DISKURSU HOSI S.E. PREZIDENTE FRANCISCO GUTERRES LÚ OLO IHA TOMADA-DE-POSE MEMBRUS FOUN VII GOVERNU KONSTITUSIONÁL

by prtlwebmaster Posted on

DISKURSU HOSI S.E. PREZIDENTE
FRANCISCO GUTERRES LÚ OLO IHA TOMADA-DE-POSE MEMBRUS FOUN VII GOVERNU KONSTITUSIONÁL

Díli, 3 Outubru de 2017
Exelénsia,
Señor Prezidente Parlamentu Nasional
Señor Prezidente Tribunál Rekursu
Señor Primeiru-Ministru
Señores Membrus Sétimu Governu Konstitusionál
Exelénsias
Señoras no señores

Ho laran ksolok tebes mak ha’u saúda Exelénsia sira no fó boas vindas ba hotu-hotu.

Ha’u hato’o saudasaun espesiál ba membru governu foun sira, ne’ebé foin simu pose hosi ha’u. Ba sétimu governu tomak ha’u hato’o ha’u-nia dezeju katak hotu-hotu sei halo servisu di’ak.
Ha’u hakarak kumprimenta S.E. Señor-Primeiru Mari Alkatiri ba nia hahalok ne’ebé hatudu vontade tomak atu halo diálogu ho pasiénsia, atu buka harii Governu ida ne’ebé bele hetan partisipasaun liután hosi setór sosiál no polítiku hotu-hotu, hosi ita-nia sosiedade.

Esforsu ne’ebé halo ona atu buka halo diálogu no negosiasaun hatudu maturidade polítika no ida ne’e fó inspirasaun ba ita-nia sosiedade. Sidadaun sira sente mós katak demokrasia ne’e hakoak, demokrasia ne’e respeita ema hotu-hotu, inklui hatene rona – no hatene foti desizaun – bainhira to’o tempu atu foti desizaun.

Importante tebes hahalok ne’ebé buka dalan atu líder nasionál sira hakbesik-an ba malu, ko’alia ho dirijentes partidu polítiku sira no personalidade sira seluk, ho setór sosiál oin-oin, ho kapasidade ne’ebé sosiedade rekoñese. Hosi hahalok hakbesik-an ida ne’e mak Governu ida ne’e harii. Dalan ida ne’e mak sidadaun sira hein hela no hakarak. Sidadaun sira hein no hakarak Governu ida ne’ebé bele servisu atu hala’o dezenvolvimentu nasionál no hamenus kiak iha ita-nia rain.
Diálogu, apelu ba sidadania no bolu partisipasaun polítika mak kontribui ba hamosu fiar ba malu no haforsa no hasa’e sosiedade nia kapasidade atu hare’e ba buat di’ak, atu hanoin klean no hare’e ba oin, ba futuru.

Demokrasia nurak hela iha Timor-Leste. Maibé, ita-nia sosiedade ninia maturidade no estabilidade, ne’ebé ita hatudu durante prosesu naruk harii sétimu governu, halo ita-nia parseiru dezenvolvimentu no país amigu sira admira ita. Ita hatudu katak la’ós tempu de’it mak determina ita-nia hahalok. Di’ak liu ita lori tempu naruk no hetan rezultadu di’ak duke halo iha tempu badak no halo sala.

Ita-nia ambiente polítiku no sosiál, hafoin rezultadu eleisau 22 Jullu, halo emprezáriu sira, nasionál no internasionál, loke laran ba ita. Ita presiza ema sira ne’e atu investe iha ita-nia país, atu ajuda ita hamosu empregu no hala’o ita-nia planu dezenvolvimentu ekonómiku no sosiál.

Neineik-neineik, dalan rona ema no diálogu hetan susesu no Governu ne’e harii ho ema hosi setór sosiál no polítiku oin-oin.
Tama iha sétimu Governu, ema ne’ebé iha esperiénsia no ita respeita no mós klosan sira ne’ebé koñesidu iha sektór profisionál oin-oin no hatudu ona sira-nia kapasidade téknika.
Faktu sira ne’e haksolok ha’u. Governu la’ós harii no labele harii atu fahe de’it kadeira. Fahe kadeira tenke hatán ba nesesidade atu lori ema mai governu maibé ema ne’ebé rai ida ne’e presiza duni, atu lao ba oin.

