Defisiente sira hato’o preokupasaun ba Xefe-de-Estadu

by prtlwebmaster Posted on

 

Palásiu Prezidente Nicolau Lobato, loron-9 fulan-Novembru, Associação Halibur Defisiensia Matan Timor-Leste (AHDMTL), hasoru malu ho Prezidente-da-Repúblika Francisco Guterres Lú Olo hodi hato’o sira-nia preokupasaun.

Iha enkontru ne’e reprezentante AHDMTL informa kona-ba ratifikasaun konvensaun Internasionál Direitu Ema ho Defisiensia ne’ebé to’o agora seidauk estabelese no implementasaun programa Governu nian ba ema ho defisiensia ne’ebe la tuir polítika ne’ebé iha.

Jerente AHDMTL Gaspar Afonso informa katak iha tiha ona polítika Governu ba ema defisiente sira, maibé ninia implementasaun seidauk la’o. Reprezentante AHDMTL husu oinsá bele iha espasu ba sira atu kontribui iha prosesu dezenvolvimentu ho kbiit rasik.

Jerente ADHMTL husu ba Xefe-de-Estadu atu uza nia kompeténsia tomak tuir konstituisaun hodi haforsa lian defisiensia ba Governu tuir lei haruka. Organizasaun ne’e ejize sira-nia partisipasaun iha prosesu konstrusaun nasaun.

Prezidente-da-Repúblika kontente tebes tanba bele hasoru reprezentante Associação Halibur Defisiensia Matan Timor-Leste (AHDMT) hodi hatete:

“Ha’u hatene katak imi bele la haree mundu maibé ha’u hatene, imi moris iha mundu, imi moris iha Timor, imi sente imi nia-an katak imi hanesan timoroan. Ha’u haklosok boot tebes hodi ko’alia liafuan ida ne’e ba imi, imi hanesan mós ami sira ne’ebé haree ita-nia rai no ita-nia povu”

Prezidente-da-Repúblika sei hato’o preokupasaun ema defisiente ba Primeiru Ministru iha enkontru sira tuirmai.
Reprezentante organizasaun ne’e husu atu Prezidente-da-Repúblika bele halibur ukun na’in sira atu buka solusaun ba situasaun polítika hafoin Programa Governu la passa.

Mídia PR