Mensájen Prezidente Repúblika ba UNIÃO NACIONAL DOS ESCUTEIROS DE TIMOR-LESTE (UNE-TL) 

by prtlwebmaster Posted on

Prezidente Repúblika agradese no sente onradu ho konvite ne’ebé simu, nu’udar patronu ba União Nacional dos Escuteiros de Timor-Leste/UNE-TL.

UNE-TL la’ós de’it organizasaun nasional, rekoñesidu hosi Governu Timor-Leste, maibé tama ona mós, nu’udar membru ba Organizasaun Mundial Movimentu Eskutista. Ida ne’e fó orgullu ba ita hotu tamba hatudu katak UNE-TL hatuir mós espíritu no valores hanesan eskuteiru sira seluk, namokari iha mundu tomak. 

Inisiativa ne’ebé UNE-TL hala’o ba tinan ida ne’e, iha fulan ida nia laran, halibur foin-sa’e sira, mane no feto, hosi munisípiu lima no mós hosi Austrália.

Ida ne’e oportunidade di’ak ida atu hametin liután prinsípiu sira ne’ebé ita hotu haksolok hanesan: lealdade, dixiplina, fó-liman ba malu, hadomi malu no espíritu fó-an tomak atu serve família, sosiedade no estadu.

Prezidente Repúblika defende mós valór no prinsípiu sira ne’e. Iha 20 Agostu 2017, loron FALINTIL nian, Prezidente Repúblika konvida Governu Timor-Leste atu haree oinsá harii Servisu Síviku Nasionál ida ne’ebé envolve timoroan hotu-hotu.

Prezidente Repúblika fiar katak Servisu Síviku, organiza hosi governu Timor-Leste, bele ajuda família no profesór sira atu haburas liután karáter ema ida-idak nian, atu ida-idak sai sidadaun responsável no patriótiku.

Prezidente Repúblika fiar katak, akampamentu ida ne’e sei hasa’e liután valores no prinsípius ne’ebé UNE-TL hakarak hatutan ba foin-sa’e sira, feto no mane. Parabéns no susesus ba hotu-hotu!

Obrigadu!