MENSAJEN BA KOMUNIDADE BAHA’I

by prtlwebmaster Posted on

 

MENSAJEN BA KOMUNIDADE BAHAI

HATO’O HOSI SUA EXELÉNSIA PREZIDENTE FRANCISCO GUTERRES LÚ OLO

IHA LORON ANIVERSÁRIU BAHAULLAH NIAN BA DALA 200

 

Iha momentu ne’ebé ema fiar-na’in Baha’i sira, iha Timor-Leste no iha mundu tomak, selebra aniversáriu ba tinan 200 Baha’u’llah nia loron moris, ne’ebé mak sai hanesan ema inspiradór ba hanoin Baha’i, ha’u kontente tebes atu haksolok hamutuk ho Baha’i sira iha loron ida-ne’e, lori nasaun tomak nia naran.

Ha’u saúda liuliu espíritu toleránsia no simu-malu ne’ebé mak sai hanesan karakterístika hosi ema inspiradór no doutrina relijiaun Baha’i nian.  Espíritu respeitu, toleránsia ba ema seluk, la haree ba relijiaun, kontribui duni ba armonia iha sosiedade nia leet.

Respeitu ba ita-nia maluk hanesan prinsípiu lulik ida hosi relijiaun oioin, no ha’u laran-ksolok tebes tanba ita-nia sosiedade respeita dignidade ema hotu-hotu nian, la haree ba relijiaun, inklui mós sira-nia espíritu toleránsia no relasaun ne’ebé di’ak entre relijiaun oioin iha ita-nia rain.

Toleránsia relijioza hanesan valór fundamentál ida hosi ita-nia sivilizasaun.

Fiar-na’in Baha’i dahuluk sira to’o iha Timor-Leste tinan barak liubá: Baha’i Harold Fitzner ho ninia ferik-oan Florence Fitzner hosi Austrália, no José Marques hosi Portugál to’o iha Timór iha inísiu tinan 1950.

Governu koloniál deskonfia sira, tan de’it relijiaun la hanesan. Governu hakarak halemo sira.

Maibé, ho laran-ksolok boot ha’u lembra katak reverendu Bispu Igreja Katólika iha Timór, Monseñór Jaime Garcia Goulart, mak fó-konsellu ba governadór portugés katak labele hanoin atu duni sai ema relijiozu Baha’i sira.

Governadór halo tuir konsellu reverendísimu bispu Goulart nian.

Ohin loron, sosiedade timoroan tomak fahe lisuk Reverendu Bispu Jaime Goulart nia fuan nakloke no espíritu simu-malu la haree ba relijiaun.

Iha Konstituisaun RDTL nu’udar lei fundamentál ne’ebé ita hotu konkista liuhosi independénsia, hatuur ona kona-ba liberdade relijioza no igualdade sidadaun hotu-hotu nian iha lei nia oin, lahó diskriminasaun.

Durante tinan 24 nia laran, ita hotu halo sakrifísiu nakonu ho susar no terus hodi manán direitu atu tane no tau aas prinsípiu sira-ne’e, prinsípiu respeitu ba dignidade ema timoroan tomak, inklui respeitu ba konviksaun relijioza.

Ha’u-nia mensajen respeitu no amizade ba Baha’i sira, la’ós iha Timor-Leste de’it maibé iha mundu tomak, hanesan mós espresaun ida hosi ha’u-nia konfiansa no kapasidade ita hotu nian atu tuur hamutuk hanesan maun-alin no fó liman ba malu, inklui entre relijiaun sira-ne’ebé iha fiar la hanesan.

Solidariedade, laran-luak no karidade ba sosiedade nia ema kbiit-laek sira hanesan valór espirituál ne’ebé ita tau aas tebes. No valór sira-ne’e sai hanesan prinsípiu fundamentál ba koezaun sosiál no armonia iha rai-laran.

Nu’udar Prezidente Repúblika ha’u sei fó valór nafatin ba kapasidade ema hotu nian – imi Baha’i, hamutuk ho relijiaun seluseluk – atu fó liman ba malu, hamutuk serbí komunidade no serbisu maka’as atu hadi’ak futuru ita-nia rain nian.

Ha’u saúda dala ida tan Baha’i sira no hato’o ha’u-nia votus boas festas, ho espíritu servisu no domin ba ema seluk iha ida-idak nia fuan laran.

Obrigadu barak, ho domin.

 

Dili, 10 Outubru, 2017

 

 

 

 

 

FRANCISCO GUTERRES LÚ OLO

PREZIDENTE REPÚBLIKA DEMOKRÁTIKA TIMOR-LESTE