Ha’u haree, ho laran haksolok no esperansa, katak ita fó valór ba ema ninia esperiénsia. Ha’u uza lia fuan esperansa tamba ha’u la haluha katak ita hakarak hasa’e kapasidade no kualidade servisus Estadu nian ba sidadaun sira..
Esperiénsia ema ida-idak nian no dedikasaun bele garante governasaun di’ak, atu serve sidadaun hotu-hotu.
Hanesan mós Primeiru-Ministru, ha’u mós hakarak katak Governu ida ne’e iha liu presenza no partisipasaun feto-sira nian.

Nune’e, ha’u kompromete-an atu servisu ho Señor Primeiru-Ministru no membrus Governu, atu ajuda hamenus diferensa oportunidade entre mane no feto, iha knaar sira ho responsabilidade aas liu, iha departamentu oin-oin Estadu nian. Maibé asuntu ida ne’e tama iha kompeténsia konstitusionál Governu nian, kompeténsia ne’ebé ha’u rekoñese no simu ho laran tomak.

Ha’u no Señor Primeiru-Ministru la haluha katak atu dezenvolve ita-nia país, ita presiza promove feto sira, ita presiza feto sira-nia partisipasun. Ida ne’e objetivu estratéjiku ida ba ita-nia dezenvolvimentu nasionál. Nune’e, kooperasaun entre órgauns soberania importante tebes no bele hamosu rezultadu di’ak liu. Ida ne’e mak ha’u sei buka halo atu valoriza feto sira iha ita-nia sosiedade, hamutuk ho governu maibé tuir ha’u nia kompeténsia rasik, nu’udar Xefe Estadu.

Kona-ba kompozisaun Governu, ita haree katak seidauk iha ministru Justisa. Biar nune’e, ha’u fiar katak ida ne’e la signifika katak área justisa la iha atensaun.
Justisa, inklui majistradu sira hosi Minisériu Públiku no juíz sira, defensór públiku no advogadu hotu-hotu, no mós funsionáriu judisiál sira, iha importánsia boot tebes ba ita. Setór ida ne’e mak haforsa Estadu-de-Direitu, fó seguransa ba investidór sira no garante respeitu tomak ba direitus, liberdades no garantias, tuir Konstituisaun RDTL haruka. Prioridade estratéjika ida mak hametin instituisaun justisa no ha’u sei fó atensaun maka’as ba ida ne’e iha tinan sira tuir mai ne’e.

Exelénsias,
En-jeral, sosiedade tomak tanen prioridades ba dezenvolvimentu ba rai ida ne’e.
Prioridade sira ne’e tama iha Planu Estratéjiku ba Dezenvolvimentu Nasionál, hosi kedas tinan 2011.
Ema hotu iha konsensu ba prioridade sira ne’e, ema hotu simu, biar ita presiza ko’alia klean liután oinsá implementa hamutuk Planu ida ne’e. Purezemplu, ha’u konsidera importante rona liután oinsá ita hala’o dezenvolvimentu ekilibradu iha munisípiu no rejiaun sira – prioridade importante ne’ebé tama iha akordu koligasaun, ne’ebé apoia governu.
Di’ak tebes rona ema no halo debate, atu haree sá dalan mak di’ak liu atu implementa Planu Estratéjiku Dezenvolvimentu Nasionál, atu ita foti desizaun di’ak liu ba ita-nia rain.

Exelénsias,
Nu’udar Prezidente Repúblika, ha’u haree kompozisaun sétimu Governu nian, hanesan rezultadu hosi kompromisu ida atu dudu ba oin prioridade nasionál sira, ne’ebé urjente liu – prioridade sira ne’ebé, ha’u fó-hanoin fila fali, partidu hotu-hotu rekoñese.
• Prioridade ida mak investe osan hosi Orsamentu Estadu atu hasa’e kualidade ba servisus públikus: hadi’a servisus saúde; hadi’a eskolas no kualidade edukasaun, inklui rekoñese, fó prémiu no haforsa empeñu professor sira nian. Ho hahalok sira ne’e, ita valoriza profisionál sira ne’ebé haka’as-an tebes atu eduka ita-nia labarik no joven sira, iha ita-nia país tomak.
• Prioridade seluk ida mak hamenus kiak lalais. Se ita hasa’e kualidade servisus Estadu nian, ita-nia luta hasoru kiak sei efisiente liu, ita sei hamosu rezultadu lais liu iha tempu badak ida.
• Prioridade importante seluk tan mak harii empregu ba joven sira, diversifika ekonomia, liuliu turismu, hadi’a infra-estruturas no hala’o governasaun transparente no moos.

