Prezidente-da-Repúblika sorumutu ho lider Partidu PLP, CNRT, KHUNTO no PD

by prtlwebmaster Posted on 45 views

 

Palásiu Prezidente Nicolau Lobato, loron-29 fulan-Agostu, Prezidente-da- Repúblika Francisco Guterres Lú Olo, kontinua hala’o sorumutu ho lider partidu sira ne’ebé hetan asentu parlamentar  iha Eleisaun Parlamentar foin lalais ne’e.

Iha enkontru ho oras la hanesan ho lider Partidu PLP, KHUNTO, CNRT no PD, Xefe-de-Estadu rona partidu sira-nia hanoin  kona-ba dezenvolvimentu negosiasaun ba formasaun governu ne’ebé lidera husi partidu manan-na’in iha eleisaun, FRETILIN.

Iha sorumutu ho Prezidente-da-Repúblika, lider partidu sira ne’e, agradese inisiativa Prezidente Francisco Guterres Lú Olo hodi konvida  sira  no rona sira-nia relata kona-ba prosesu formasaun governu ne’ebé oras ne’e la’o dadauk .

Alende ne’e, lider partidu sira mós garante ba Xefe-de-Estadu atu kontribui  ba diskusaun ida di’ak , klean no responsável ho partidu FRETILIN,  hodi hamosu governasaun foun  ne’ebé bele reprezenta povu nia hakarak durante tinan-lima nia-laran.

Lider partidu sira ne’e hatudu sira-nia disponibilidade atu hola parte iha governasaun foun, karik hetan konvite husi partidu manan-na’in, mas se la halo parte karik iha Governu foun, sira sei kontinua apoiu VII Governu Konstitusionál liu husi oposizaun ida ne’ebé edukativu no konstrutivu.

Enkontru Prezidente-da-Repúblika ho lider partidu sira ne’e, hanesan kontinuasaun husi enkontru horseik, ne’ebé Xefe-de-Estadu halo ho Partidu FRETILIN kona-ba formasaun VII Governu Konstitusionál.

Mídia PR

Author

prtlwebmaster