DISKURSU HOSI S.E. PREZIDENTE FRANCISCO GUTERRES LÚ OLO IHA SEGUNDU KONGRESU COMITÉ DE 12 NOVEMBRO

by Mídia PR Posted on

DISKURSU HOSI S.E. PREZIDENTE FRANCISCO GUTERRES LÚ OLO
IHA SEGUNDU KONGRESU COMITÉ DE 12 NOVEMBRO

Centro de Convenções de Díli, 7 Novembru 2017

Exelênsias,
Señor Primeiru-Ministru Dr Mari Alkatiri
Señor António Sarmento, Vise-Prezidente Parlamentu Nasional,
Señor Gregório Saldanha, Prezidente Comité de 12 Novembro
Membrus Komisaun Organizadora Segundu Kongresu
Comité 12 de Novembro
Señores Reprezentantes hosi Konfissoens Relijiozas
Señores konvidadus
Maun, bin, alin sira hotu

Uluk liu, ha’u hakarak hato’o ha’u-nia hakoak boot no haksolok espesiál ba Comité 12 de Novembro, sobreviventes massakre Díli nian no ba família vítimas hotu-hotu nian, ne’ebé ohinloron sei halerik hela.

Ha’u aproveita mós oportunidade ida ne’e hodi hato’o ha’u-nia saudasaun ba Juventude Lorico Asuwa’in, namokari iha ita-nia rai doben Timor-Leste, hosi fronteira to’o Ponta Leste, hosi tasi-mane to’o tasi-feto, liuhosi Oecusse no Ataúro. Hanesan mós iha rai sira seluk, ita-nia Juventude mak itahotu ninia forsa ohinloron, ita-nia garantia atu moris di’ak liu abanbairua.

Ho honra no orgullu mak ha’u halo abertura ba Segundu Kongresu Comité 12 de Novembro nian, ho presenza líderes istórikus, líderes partidus polítikus ho asentu iha Parlamentu Nasionál, membrus órgauns soberania nian, reprezentantes hosi instituisaun públika sira, hosi organizasaun oinoin hosi ita-nia sosiedade sivíl no hosi rai liur no mós korpu diplomátiku.

Eventu ida ne’e halibur lideransa rai ida ne’e nian no joven sira hosi Timor-Leste tomak. Tamba eventu ida ne’e halibur jerasaun tuan no jerasaun foun, ha’u hakarak fó hanoin uluk aspetu importante ida, iha ita-nia luta libertasaun nasionál. Hotu-hotu ne’ebé partisipa iha luta libertasaun nasionál hatene sá difikuldade mak ita hasoru durante tinan rua nulu resin hat nia laran. Ita hotu hatene mós katak ita konsege hakat difikuldade hotu-hotu tamba ita-nia espíritu nasionalista, ita-nia determinasaun, ita-nia brane, ita-nia domin ba nasaun no povu ida ne’e. Iha tempu luta, ita la iha Konstituisaun no leis ne’ebé ita iha ohin loron. Iha tempu ne’ebá, ita buka malu, ko’alia ba malu no tau ita-nia matenek hamutuk, atu buka-hetan solusaun ba problema ne’ebé mosu iha faze luta ida-idak no sirkunstánsia luta ida-idak.

Espíritu nasionalista, domin ba ita-nia povu no ba ita-nia nasaun mak lori joven sira la tauk see-an ba mate iha loron sakrifísiu 12 Novembru 1991, iha lurón Dili nian no iha rate Santa Cruz. Saldu ladi’ak hosi loron sakrifísiu no loron istóriku ida ne’e, mak ita-nia joven liu atus rua mate, barak hetan kanek no barak lakon to’o ohin loron. Biar iha konsekuénsia todan tebes ba família sira

no ba povu no estadu Timor-Leste tomak, masakre Dili halo ita-nia luta avansa liután tamba hosi loron ne’e ba oin, mak komunidade internasionál fó liután atensaun ba ita-nia luta libertasaun nasional. Hafoin masakre Dili mak ema barak foin hahú loke matan katak povu Timor-Leste hamriik organizadu no determinadu atu UKUN RASIK AN.

Importante fó-hanoin mós ohin katak rekoñesimentu internasionál ida ne’e la akontese se ita la iha belun brane balun hamutuk ho ita. Ida mak Max Stahl ne’ebé brane filma massakre 12 Novembru no halo no fahe filme ida kona-ba ita-nia istória luta libertasaun; Saskia Kouwenberg, jornalista holandeza ne’ebé arriska-an lori sai filme Max Stahl nian ba rai liur. Kamal Bamadhaj ne’ebé la tauk marxa ho ita-nia joven sira no hetan tiru no mate; Amy Goodman, Allan Nairn no Russel Anderson, ne’ebé marxa mós hamutuk ho ita-nia ema no lori ba rai barak, mensájen joven sira-nian, iha 12 Novembru 1991.

