DISKURSU HOSI S.E. PREZIDENTE FRANCISCO GUTERRES LÚ OLO

by prtlwebmaster Posted on

DISKURSU HOSI S.E. PREZIDENTE FRANCISCO GUTERRES LÚ OLO
IHA LORON FÓ POSSE BA SRª MINISTRA JUSTISA, SR. MINISTRU NO SR.VISE-MINISTRU TURISMU, SRª VISE-MINISTRA PLANU NO FINANSAS NO SRª VISE-MINISTRA NEGÓSIUS ESTRANJEIROS NO KOOPERASAUN.

Dili, 17 Outubru 2017

Exelénsias
Señor Prezidente Parlamentu Nasional
Señor Prezidente Tribunal Rekursu
Señor Primeiru-Ministru
Señores Membrus Sétimu Governu Konstitusionál
Ilustres Membrus Korpu Diplomátiku
Digníssimus Reprezentantes hosi Konfisoens Relijiozas
Señoras no señores
Povu doben Timor-Leste

Ha’u hato’o ha’u-nia saudasaun boas vindas ba hotu-hotu iha ne’e no liuliu ba membru Governu na’in lima ne’ebé ohin simu posse, no nune’e, sei haforsa ekipa Sétimu Governu Konstitusionál.

Ho laran-ksolok mak ha’u hare’e maluk feto sira tama tan iha Governu. Sra Ministra ba Justisa, Srª Maria Ângela Carrascalão, Srª Vise-Ministra ba Planu no Finansas, Srª Sara Lobo Brites. Sra embaixadora Adaljiza Magno ne’ebé hetan nomeasaun iha 2 Outubru 2017, simu posse ohin, nu’udar Vice-Ministra Negósius Estrangeirus no Kooperasaun.

Área Justisa mak riin importante ne’ebé tanen Estadu- de-Direitu-Demokrátiku. Bainhira ita ema la iha asesu ba Justisa, ita labele koa’lia kona-ba demokrasia no Estadu- de- Direitu. Pasta justisa ne’e la’ ós fásil maibé ha’u konfia no hein katak Ministra Justisa sei haka’as-an no ita sei hetan rezultadus di’ak.

Ha’u saúda sra Embaixadora Adaljiza Magno, ne’ebé simu posse nu’udar Vise-Ministra Negósius Estranjeirus no Kooperasaun. Diplomata ne’e iha esperiénsia no reprezenta hela Timor-Leste iha Singapura. Nia sei haforsa liután ekipa Ministériu Negósius Estranjeirus no sei hasa’e koñesimentus kona-ba ASEAN iha Konsellu Ministrus no nune’e ita sei hatudu dia’k liután katak organizasaun ne’e importante tebes ba ita-nia polítika esterna.

Sektór Planu no Finansas iha dezafiu boboot. Sra Vise-Ministra, ne’ebé simu posse ohin, hatene oinsá hasoru dezafiu sira ne’e.
Governu haforsa-an liután iha área Turismu ho sr Dr Manuel Vong, nu’udar Ministru Turismu no sr Rui Meneses da Costa, nu’udar Vise-Ministru. Turismu ne’e prioridade estratéjika ida atu diversifika ita-nia ekonomia no haforsa kontribuisaun sektór emprezariál nian tamba sei hamosu liután empregu ba ita-nia ema no tanen liután ita-nia ekonomia.

Ita presiza sosializa no promove turismu istóriku, no mós rikusoin no ambiente moos ita-nia florestas nian. Halo ida ne’e ba mós ita-nia tasi no meti-ulun no ahu-ruin. Ita-nia istória, ne’ebé riku tebes, hamosu interese turístiku espesiál bainhira ema sukat ita-nia rain ho fatin turístiku sira seluk iha ita-nia rejiaun. Espesialista internasionál dehan mós katak tamba ita-nia ninia ambiente rai no tasi sei moos, Timor-Leste bele dada liu turista sira duke rai sira seluk. Ita bele dehan katak ita-nia ambiente moos ne’e fó liu vantájen kompetitiva ba Timor-Leste, iha área turismu. Ne’ebé, Señor Ministru no Señor Vise-Ministru, servisu di’ak ba hodi promove no haburas turismu nasionál.

