Associação Juventude Hadomi Natureza Hasoru malu ho PR

by prtlwebmaster Posted on

Associação Juventude Hadomi Natureza Hasoru malu ho PR

Palasiu Prezidente Nicolau Lobato, loron-23 fulan-Outubru, Asosiasaun Juventude Hadomi Natureza (A-JHN) hala’o reniuan ho Prezidente-da-Repúblika Francisco Guterres LúOlo.

Objetivu husi reniuan ne’e maka atu aprezenta ezisténsia no programa husi A-JHN ba Xefe-de-Estadu no iha tempu hanesan, atu rona mós opiniuan husi Prezidente-da-Repúblika kona-ba formasaun karakter ba juventude sira iha Timor Leste.

Prezidente A-JHN Flaviano da Costa Silva informa, atividades sira ne’ebé hala’o husi A-JHN mak aprende siénsia, oinsá atu explora rikusoin minerais sira hanesan fatuk no atividades adventura hanesan sa’e foho, tama fatuk-kuak, long March no halo sosializasaun ba komunidade sira atu kuda ai-oan hodi preserva Natureza. Atividades hirak ne’e A-JHN hala’o ona dezde tinan 2014 to’o agora.

Prezidente-da-Repúblika apresia tebes ba atividades sira husi Asosiasaun Juventude Hadomi Natureza, ne’ebé integra valóres oioin, tanba ne’e Xefe-de-Estadu husu ba Asosiasaun Juventude Hadomi Natureza atu kontinua hala’o sira-nia atividades hodi transmite ba ema seluk kona-ba importánsia husi valores ne’ebé sira hakarak transmite.

Prezidente-da-Repúblika mós sujere atu A-JHN bele produz iha brosura atividades ne’ebé sira hala’o atu nune’e bele sai hanesan referénsia hodi bele atrai turista no investores mai Timor Leste.

Aleinde hato’o atividade sira ba Prezidente-da-Repúblika, A-JHN mós husu Prezidente-da-Repúblika ninia apoiu atu fasilita hodi harii sekretariadu permanente no fasilidade transporte hodi akomoda sira-nia atividades ne’ebé hala’o iha fatin-dook, hanesan iha Munisipiu.

Ba rekomendasaun hirak ne’e Prezidente-da-Repúblika hatete sei tau iha konsiderasaun no husu ba A-JHN atu hato’o mós relatóriu-atividades ba nia, atu nune’e bele hatene dezenvolvimentu husi asosiasaun ne’e.

Mídia PR