Belun barak seluk, sura rohan laek, hosi ita-nia rede internasionál solidariedade, iha rai oinoin, hatutan babeibeik asaun organizada joven sira-nian, iha 12 Novembru 1991.
Hosi hahalok sira ne’e hotu, mak husi 12 Novembru 1991, movimentu solidariedade internasionál mós haforsa babeibeik no liu tiha tinan ualo, ita hetan UKUN RASIK AN, liuhosi referendu ka konsulta popular. Ba solidariedade internasionál iha tempu difísil ida ne’e, ha’u husu SALVA DE PALMAS husi konferensista sira hotu.

Ita UKUN AN ONA tinan sanulu resin lima. Ita hasoru dezafiu oinoin iha tinan sanulu resin lima nia laran. Dezafiu sira ne’e halo parte vida ita hotu nian, povu nian, estadu tomak nian. Ho orgullu mak ha’u dehan katak ita konsege hakat dezafiu ne’ebé de’it. Tambasá? Tanba ita tau hamutuk ita-nia neon no matenek, atu serví ita-nia Nasaun no ita-nia Povu.
Maluk Konferensista sira!
II Kongressu Comité 12 de Novembro hala’o iha momentu ida ne’ebé deputadu sira sei haksesuk malu hela, seidauk tais didiak oinsá tau hamutuk sira-nia matenek, nu’udar bankada parlamentár apoia Governu no bankada parlamentár halo opozisaun ba Governu.

Hafoin programa VII Governu nian hetan mosaun rejeisaun hosi partidu opozisaun, CNRT, PLP no KHUNTO, ha’ u simu pedidu audiénsia barak hosi grupu oin-oin. Maluk sira ne’e hato’o sira-nia preokupasaun oin-oin. Ha’u simu surat oin-oin ho intensaun atu ajuda ha’u atu hakat dezafiu foun ne’ebé mosu ho rezultadu eleisaun parlamentar halo iha 22 Jullu 2017. Ha’u rona no média mós fó-sai katak ita-nia sidadaun sira ko’alia no haksesuk malu, iha fatin barabarak, kona-ba formasaun VII governu.

Ha’u kontente tebes tamba haree katak sosiedade sivíl ativu tebetebes. Sidadaun barak la halo parte partidu polítiku maibé iha interese iha polítika, hakarak partisipa iha debate no vida polítika rai ida ne’e nian. Movimentu ida ne’e hamanas ita hotu nia laran atu hakarak hatene liután Konstituisaun, ita-nia lei inan no lei sira seluk. Movimentu ida ne’e signifika katak ita-nia povu la’ ós hakarak vota de’it tinan lima-lima. Sira hakarak ukun-nain sira rona mós sira, konsulta sira, haksesuk ho sira sá polítika mak di’ak liu ba sira-nia moris ohinloron no abanbairua.

Nune’e, la’ós partidu polítiku sira de’it mak tenke hala’o diálogu permanente ho komunidade sira. Órgaun soberania katak Prezidente Repúblika, Parlamentu no Governu tenke haree mós oinsá halo diálogu permanente ho sosiedade, liuhosi kontaktu diretu, katak ema ba ema no liuhosi meiu komunikasaun sosiál.
Maluk kongresista sira,
Idéias oinoin ne’ebé mosu iha prosesu hanoin-lesuk kona-ba formasaun ba ita-nia Governu, ba mandatu 2017-2022, depende hosi hanoin-nain ninia pozisaun polítika rasik. Ha’u haree katak maluk balun buka interpreta Konstituisaun RDTL tuir ajenda partidu polítiku ida-idak nian. Tendénsia ida ne’e halo ha’u laran taridu tamba bele hamosu risku atu haree liuliu ba interese partidu nian duke ba interese nasional.

Ha’u fó-hanoin liuliu ba partidu polítiku sira katak, molok eleisaun lejislativa, iha loron 16 Juñu 2017, partidu polítiku rua nulu resin ida hatán ha’u-nia apelu no sira asina iha ha’u-nia oin, deklarasaun konjunta ida, ho pontu sanulu resin ida, iha Palásiu Prezidensiál. Pontu ualo hatete: “Partidu polítiku sira sei hakruuk ba desizaun sidadaun sira nian ne’ebé hatún liuhusi sira-nia votus iha eleisaun ida ne’ebé livre no demokrátiku.”

