MENSAJEN PREZIDENTE-DA-REPUBLIKA FRANCISCO GUTERRES LÚ OLO BA KOMEMORASAUN ANIVERSÁRIU BA DALA 500 REFORMA NIAN

by Mídia PR Posted on

MENSAJEN PREZIDENTE-DA-REPUBLIKA FRANCISCO GUTERRES LÚ OLO BA SARANI SIRA HOSI IGREJA PROTESTANTE NO EVANJÉLIKA IHA TIMOR-LESTE
IHA OKAZIAUN KOMEMORASAUN ANIVERSÁRIU BA DALA 500 REFORMA NIAN

Igreja Hosana, Bebora-Dili, 31 Outubru, 2017

Iha loron ida-ne’e, ne’ebé povu Timor-Leste no iha mundu rai-klaran tomak selebra tinan 500 hafoin inísiu movimentu Reforma Igreja nian, lori povu no Estadu Timor-Leste nia naran ha’u mai haksolok hamutuk ho imi no hato’o ha’u-nia votus ksolok, prosperidade no moris-di’ak ba sarani igreja protestante no evanjélika nian hotu-hotu iha ita-nia rain.

Ha’u hahú hodi agradese konvite ne’ebé ho laran-luak hato’o mai ha’u hosi Reverendu Pastór Igreja Protestante Timor-Leste nian, Lourenço dos Santos, no Igreja Evanjélika Assembleia de Deus nian, Francisco dos Reis, atu mai partisipa iha komemorasaun aniversáriu ba dala 500 hosi movimentu ida ho impaktu boot no signifikadu sosiál no relijiozu ne’ebé kle’an tebes.

Reforma hatudu oinsá valór no prinsípiu sira bele influensia hahalok ema sira-nian. Hahalok étiku – ne’ebé hatuur iha valores no halo tuir lia-loos – hanesan kbiit maka’as ida ne’ebé bele uza hodi serbí sosiedade.

Promotór Reforma sira-nia aspirasaun étika la’ós de’it fó impaktu ne’ebé mak boot tebes ba mundu iha tinan 500 ikus ne’e maibé mós lori mudansa mentalidade.
Movimentu reforma nian hatudu oinsá responsabilidade fiar-na’in ida-idak nian sai hanesan devér ne’ebé mak presiza atu kumpre tuir ita ida-idak nia konxiénsia rasik no iha Maromak nia oin.

Buat ne’e bele dehan mós kona-ba responsabilidade sidadaun ida-idak nian ba sosiedade tomak.
Ohin loron, responsabilidade ema ida-idak nian sai hanesan valór fundamentál ida ne’ebé válidu ba sarani tomak protestante no la’ós protestante sira.

Igreja Protestante no Igreja Evanjélika iha tradisaun ne’ebé abut metin ona iha Timor-Leste. Kontráriu hosi ida-ne’ebé akontese iha tempu hirak liubá no iha istória nasaun nian, ohin Konstituisaun RDTL – nu’udar lei fundamentál ne’ebé ita hotu konkista liuhosi independénsia – hatuur ona kona-ba liberdade relijioza no igualdade sidadaun hotu-hotu nian iha lei nia oin, lahó diskriminasaun.

Respeitu ba ita-nia maluk, domin ba malu no solidariedade ba kbiit-laek sira hanesan valór hirak ne’ebé importante hodi haburas no hametin sosiedade di’ak liu ida iha ita-nia rain.
Ha’u saúda no agradese ba Igreja Protestante no Igreja Evanjélika tanba promove no habelar mós valór sira-ne’e.
Ita agora moris iha tempu ida-ne’ebé nakonu ho instabilidade no inserteza iha nasaun no rejiaun barak liu iha mundu. Felismente katak, kontráriu hosi buat ne’ebé akontese iha nasaun seluk, nasaun independente ida-ne’e no sosiedade Timor-Leste tomak sai hanesan ezemplu pás, estabilidade no toleránsia iha nivel hotu-hotu – polítiku, sosiál no relijiozu.

Timoroan sira-nia kapasidade kooperasaun, toleránsia no amizade nu’udar rikusoin murak nasaun ne’e nian ba armonia sosiál no dezenvolvimentu. Nu’udar Prezidente Repúblika no mós sidadaun, ha’u fó valór boot tebes ka kapasidade relijiaun hotu-hotu nian, inklui sidadaun sira-nian, atu fó liman ba malu hodi serbí no hamutuk harii futuru di’ak liu ida.
Iha loron ida-ne’e, ne’ebé ita selebra aniversáriu movimentu mundiál Reforma Igreja nian ba dala 500, ha’u agradese sarani sira no sosiedade tomak ba imi-nia kontribuisaun ba armonia no pás ne’ebé iha ita-nia rain.

Ha’u hakotu hodi fó parabens ba imi-nia serbisu no agradese imi-nia kontribuisaun ba nasaun nia dezenvolvimentu sosiál no ekonómiku. Ba sarani sira Igreja Protestante no Evanjélika nian ha’u hakarak hato’o votus pás, armonia no prosperidade hodi atinje moris-di’ak ba imi-nia família sira no mós ba ita hotu, no kontribui ba armonia iha sosiedade nia leet.

Dili, 31 Outubru, 2017