Embaxadór foun Japaun Aprezenta Kredensial ba Prezidente-da-Repúblika

by prtlwebmaster Posted on

 

Palásiu Prezidente-da-Repúblika Nicolau Lobato, Bairro Pite, loron-17 fulan-Outobru Embaxadór foun Japaun Hiroshi Minami aprezenta kredensiál ba Prezidente-da-Repúblika Lú Olo.

Embaixadór Hiroshi Minami, sei hametin liutan kooperasaun entre nasaun rua ne’ebé dezde 2002 estabelese tiha ona ninia embaxada iha Timor-Leste. Governu Japaun nu’udar nasaun ida ne’ebé ativu tebes iha prosesu konstrusaun Estadu Nasaun Timor-Leste liuhusi nia ajensia kooperasaun Japan International Cooperation Agency (JICA). Governu Japaun liuhusi JICA apoiu prosesu dezenvolvimentu Timor-Leste iha setor públiku hanesan infraestrutura, iha governasaun no kapasitasaun servidór públiku.

Embaixador Hiroshi Minami, inisia nia karera diplomátika iha Ministeriu Asuntu Esternu iha 1983 hafoin konklui nia estudu iha Fakuldade Direitu Universidade Tokyo. Sai responsável ba portofolio iha nivel Koordenador Senior, Vise-Diretor iha divizaun oioin iha Ministériu to’o tinan-2004.

Iha tinan-2005 nu’udar konselleru ba Misaun Permanente ba Organizasaun Internasionál iha Viena iha tinan- 2008, nomeadu nu’udar Embaixador ba Misaun Permanente ba Japaun iha ONU iha tinan-2014 no Enviadu Estraordinariu no Ministru Plenipotensiariu ba Misaun Permanente Japaun iha ONU iha tinan-2016.

Embaixador Hiroshi Minami sei hala’o nia misaun durante tinan tolu nia laran iha Timor-Leste (2017-2019).

Mídia PR