Nu’udar Prezidente Repúblika, ne’ebé hadomi povu no nasaun ida ne’e, molok ha’u foti ha’u nia desizaun polítika kona-ba formasaun governu, ha’u lee no interpreta didi’ak artigu sira ne’ebé kait ba malu iha Konstituisaun RDTL, kona-ba formasaun Governu no ha’u-nia kompeténsia ba knaar ida ne’e.

Artigu 106 Konstituisaun RDTL fó kbiit no kompeténsia tomak mai ha’u, nu’udar Prezidente Repúblika, atu hili partidu ne’ebé manán eleisaun ho votus barak liu ka aliansa partidu sira ho maioria parlamentár. Partidu ne’ebé manán eleisaun mak FRETILIN. Biar nune’e, ha’u la bolu kedas FRETILIN atu forma VII governu. Hafoin rezultadu eleisaun fó-sai iha Jornal Repúblika, iha 1 Agostu 2017, ha’u bolu kedas partidu polítiku lima ne’ebé hetan assentu iha Parlamentu Nasional, atu rona ida-idak ninia perspetiva polítika, haree ba rezultadu eleisaun lejislativa ikus liu.

Haree ba ambiente simu malu hosi partidu hotu-hotu, ha’u foti desizaun polítika nomeia Dr Mari Alkatiri, nu’udar Primeiru-Ministru RDTL ba mandatu 2017-2022.
Hafoin negosiasaun ba mai, partidu PD deside avansa ho FRETILIN, partidu ne’ebé manán eleisaun lejislativa, atu UKUN tinan lima tuir mai.

Partidu opozisaun CNRT, PLP no KHUNTO, ida-idak deklara beibeik no momoos ba ha’u katak sira sei halo opozisaun konstrutiva. Posizaun ida ne’e signifika katak CNRT, PLP no KHUNTO sei fó apoiu insidénsia parlamentar, katak biar sira deklara-an nu’udar partidu opozisaun , sira hakarak ajuda VII Governu hala’o knaar ba hadi’a povu nia moris durante tinan lima tuir mai.

Ha’u fó ona posse dala tolu ba membrus VII Governu no prosesu ne’e kompletu ona.

Iha sistema demokrátiku hanesan ita nian, ita bele iha governu ho maioria ka Governu ho minoria. Foin dala ida ne’e mak ita foin hasoru situasaun harii governu ho minoria ba tinan lima. Maibé governu ho minoria bele funsiona no bele UKUN ho di’ak se iha vontade atu kontribui hosi parte hotu-hotu. Problema boot liu la’ós governu maioria ka minoria, opoziaun forte ka fraku. Problema importante liu mak oinsá ita iha relasaun ba malu atu tanen aas ita-nia interese nasionál. Bainhira ita ko’alia kona-ba interese nasional, ita haree uluk liu ba programa dezenvolvimentu ba tinan lima no Orsamentu Jeral Estadu atu implementa planu asaun ba tinan ida-idak. Signifika ita tenke tau ita-nia matenek hamutuk atu tulun no hala’o programa dezenvolvimentu ba hadi’a babeibeik povu ninia moris, ita hotu ninia moris, ohinloron no abanbairua.

Diálogu importante tebes atu garante demokrasia no susesu ba governu ida ne’ebé de’it. Maibé diálogu labele iha susesu se parte ida la sé oin ka lakoi rona parte seluk.

Maluk balun hanoin katak númeru deputadus mak faktór importante ka desizivu liu ba estabilidade ba Governu ne’ebé de’it. Di’ak liu ita tau atensaun mós ba faktór sira seluk. Deputadu sira uza liberdade atu harii Bloku ka Aliansa ne’ebé de’it, bele halibur númeru deputadus boot, biar liu maioria absoluta, ida ne’ la garante katak governu ida bele to’o rohan. Se interese nasionál la tau iha leten, sei korupsaun buras babeibeik, se dezempregu aumenta, problema kiak la rezolve, governu ne’ebé de’it, bele monu tamba la satisfáz eleitoradu ninia hakarak. Iha rai balun, Governu monu tamba movimentasaun hosi sosiedade sivíl rasik.

Ha’u hatene no tetu buat sira ne’e hotu maka ha’u hahú kedas apela no fó-sai mensájen ka diskursu hodi husu ba líderes partidus sira atu hamutuk fó liman ba malu!
Maluk Kongresista sira,
Comité 12 de Novembro hala’o Segundu Kongresu iha momentu ida ne’ebé mosu rumor oin-oin, nakonu ho lia bosok, ho intensaun atu hatauk ema, halakon ita-nia fiar ba malu, atu fahe ita.