Exelénsias,
Ha’u hakarak fó-hanoin Exelénsia sira no maluk sira hotu oinsá Sétimu Governu harii. Harii duni ho kuidadu tomak, liuhosi dalan ida ne’ebé buka unidade timoroan sira-nian, buka kuadrus ho kualidade, la hasees ema ida hosi dezenvolvimentu nasionál.
Prosesu harii Governu ida ne’e la’ós halo ho ansi, la’os dudu ba oin arbiru de’it no halo lalais de’it. Ha’u saúda S.E. Señor Primeiru-Ministru Mari Alkatiri ba ninia esforsu tomak, liuhosi diálogu no dalan ne’ebé nia rasik iha ona esperiénsia, atu hetan solusaun estável. Solusaun ida ne’ebé metin tebes ho hahalok di’ak ba hotu-hotu iha tempu naruk.

Justu tebes bolu atensaun ba ita-nia situasaun ohinloron: ita-nia país husu hotu-hotu ninia partisipasaun; no ita presiza estabilidade atu bele lori ba oin projetus dezenvolvimentu.
Ita-nia Estadu ninia maturidade, biar tinan sanulu resin lima de’it, hahú husi prosesu ida ne’ebé nakonu ho sakrifísiu, rezisténsia nasionál no unidade povu nian.

Durante ita-nia luta libertasaun, ita hotu aprende barak, líder sira no povu tomak. Ita aprende liuliu atu hasees-an hosi lia fuan sira ne’ebé fahe ita; ita aprende atu dada-an hosi radikalismu, ita la kaer metin de’it ita nia hanoin no hakarak maibé ita rona mós maluk sira seluk.

Iha tinan rua nulu resin hat nia laran no tinan sanulu resin lima nia laran, ita aprende katak di’ak liu halo kompromisu atu halibur ita-nia povu, hametin ita-nia país.

Ita-nia esperiénsia, maturidade no atuasaun ho kuidadu tomak mak loke dalan ba ita manán komunidade internasionál ninia fiar no respeitu ba Timor-Leste. Ita hakat tan pasu ida atu hametin ita-nia Estadu, liu uluk hosi prosesu arbitrájen internasionál no hatuir kedas ho negosiasaun ho ita-nia país viziñu, Austrália.

Prosesu ne’e simu tulun hosi ita hotu no sei simu nafatin. Ita manán tamba komunidade internasionál hare’e katak ita hamutuk atu haforsa ita-nia soberania nasionál no hametin ita-nia Estadu. Ho povu tomak nia naran, ha’u saúda líder negosiadór, ha’u-nia irmaun Kay Rala Xanana Gusmão, Ministru-Adjuntu ba Primeiru Ministru ba Asuntu Haketak Fronteiras, Sr Agio Pereira, no mós hotu-hotu ne’ebé tama iha ekipa negosiasaun Timor-Leste nian. Ha’u saúda mós vizaun no desizaun governu Australianu nian ne’ebé fó dalan ba rezultadu sira ne’ebé ita hetan ona no fó benefísiu ba parte hotu-hotu.

Exelénsias,
Serimónia tomada-de-posse ida ne’e hala’o bainhira Parlamentu Nasionál halo dadaun debate nakloke no transparente ba programa ne’ebé Sétimu Governu konsitusionál hato’o ba deputadu sira. Programa ne’e refere uluk liu ba susesu sira ne’ebé ita hetan ona hafoin ita UKUN RASIK AN.

