DISKURSU HOSI S.E. PREZIDENTE FRANCISCO GUTERRES LÚ OLO IHA SERIMÓNIA TOMADA-DE-POSE  VII GOVERNU KONSTUTUSIONÁL

by prtlwebmaster Posted on

 

Dili, 15 Setembru 2017

Exelénsia sira,
Señor Prezidente Parlamentu Nasional
Señor Prezidente Tribunál Rekursu
Señor Primeiru-Ministru Sétimu Governu Konstitusionál
Señoras no Señores

Ha’u hato’o ha’u-nia kumprimentus boas vindas ba exelénsia sira hotu iha ne’e no fó parabéns espesiál ba membru governu sira, ne’ebé ohin hahú hala’o responsabilidade aas tebetebes.
Ha’u saúda líderes hosi bankada parlamentár sira iha ne’e, no señoras no señores deputadus, reprezentantes Nasaun ida ne’e nian, membrus hosi korpu diplomátiku no konsulár, família membrus governu nian no ilustre konvidadu sira seluk hosi Prezidente Repúblika ba serimónia ida ne’e.
Tomada-de-pose VII Governu Konstitusionál nian hatudu sinál importante ida iha vida no funsionamentu estável ba sistema polítiku ida ne’ebé ita hahú hala’o, hafoin Ita Ukun Rasik An – sistema polítiku ida ne’ebé ita hotu, sidadaun timoroan, apoia no haforsa durante tinan sanulu resin lima.
Nu’udar Prezidente Repúblika, ha’u haksolok tebes ha’u-nia an rasik, tamba fó pose ba governu foun, tuir regras Konstituisaun RDTL nian, no ne’ebé kontribui ba estabilidade no funsionamentu normál instituisaun sira-nian.
Sétimu Governu Konstitusionál forma tuir oinsá povu vota no mai hosi akordu entre partidu politiku rua iha Parlamentu Nasionál.

Sidadaun sira, liuhosi sira-nia votu, fó fiar ba partidu oin-oin: ida ne’e normál, iha demokrasia. Partidu sira iha responsabilidade atu halo negosiasaun atu hetan solusaun, atu garante funsionamentu estável instituisaun sira-nian, no garante katak implementasaun planus dezenvolvimentu sosiál no ekonómiku la’o babeibeik no lais – planus ne’ebé ita presiza duni no dalabarak, proposta sira ne’e ema hatene ona no aprova tiha ona.
Ho laran haksolok mak ha’u saúda señor ministru sira hosi sétimu Governu Konstitusionál, ba sira-nia sentidu dever. Sira-nia partisipasaun, nu’udar sidadaun no líder, no sira-nia esperiénsia no koñesimentu, sei kontribui maka’as tebes atu haforsa sentimentu konfiansa sosiedade nian ba ita-nia instituisaun sira.
Ha’u saúda mós partidu ninia líder no membru sira ne’ebé la halo parte koligasaun.
Sira-nia partisipasaun no kontribuisaun importante tebebes ba estabilidade no dezenvolvimentu Timor-Leste nian – liuhosi dalan oin-oin, inklui apoiu insidénsia parlamentár, konsulta sidadaun sira no halo diálogu ho sira, bainhira presiza, atu sosiedade ne’e moris ho dame no domin.
Koligasaun ne’ebé apoia sétimu governu konstitusionál hatuir prinsípiu sira ne’ebé FRETILIN no Partidu Demokrátiku tanen.
Iha loron ohin ha’u fó posse ba señor Primeiru-Ministru Dr. Mari Alkatiri no ministrus-xave governu ida ne’e nian, importante fó-hanoin sira-nia

kompromisu atu garante estabilidade governativa. Sétimu governu tanen prinsípiu hat tuir mai ne’ e:
– Hili membru governu tuir méritu;
– Avalia governu, tuir efisiénsia hosi implementasaun;
– Harii governu tuir proporsionalidade, katak haree tuir rezultadus eleisaun nian;
– Igualdade jéneru, atu loke dalan ba feto sira-nia partisipasaun.
Ha’u bolu atensaun ba kompromisu tolu, ne’ebé tama iha akordu koligasaun ida ne’e. Koligasaun ne’e propoin:
– Garante dezenvolvimentu ekilibradu, sustentável iha munisípiu sira no rejiaun oin-oin;
– Garante no konsolida tranzisaun entre jerasaun sira;
– Luta maka’as hasoru korupsaun, koluzaun no nepotismu (KKN, hanesan ita bainbain hatete).
Ha’ u la presiza hatete pontu hotu-hotu akordu ida ne’ e nian ne’ebé fó-sai ona ba públiku.
Ha’ u fiar katak asaun governativa, tuir kompromisu sira ne’e, sei lori duni ita-nia país ba oin.
Asaun governativa, ne’ebé hala’o tuir kompromisu sira ne’e, bele simu mós apoiu hosi partidu sira seluk no forsa sosiál sira.
Hahú hosi Restaurasaun Independénsia, ita timoroan la’os ona povu perseguidu. Ita mak autór principal país ida ne’ e nian no ba ita-nia istória rasik.
Ita moris ho pás no iha estabilidade laran; ita konkista ona respeitu boot hosi komunidade internasionál. Iha Nasoens Unidas no instituisaun sira seluk, Timor-Leste nia naran temi dalabarak nu’udar ezemplu ida atu tuir. País ida ne’e hatene oinsá rai-metin rekursus. Ita iha Planu Estratéjiku Dezenvolvimentu ne’ebé, de-uma-forma-jerál, hotu-hotu simu.
Ita hotu-hotu hatán katak ita presiza hadi’a liután edukasaun, Saúde no kualidade servisu Estadu sira seluk.
Ita-nia país iha ona tinan sanulu resin lima no tinan lima tuir mai, sei importante tebetebes ba dezenvolvimentu nasionál. Ita tenke hatene aproveita duni tinan lima tuir mai, atu:
– Implementa ita-nia planu dezenvolvimentu ne’ebé aprovadu ona;
– Respeita ita-nia kompromisu internasionál sira, ne’ebé iha relasaun ho Objetivus Dezenvolvimentu Sustentável Nasoens Unidas nian, ne’ebé ita asina ona;
– Hamenus kiak no dezenvolve ekonomia no komunidade ninia kondisaun vida iha munisípiu sira, la’ós de’it iha Dili.
Atu ita bele hetan objetivu sira ne’e, ita presiza unidade nasionál. Ita presiza respeita sidadadun sira-nia desizaun kona-ba sesé mak tama iha Parlamentu Nasionál no oinsá ita hetan dalan di’ak liu atu haforsa estabilidade – no la’o ba oin, ba dezenvolvimentu..
Ita-nia país seidauk iha kuadru kualifikadu barak: Ita tenke hatene valoriza no aproveita di’ak, ema hotu-hotu. Ita labele hasees ema ida.
Rai ida ne’e presiza FRETILIN no PD no mós CNRT, PLP no KHUNTO. Ita presiza mós sidadaun sira seluk ninia partisipasaun.