Ha’u fiar katak alin sira sei haree durante Kongresu ida ne’e oinsá organiza-an iha ita-nia UKUN AN IDA ne’e, oinsá hasa’e aas no hatutan espíritu sakrifísiu hosi sira ne’ebé husik hela raan no ruin naklekar iha Timor-Leste tomak.
Ohin maluk sira hahú Kongresu ba dala rua ho tema “Hamutuk Ita Luta ba Moris Diak”.

Tuir relatóriu Komité 12 Novembru nian ba II Kongressu, alin sira la’ós de’it rejista no verifika dadus sobreviventes, identifika no rekolla ruin no fó apoiu ba família vítimas sira nian. Comité 12 de Novembro servisu no kolabora hamutuk ho governu RDTL no ho sosiedade sivíl, instituisaun internasional, media, igreja, universidades no partisipa mós iha atividade desportiva. Nune’e Comité ne’e kontribui mós ba haforsa dezenvolvimentu rai ida ne’e nian.

Ha’u fiar katak hakarak ida ne’e sei la husik monu espíritu sakrifísiu matebian sira nian ba rai ida ne’e. Hamutuk ita bele haburas rai ida ne’e atu hadi’a babeibeik povu tomak ninia moris ohinloron no abanbairua.

Tema ida ne’e iha ligasaun ba prosesu UKUN rai ida ne’e. Ita presiza Governu ida ho programa dezenvolvimentu di’ak ida, Governu ida ne’ebé hadook an hosi korrupsaun, koluzaun no nepotismu ka KKN, Governu ida ne’ebé foka liuliu ba interese nasionál, governu ida ne’ebé tau matan ba povu tomak ninia moris di’ak .

Ha’u hatene katak joven sira ne’ebé inan-aman no maun ka sira rasik partisipa iha luta, ohinloron sei haree nafatin ba líder istóriku sira nu’dar matadalan ba sira-nia hahalok no sira-nia hanoin ba futuru rai ida ne’e nian, iha aspetu hotu-hotu. Maibé tempu to’o ona mós atu Juventude prepara- an atu kaer UKUN ba rai ida ne’e. Prepara-an iha tinan lima tuir mai atu kaer UKUN hosi 2022 ba oin. Atu preparasaun ne’e iha susesu, ita hotu tenke buka haforsa ita-nia instituisaun sira, haforsa partidu polítiku sira. Signifika mós katak líder sira hotu, liuliu líder istóriku sira, irmaun Mari, irmaun Xanana, irmaun Taur, irmaun Ramos Horta, irmaun Lere no ha’u rasik, tenke tuur hamutuk atu haree oinsá prepara Loriku Asuwa’in sira atu kaer UKUN hosi 2022 ba oin.

Haree ba importánsia líderes sira-nian, nu’udar Prezidente Repúblika, ha’u sempre sé tilun ba sira hotu. Ha’u sei halibur fila fali ho sira hotu. Ha’u haruka ona konvite ba irmaun Mari Alkatiri, Sekretáriu-Jeral FRETILIN, irmaun Xanana Gusmão,

Presidente CNRT no irmaun Taur Matan Ruak, Prezidente PLP, atu mai halibur ho ha’ u iha 15 Novembru 2017. Ha’u sei rona lai sira keta-ketak. Ida ne’e mak ha’u-nia esforsu rasik no ha’u fiar katak sira sei hatán ho di’ak.

Ha’u fiar katak sira sei fó liman ba malu. Katak partidu opozisaun sei apoia programa VII Governu no Orsamentu Jerál ba Estadu, tuir sira-nia kompromisu, molok ha’u fó pose ba VII Governu. Ha’u fiar mós katak VII Governu sei akomoda hanoin no hakarak opozisaun nian, no ita hamutuk, sei habelar dezenvolvimentu sosiál no ekonómiku, hodi nune’e ita lori ba oin dezenvolvimentu ida ne’ebé bele fó benefísius ba povu tomak, la’ ós ba ema balun de’it.

Ha’u fiar katak Juventude Lorico Asuwa’in, namokari iha Timor-Leste tomak, sei kaer metin nafatin espíritu nasionalista ne’ebé hametin ita, nu’ udar Povu ida ho hakarak ida de’it: ITA BELE UKUN RASIK-AN, UKUN HO DOMIN NO RESPEITU BA MALU, UKUN BA MORIS DIAK POVU NIAN.

Haktuir…Habelar…no Hametin valores no prinsípius luta nian!
Parabéns no votus susesus ba Comité 12 de Novembro nia Segundu Kongresu Nasionál ida ne’e.