Exelénsias,
Povu Timor-Leste
Negosiasaun no kompromisu halo parte demokrasia. Iha aspetu ida ne’e, sistema polítiku iha Timor-Leste la’o di’ak, la’ós de’it hafoin eleisaun tinan ida ne’e nian, maibé la’o ona tinan sanulu resin lima.

Hosi kedas 2002, nu’udar governu ka opozisaun – hotu-hotu hatudu maturidade, pasiénsia, kontrola-an no sentidu Estadu – polítiku sira hatudu ona iha kbiit atu tao ba soren interese partidu nian, atu garante estabilidade no dada sosiedade atu fiar ita-nia instituisaun sira. Ita-nia país presiza ida ne’e. Povu Timor-Leste hein ida ne’e.

Sidadaun sira, liuhosi eleisaun lejislativa, fó sira-nia fiar ba partidu oin-oin.
Sidadaun sira-nia desizaun ida ne’e hasa’e responsabilidade ba órgauns soberania no ba aparellu Estadu tomak atu ita, hamutuk, bele buka-hetan rezultadu sira ne’ebé ita-nia povu doben hein hela.

La’os ho polítika tun-sae mak ita bele hadi’a povu ninia moris. Ita hadi’a ho servisu, ho hotu-hotu ninia partisipasaun no dedikasaun.
País hein governasaun di’ak, ita tenke hatene uza ita-nia riku-soin no ita-nia ema.

Povu hein governu atu implementa polítika dezenvolvimentu la‘ós de’it ba hamenus kiak maibé atu sidadaun hotu-hotu bele moris di’ak liu.
Ita la’ós mehi de’it ho objetivu sira ne’e. Ita bele hetan objetivu sira ne’e.

País presiza ema hotu-hotu atu hetan buat sira ne’e. Ita labele hasees ema ida.
Sétimu governu hatudu katak líder sira, setór sosiál polítiku oin-oin no sidadaun sira, ho kbiit rasik, iha vontade no bele fó sira-nia tempu.

Vontade sira ne’e hotu fó benefísiu ba ita-nia país. Haforsa Timor-Leste ninia kapasidade atu hatudu katak ita bele. Ita bele hetan susesu, ita bele servisu hamutuk ba hotu-hotu ninia moris di’ak .

Nu’udar Prezidente no nu’udar sidadaun, hanesan mós horiuluk, bele konta ho ha’u tamba ha’u sei fó-an tomak, iha ha’u-nia mandatu tomak, atu servisu ho ema hotu-hotu no ha’u sei kontribui ba órgaun soberania sira atu fó liman ba malu, no atu garante partisipasaun hotu-hotu nian, mane ka feto.

Iha 2022, ita tenke entrega ba ita-nia susesór sira, país ida ne’ebé di’ak liu duke ita iha, ohinloron. Ida ne’e ita-nia responsabilidade, ita-nia devér!
Ba líder polítiku sira hotu, ba xefe bankada parlamentár hotu-hotu no ba deputadu no deputada sira hotu, ho laran nakloke no fiar metin, mak ha’u husu ba ita servisu hamutuk, ba interese nasionál.

Órgaun soberania ida-idak iha ninia responsabilidade rasik, no ha’u repeita no sei respeita babeibeik.
Maibé ha’u hatene katak ita bele buka-hetan dalan atu halo diálogu no servisu hamutuk tamba, hanesan ha’u hatete ona, demokrasia ezije rona ita-nia ema, diálogu no kompromisu.
Ba Señor Primeiru-Ministru no ba señor membru Governu hotu-hotu, ha’u husu dedikasaun no servisu ho transparénsia, ba sidadaun sira, bainhira implementa prioridades nasionais.
Ha’u hato’o ha’u-nia dezeju ba maluk sira atu halo servisu produtivu no inovadór, atu ita hetan objetivu nasionál tuir mai ne’e:
Objetivu atu hotu-hotu bele hetan kondisaun vida di’ak liu. Atu ita hotu moris iha pás laran, ho seguransa, iha país ida di’ak liután. Tinan lima sei lao lais. Ita labele lakon tempu.
Nune’e, ita hotu, servisu dadaun ba.

Ko’alia oituan, halo mak barak!
Labele husik ba aban,
Buat ne’ebé ita bele halo ohin!

Obrigadu!