MENSAJEN HOSI S.E. PREZIDENTE FRANCISCO GUTERRES LÚ OLO IHA LORON NASIONÁL JUVENTUDE

by prtlwebmaster Posted on

MENSAJEN
HOSI S.E. PREZIDENTE FRANCISCO GUTERRES LÚ OLO
IHA LORON NASIONÁL JUVENTUDE

Rate Santa Cruz, Dili, 12 Novembru 2017

JUVENTUDE TIMOR-LESTE.
Iha Loron Nasionál Juventude ida-ne’e, nu’udar Xefe Estadu, ha’u hakarak hato’o ha’u-nia hako’ak boot ba foin-sa’e hotu-hotu, oan doben Timor-Leste nian, namkari iha ita-nia rai laran no mós ba sira-ne’ebé estuda ka servisu iha rai-li’ur.
Manifestasaun ne’ebé halo iha 12 Novembru 1991 akontese tamba iha tiha ona movimentu ida hosi foin-sa’e brani sira, hasoru okupasaun no violasaun dignidade povu nian.

Masakre la akontese de’it iha Santa Cruz iha 12 Novembru 1991 no loron sira tuir. Masakre seluk tan akontese iha fatin sira seluk. Maibé masakre Santa Cruz filma hosi jornalista brani ida. Jornalista internasionál hanesan ita-nia belun Max Stahl no seluseluk – hanesan ita-nia belun Allan Nairn, Amy Goodman no Saskia Kouwenberg – sai sasin no/ka fó-hatene akontesimentu ne’e iha rai li’ur.

Imajen masakre nian lori-sai subar, hosi Timor-Leste ba rai-li’ur.
Imajen sira-ne’e, fó-hatene ba mundu tomak, joven sira-nia aten-brani no masakre Santa Cruz; fó-hatene mós saída mak akontese iha ita-nia rai doben Timor-Leste, iha momentu ne’ebá.

Ha’u hakru’uk ba memória juventude loriku asuwa’in ne’ebé fó-an ba mate iha rate Santa Cruz no mós ba sira ne’ebé mate iha momentu sira seluk durante ita-nia prosesu luta ba UKUN RASIN-AN.

Ha’u hato’o ha’u-nia hako’ak boot ho sentimentu kle’an ba família sira-ne’ebé sei laran taridu tanba lakon sira-nia oan, iha prosesu luta hodi tanen aas povu nia dignidade no ita-nia independénsia, la’ós iha Santa Cruz de’it maibé iha mós fatin seluseluk.

Rikusoin boot liu ne’ebé ita-nia juventude hetan, ho povu ninia vitória, mak pás no independénsia ne’ebé ita hetan ona!
Murak boot liu ne’ebé independénsia lori ba jerasaun foun sira mak respeitu ba dignidade Timoroan hotu-hotu nian, inklui ba foin-sa’e sira, hodi dezenvolve nasaun no garante ita-nia povu nia moris-di’ak.

Horiuluk kedas, povu sempre hakarak hadi’a ninia kondisaun moris no halakon kiak iha ita-nia rain.

Horiuluk, iha tempu masakre Santa Cruz, luta ba hadi’a kondisaun moris signifika luta ba liberdade no independénsia.
Ohinloron, tanba ita restaura ona independénsia, ita-nia luta ba hadi’a kondisaun moris signifika hametin dame hodi dezenvolve babeibeik ita-nia rain no ita-nia kondisaun moris di’ak no fó moris-di’ak liu ba ita-nia oan no bei-oan sira.

JUVENTUDE TIMOR-LESTE!
Hanesan ha’u hatete iha ha’u-nia nia tomada-de-pose, nu’udar Prezidente Repúblika, ha’u sei fó atensaun másima ba kestaun sira-ne’ebé iha relasaun ho Juventude.

Ha’u hato’o fila fali ha’u-nia kompromisu tomak katak ita presiza promove lalais polítika hirak ne’ebé haree ba inkluzaun joven sira-nian – liuliu iha área Edukasaun, Formasaun Profisionál no Harii Empregu ba foin-sa’e sira, Abitasaun, bee-moos no seluk tan. Prioridade sira-ne’e importante tebes atu hadi’a kondisaun moris ba foin-sa’e sira.

Prioridade sira-ne’e tenke hako’ak joven hotu-hotu, lahó diskriminasaun, katak la hasees joven ne’ebé de’it. Importante tebes lori foin-sa’e sira, feto no mane, atu hetan asesu ba edukasaun no oportunidade empregu di’ak liu.

