Forum Lideransa Komunitariu hato’o preokupasaun ba PR

by prtlwebmaster Posted on

 

Palásiu Prezidente Nicolau Lobato Bairru-Pite, loron-24 fulan- Outubru, Forum Lideransa Komunitáriu hasoru malu ho Prezidente-da-Repúblika Francisco Guterres LúOlo hodi hato’o sira-nia preokupasaun.

Preokupasaun ne’ebé Xefe Suku sira hato’o mak relasiona ho kobransa ba reseita ka impostu tuir Lei Suku No 9/ 2016 iha artigu 80. Lei fó dalan ba Xefe Suku sira atu halo kobransa atu hetan reseita, maibé lei refere ladun fó serteza ba sira hodi hala’o kna’ar ne’e.

Alemde ida ne’e, autoridade suku sira mós lamenta ho insentivas señas no subsidiu ba autoridade suku la lakondis ho situasaun atuál. Porta-Voz Forum Komunitáriu Marcelino Soares, atuál Xefe Suku Fatuhada, katak Xefe Aldeia sira simu de’it subsidiu $100. Lei Traballadór defini salariu minimu mak $115 fulan-fulan.

Xefe-de-Estadu tau iha konsiderasaun no husu atu Lideransa Komunitáriu hakerek sira-nia preokupasaun atu bele sai hanesan baze legál no haruka ba Xefe-de-Estadu hodi bele hato’o ba Governu liuhusi sorumutuk regulár ho Primeiru Ministru.

Reprezentante Xefe Suku sira rekomenda ba Prezidente-da-Repúblika atu hala’o reuniaun anuál nu’udar forum ba hato’o preokupasaun husi komunidade.

Hatan ba pedidu ne’e, Prezidente –da-Repúblika konkorda ho ideia ne’e atu bele organiza sorumutuk kada fulan tolu ou fulan nen hodi bele hasoru malu ho Xefe Suku sira.

Iha sorin seluk, Prezidende-da- Repúblika hatete nia kontente tebes hasoru malu ho Forum Lideransa Komunitariu sira tanba ne’e parte husi komprimisiu polítiku atu hasoru malu ho organizasaun ne’ebé deit hodi ko’alia kona-ba situasaun sira iha rai-laran. Prezidente-da-Repúblika louva serbisu sira ne’ebé Xefe Suku sira hala’o difisil liu serbisu Prezidente-da-Repúblika nian tanba kuaze loroloron sempre enfrenta problema iha terenu.

Xefe-de-Estadu husu ba iha Xefe Suku sira atu labele serbisu ketak, maibé halo enkuadramentu planu no programa ba iha polítika Governu hodi defende povu nia interese.
Xefe-de-Estadu husu ba Forum Lideransa Komunitariu hato’o mensajen ba Xefe Suku sira seluk atu hametin nafatin pás no estabilidade iha rai-laran.

Mídia PR