Ministru Hernâni Coelho relata vizita Nova Iorke ba Prezidente-da-Repúblika

by prtlwebmaster Posted on

 

Palásiu Prezidente Nicolau Lobato Bairro-Pite (12/9), Prezidente-da- Repúblika Francisco Guterres Lú Olo, hala’o enkontru ho Ministru Negósiu Estranjeiru no Kooperasaun (MNEK) Hernâni Coelho ko’alia kona-ba vizita xefe-de-estadu ba Nova Iorke.

“Ha’u mai atualiza ba Prezidente-da-Repúblika kona-ba atividade ne’ebé mak Prezidente-da-Repúblika iha planu atu hala’o iha Nova Iorke, iha ámbitu reniaun Asembleia Jerál Nasoens Unidas,” Ministru Hernâni, dehan. 

Programa Asembleia Jerál Nasoens Unidas sei hahú iha 18 to’o 21 Setembru, atividade ne’ebé planeia ona atu Prezidente-da-Repúblika partisipa, iha enkontru ho Sekretáriu Jerál Nasoens Unidas António Guterres no sei iha mós resepsaun ne’ebé sei oferese hosi Sekretáriu Jerál no Prezidente-da-Repúblika Estadus Unidus Amerika.

Hafoin ne’e iha sesaun debate ka plenaria Asembleia Jerál, Prezidente-da-Repúblika Demokrátika Timor Leste, Francisco Guterres Lú Olo sei hala’o intervensaun hodi reprezenta estadu.

Alende ne’e, sei iha mós atividade komplementares relasiona ho enkontru iha Konsellu Seguransa Nasoens ne’ebé sei ko’alia kona-ba esperiénsia operasaun ba Pás, tanba Timor-Leste sai mós hanesan ezemplar ba konstrusaun manuntensaun ba pás ne’ebé Nasoens Unidas nia misaun hala’o iha mundu tomak. Timor Leste sei fahe mós interasaun Nasoens Unidas ho Timor Leste hosi tinan 1999 to’o iha 2012 nian.

Durante vizita Prezidente-da-Repúblika iha Nova Iorke sei partisipa iha eventu paralelu kona-ba importánsia prosesu pás no dezenvolvementu iha nasaun sira ne’ebé foin sai hosi konflitus ka nasaun frájilidade iha ámbitu programa g7+ nian.

Prezidente-da-Repúblika sei tuir mós briefing kona-ba prosesu konsiliasaun kompolsoria ho Australia no prosesu negosiasaun fronteira marítima ho nasaun Indonézia. Esperiénsia Timor-Leste iha prosesu konsiliasaun relasiona ho kestaun marítima sei fahe ba nasaun seluk ne’ebé iha problema hanesan.