Dezenvolvimentu ezije ema hotu-hotu nia partisipasaun. Nune’e, prioridade nasional ida mak ita tenke hasa’e joven sira-nia partisipasaun iha prosesu dezenvolvimentu iha munisípiu hotu-hotu no iha RAEOA (Rejiaun Administrativa Espesiál Oecusse-Ambeno).

Nu’udar Prezidente Repúblika, ha’u sei servisu maka’as no koopera ho Governu no Parlamentu Nasionál hodi hala’o desentralizasaun; hasa’e investimentu no dezenvolvimentu, inklui kria kampu-de-traballu iha munisípiu 12; no kontinua dezenvolve nafatin RAEOA.

Edukasaun, Formasaun Profisionál no oportunidade Empregu di’ak liután mak sei kontribui di’ak liu ba haburas juventude. Ita presiza fó atensaun liután ba setór tolu ne’e.

Ha’u sei servisu maka’as liután atu apoia governu hodi hasa’e kualidade edukasaun nian, apoia profesór sira iha territóriu laran tomak no habelar liután oportunidade ba formasaun profisionál iha munisípiu hotu-hotu no iha RAEOA.

Timor-Leste presiza joven sira ne’ebé preparadu atu hatán ba nesesidade sira atu dezenvolve agrikultura iha Timor-Leste tomak. Presiza mós empreza sira ho susesu, liuliu iha setór turismu, setór ne’ebé iha potensiál aas atu dezenvolve liután iha tinan sira oin mai.

Ita presiza prepara di’ak liután ita-nia joven sira atu hatán ba dezenvolvimentu iha área sira-ne’e no sira seluk, iha ekonomia no iha ita-nia sosiedade.

JUVENTUDE TIMOR-LESTE.
Hanesan ha’u hatete tiha ona, ha’u sei servisu maka’as atu reforsa respeitu ba sidadaun hotu-hotu nia dignidade.
Respeitu ba ema ninia dignidade inklui mós fó oportunidade hanesan ba foin-sa’e atu hetan asesu ba formasaun profisionál, ba empregu no ba bolsa-estudu.

Nasaun nia dezenvolvimentu ezije Estadu atu haree no fó kbiit ba joven sira no sidadaun hotu-hotu, tuir ida-idak ninia méritu no kualidade profisionál ka eskolár, atu sira bele sai ema ho nia valór rasik ba povu Timor-Leste.

Joven sira bele konta ho Prezidente Repúblika no ita hamutuk, sei luta hasoru KKN (korrupsaun, koluzaun no nepotizmu), iha nivel hotu-hotu.

Atu dezenvolve ita-nia rain ita presiza hakmatek-an no moris ho espíritu dame. Demokrasia fó dalan atu iha hanoin polítiku oinseluk. Normál ita ida-idak no ka grupu ida-idak iha programa oinseluk, atitude oinseluk ka opiniaun oinseluk.

Maibé, nu’udar Prezidente Repúblika, ha’u apela ba diálogu, atu sidadaun hotu-hotu hakmaan-an hodi ko’alia ba malu no ko’alia ho respeitu ba dignidade ema seluk nian.

Dezenvolvimentu, harii empregu, prepara joven sira ba futuru ezije katak ita iha ambiente estável atu ita bele implementa polítika estável iha área hotu-hotu.

Hanoin polítiku oinseluk labele hapara dezenvolvimentu nasionál. Ida ne’e ezije kompreensaun ita-hotu nian hodi tanen aas nafatin interese nasionál – interese ita hotu nian.

Ha’u apela ba maluk sira hotu atu hametin pás no estabilidade, ho ha’u-nia fiar tomak ba imi-nia maturidade polítika ne’ebé boot ba nafatin.

Ho dame no estabilidade ita bele rezolve problemas juventude no nasaun nian. Sentidu heransa ne’ebé ita hotu simu husi ita-nia joven sira-nia isin ho raan-fakar iha 12 Novembru 1991 maka ne’e:

Hametin espíritu nasionalista no Unidade Nasionál. Katak hamutuk ita bele hametin liután ita-nia INDEPENDÉNSIA NASIONÁL….UKUN HO RESPEITU BA MALU… UKUN BA ITA HOTU-NIA MORIS-DI’AK… IHA ITA-HOTU NIA RAI DOBEN, TIMOR-LESTE.

Ha’u-nia HAKO’AK BOOT ba Juventude Lorico Asuwa’in tomak no ba sobreviventes 12 de Novembru nian!
Honra no Glória ba sira ne’ebé ita-nia HERÓIS NO MÁRTIRES!
VIVA TIMOR-LESTE!
VIVA JUVENTUDE LORICO ASUWA’IN!
VIVA SOLIDARIEDADE INTERNASIONAL!
VIVA POVU MAUBERE!