiku sira ba diskusaun hanesan: Rekonsiliasaun ba rezolusaun konflitu iha Azia-Oceania; Oinsá promove kresimentu sustentável no fortalese koezaun sosiál nomos partisipasaun polítika iha rejiaun rua ne’e.

Klubu-de-Madrid harii iha tinan 2001, iha kapitál nasaun España, Madrid, ho membru kompostu husi eis Xefe-de-Estadu no Governu nasaun sira demokrátiku hamutuk ema 110.
Objetivu husi klubu ne’e mak aproveita hanoin no experiénsia husi ninia membru sira atu tulun tranzisaun demokrátika nomos konsolida liutan Demokrasia iha nasaun sira ne’ebé presiza.

Sorumutu Klubu-de-Madrid iha Díli hanesan sorumutu daneen no ikusliu, husi organizasaun ne’e nian, hafoin realizasaun sorumutu hanesan iha Kontinente Europa, Amerika no Afrika.
Mídia PR