Prezidente-da-Repúblika Rona Prosesu Formasaun Governu husi Sekretáriu-Jerál FRETILIN

by prtlwebmaster Posted on

Palásiu Prezidente Nicolau Lobato, loron-28 fulan-Agostu, Prezidente-da- Repúblika Francisco Guterres Lú Olo, hala’o sorumutu ho Sekretáriu-Jerál FRETILIN, Mari Alkatiri ne’ebé akompaña husi Sekretário-Jerál Adjuntu FRETILIN, José Reis.

Prezidente-da-Repúblika iha okaziaun ne’e hakarak hatene prosesu negosiasaun ba formasaun VII Governu Konstitusionál, ne’ebé lidera husi Mari Alkatiri hanesan lidér partidu ne’ebé hetan votus barak liu iha Eleisaun Parlamentar foin lalais ne’e.

Prezidente-da-Repúblika hatete nia akompaña nafatin ho atensaun prosesu ne’ebé óras ne’e la’o dadaun no kompriende ansiadade ne’ebé sosiedade tomak espresa atu haree governasaun-foun iha tempu badak.

Tamba ne’e Xefe-de-Estadu fó nafatin konfiansa ba lider partidu politiku sira no espera ho maturidade ne’ebé aas, lider sira ne’e, bele forma governu ida ne’ebé estável no dura durante tinan-lima nia laran.

Prezidenta-da-Repúblika realsa liutan, formasaun governu tenki ho sentidu proporsionál no husu governu-foun mai sei respeita povu-nia hakarak ho povu-nia desizaun liu husi Eleisaun Jerál.

Aban, iha loron-29 fulan-Agostu Prezidente-da-Repúblika sei hasoru lideransa husi PLP no KHUNTO.

Mídia P