Dokumentu ne’ebé entrega ba membrus Parlamentu Nasionál fó-hanoin susesus balun ne’ebé ita hetan ona, iha tinan sanulu resin lima:

“Ita moris iha páz no estabilidade laran. (…) Iha tinan sanulu ikus liu, tinan-tinan ekonomia sa’e ho ritmu médiu pursentu lima, biar ita-nia dezenvolvimentu sátan tiha tamba krize polítika iha tinan 2006 no resesaun internasionál iha 2007/2008.”

La iha rai seluk ida, ne’ebé foin independente, iha susesu boot hanesan Timor-Leste. Ita harii duni ekonomia ida ne’ebé inkluzivu no sustentável.

Ha’u hatete fila fali: Iha 2002, ita-nia PIB (Produtu Internu Brutu) naun-petrolíferu per capita dólar amerikanu atus neen lima nulu. Liu tiha tinan sanulu resin rua, aumenta ba rihun dólar ida.
Índise kiak tuun hosu pursentu lima nulu, iha tinan 2008, ba pursentu hat nulu resin rua ba kraik, iha tinan 2014.

Avansu sira ne’e seidauk natón. Maibé, Timor-Leste ninia dezenvolvimentu hakaat lais liu duke rai sira seluk ne’ebé foin independente. Ida ne’e halo ita orgulla no enkoraja ita hotu – Timor-Leste nia oan hotu-hotu.

Ita tenke kontinua servisu, ho dedikasaun no persisténsia, atu hasa’e kualidade servisu Estadu nian no hetan buat sira ne’ebé ita buka hetan ho dezenvolvimentu nasionál.

Programa Governu fó-sai katak Governu ida ne ‘e hakarak tebes ukun ba ema. Ukun ba ema inklui lori dezenvolvimentu ba suku dook sira, inklui harii infraestrutura ho kualidade, hadi’a asesu ba edukasaun no servisus saúde ho kualidade ba ema hotu-hotu; signifika hadi’a hahán, fó asesu ba eletrisidade no bee moos, aumenta uma ba ema hela, no hala’o polítika atu ajuda hamosu liután empregu.

Ita bele hetan objetivu sira ne’e. Nu’udar país, haree ba esperiénsia hosi kedas tinan 2002, ita bele dehan katak objetivus ne’ebé tama iha programa Governu, la’os aas liu maibé natón, tuir ita-nia kbiit. Objetivu sira ne’e realista. Tau iha ne’ebá tuir kondisaun rai ida ne’e nian, tuir Governu ninia kbiit.
Sétimu Governu Konstitusionál no ita-nia país tenke iha oportunidade atu hatudu katak ita iha kbiit atu halo duni. Tamba ne’e ha’u husu Parlamentu Nasionál no ba sidadaun sira atu lee programa Governu nian no fó ba país oportunidade atu kontinua hadi’a babeibeik nível dezenvolvimentu ba ita-nia sosiedade.

Ita-nia kondisaun vida la ‘ós hadi’a ho lia fuan kroat. Ita hadi’a ho dedikasaun, ho servisu, ho estabilidade sosiedade nian.
Ha’u husu korájen no persisténsia ba maun, bin, alin sira iha ita-nia país tomak, atu ita manán dezafius dezenvolvimentu nasionál.

Ba membrus Governu tomak, ha’u hato’o votus ba servisu di’ak no kooperasaun institusionál. Iha faze ohinloron vida país nian, kooperasaun institusionál sai prioridade boot ida ne’ebé ita presiza atu hadi’a funsionamentu Estadu no haforsa armonia sosiál, ne’ebé ita presiza atu hala’o planus dezenvolvimentu.
Maromak sei leno ita-nia dalan no sei fó bensaun ba ita hadi’a babeibeik ita-nia moris loronloron. Atu moris mós ho dame no domin ba malu.

Ha’u hakotu ho apelu ida ba ha’u-nia maluk timoroan sira hotu.
KO’ALIA OITUAN, HALO MAK BARAK!
HALO DADAUN, HALO NAFATIN,
HALO DI’AK LIUTÁN!

Obrigadu.