Prezidente-da-Repúblika Rona Relatóriu Semanal hosi Brigadeiru Jeneral F-FDTL

by prtlwebmaster Posted on

 

Palásiu Prezidente Nicolau Lobato Bairo Pite (11/10), Prezidente-da-Repúblika Francisco Guterres Lú Olo, sorumutu ho Brigadeiru Jenerál Falintil Forsa Defesa Timor Leste (F-FDTL) Filomeno Paixão hodi rona relatoriu semanal kona-ba situasaun iha rai laran no kondisaun forsa armadas nian.

Kona-ba situasaun polítika ne’ebé mak ohin loron la’o namanas iha Timor Leste, F-FDTL simu ona instrusaun hosi Ministru Defesa no Seguransa, atu fó apoiu ba PNTL, hodi hala’o patrullamentu iha sidade Dili no prevene ameasa ruma ba situasaun seguransa iha rai-laran.

Filomeno Paixão realsa liutan, sei la iha mudansa pozisaun ba postu seguransa sira ne’ebé espalla iha teritoriu laran no ho postu sira ne’e mak F-FDTL no PNTL sei tenta atu fó seguransa ba povu no nasaun Timor-Leste.

Tuir relatoriu ne’ebé mak relata ba xefe-de-estadu, situasaun iha sidade laran ohin loron la’o di’ak nafatin, tanba iha kooperasaun entre instituisaun F-FDTL ho PNTL.

Prezidente-da-Repúblika hanesan komandante supremu forsa armadas nian sempre fó apoiu ba instituisaun rua atu bele mantein situasaun hakmatek.

Mídia PR