Ita tenke inklui hotu-hotu, liuliu joven sira, iha nível hotu-hotu sosiedade nian:
– Inklui joven sira signifika hasa’e oportunidade traballu ba sira;
– Signifika hasa’e kualidade edukasaun nasionál, atu prepara joven sira ba nesesidade iha agrikultura, pekuária, sektór privadu, ho atensaun ba nesesidade empreza kiik no médiu;
– Signifika mós katak ita tenke sé tilun liután ba joven sira. Hatene di’ak liután saída mak joven sira hanoin kona-ba dezenvolvimentu.
Ha’ u foin ko’alia kona-ba kompromisu sétimu governu nia hasoru KKN. Dalan importante tebes atu luta hasoru nepotismu mak harii sistema justu ida, atu joven sira bele tama iha universidade no hetan bolsas estudu iha ita -nia rain. Bolsas estudu no asesu ba UNTL tenke hatuir estudante sira-nia méritu.
Dezenvolvimentu Timor-Leste nian, ekonomia no sosiedade nian, iha tinan lima ka sanulu depende hosi joven estudante sira-nia kualidade no méritu, ne’ebé ohinloron sei estuda hela.
Hanesan ha’u hatete ona, dezenvolvimentu Timor-Leste nian presiza hotu-hotu ninia partisipasaun, la fihir ema ida, mane ka feto.
Dezenvolvimentu ezije jerasaun tuan servisu hamutuk ho joven sira: ita tenke tao hamutuk esperiénsia no koñesimentu ho inovasaun no kriatividade.
Ita-nia rain presiza kualidade hosi jerasaun oin-oin. Nune’e, ho laran haksolok tebes mak ha’ u haree membru governu balun ho esperiénsia – sira ne’ebé fó-an tomak atu Timor-Leste sai independente – sira ne’ebé hakarak servisu ho jerasaun foun, iha fatin hotu-hotu, inklui iha Konsellu Ministrus.

Señor Primeiru-Ministru, Dr Mari Alkatiri:
Exelénsia simu dala ita tan responsabilidade aas atu xefia governu rai ida ne’e nian. Exelénsia ninia esperiénsia klean no kapasidade, ne’ebé hotu-hotu rekoñese, kualifika Exelénsia nu’ udar kandidatu ideál ba kargu ida ne’e.
Knaar governu nian exije maka’as: Exelénsia sira tenke ajuda ita-nia país, iha tinan lima tuir mai, atu lori país ida ne’ebé kiak tebes, ba país ida ho rendimentu médiu no aas, ho mukit-laek, ho ekonomia diversifikada no sustentável.
Ida ne’e mak objetivu ba 2030 – iha Planu Estratéjiku Dezenvolvimentu Timor-Leste nian no mós ba Objetivus Dezenvolvimentu Sustentável Nasoes Unidas nian.
Ita bele hetan Objetivus 2030 ho ita-nia servisu loron-loron, hahú kedas hosi ohin ba oin. País presiza sidadaun sira-nia partisipasaun, presiza sira ne’ebé fó-an tomak atu ita servisu hamutuk, biar ita iha hanoin oin-seluk.
Buat sira ne’ebé hametin ita, boot tebetebes no importante liu bainhira ita sukat ho buat sira ne’ebé haketak ita. Biar ita iha hanoin oin-seluk, ita bele fó liman ba malu atu Timor-Leste bele haburas liután no ema moris ho laran haksolok liután.
Durante ha’u-nia mandatu, ha’u sei halo buat hotu-hotu atu hamenus diferensa no halibur liután timoroan sira – atu ita bele haburas ita-nia sosiedade no ita-nia ekonomia no hametin ita-nia soberania nasionál. Ita hotu hamutuk sei hadi’a liután ita-nia rain.
Ba Exelénsia, Señor Primeiru-Ministru, no ba señor membru governu hotu-hotu, ha’u hato’o ha’u-nia votus atu Ita-Boot sira servisu maka’as tebes no ukun ho valores, atu serve sidadaun sira no ita-nia rain.

Ba povu toma, ha’u hato’o ha’u-nia dezeju katak ita tenke iha unidade. Liuhosi dalan hamutuk mak ita bele lori rai ne’e ba dezenvolvimentu, luta hasoru kiak. Hanesan horiuluk, ita manán independénsia nasionál tamba ita hala’o ita-nia luta hamutuk.

Viva ita-nia rai lulik!
Viva Povu Timor-Leste!

Obrigadu wain!