ALMAMOR Hasoru Prezidente-da-Repúblika

by prtlwebmaster Posted on

ALMAMOR Hasoru Prezidente-da-Repúblika

Palásiu Prezidente Nicolau Lobato Bairru-Pite, loron-13 fulan Outubru, Prezidente Assosiasaun Nasionál -de- Muzika Timor-Leste, ALMAMOR, Henrique do Rosário ho nia estrutura, hasoru malu ho Prezidente-da-Repúblika Francisco Guterres Lú Olo.

Iha reniuan ne’e Henrique do Rosario aprezenta relatóriu rezultadu Kongressu , Estrutura no Planu Asaun ALMAMOR tinan 2017-2022 ba Prezidente-da-Repúblika.

ALMAMOR sujere ba Xefe-de-Estadu atu fó hanoin ba Parlamentu Nasionál hodi prosesa lalais pareser husi ALMAMOR atu nune’e organizasaun múzika timoroan nian ne’e bele iha matadalan-serbisu ida. Pareser ALMAMOR nian ne’e diskuti ona iha III Lejislatura.

ALMAMOR espera iha futuru planu no programa sira nian bele submete iha Ministériu ida, atu nune’e bele asegura ALMAMOR hanesan uniku mahon ba artista no muzíku timoroan sira.

Hafoin rona tiha aprezentasaun no rekomendasaun husi delegasaun ALMAMOR, Prezidente-da-Repúblika hatete nia sei hato’o programa ALMAMOR nian ba Governu.

“Iha inkontru semanál ho Primeiro Ministru, ha’u sei hato’o diretamente ba Primeiru Ministru tanba programa ida ne’e tuir politika no Programa VII Governu Konstitusionál nian”, Prezidente-da-Repúblika hatete.

Mídia PR