Prezidente-da-Repúblika hahú dialogu ho Mari Alkatiri no Taur Matan Ruak

by Mídia PR Posted on

Prezidente-da-Repúblika hahú dialogu ho Mari Alkatiri no Taur Matan Ruak

Palásiu Prezidente Nicolau Lobato, loron-15 fulan Novembru, Prezidente-da-Repúblika Francisco Guterres Lú-Olo, halo diálogu ho líder istóriku sira, Sekretáriu Jerál FRETILIN Mari Alkatiri no Prezidente PLP Taur Matan Ruak hodi buka solusaun ba situasaun polítika ne’ebé agora nasaun enfrenta, hafoin Partidu Opozisaun iha Parlamentu Nasionál rejeita Programa VII Governu Konstitusionál.

Prezidente-da-Repúblika halo enkontru ketak-ketak, ba dahuluk ho Sekretáriu Jerál FRETILIN Mari Alkatiri iha dadersan tuku 9 no daruak ho Prezidente PLP iha tuku 3 lorokraik.

Hafoin remata reuniaun ho Xefe-de-Estadu, Sekretáriu Jerál FRETILIN Mari Alkatiri hateten katak desde uluk nia hakarak promove dialogu entre lidér polítika sira atu bele asegura situasaun polítika iha rai-laran hodi lori dezenvolvimentu ba povu no nasaun ida ne’e. “Ha’u sempre hakarak dialogu uluk kedas, ha’u dehan, dialogu tiha halo koligasaun, halo inkluzasaun, halo insidensia Parlamentar. Balun dehan laloos, mak oras ne’e sai nune’e. Hotu-hotu sei kompriende katak iha faze ida ne’e presiza duni intendementu alargadu”.

Sekretáriu Jerál FRETILIN, hatete tan katak optimista ho dialogu ne’ebé inisia husi Xefe-de-Estadu hodi solusiona tensaun polítika entre lidéres Partidu Polítika balun iha momentu ida ne’e no sei simu desizaun saida de’it mak Prezidente-da-Repúblika desidi tuir Konstituisaun haruka.

Entretantu, Prezidente Partidu PLP Taur Matan Ruak hafoin remata reniuan ho Xefe-de-Estadu hatete ba Jornalista sira:
“Ohin ha’u mai rona preokupasaun no opiniaun Sr. Prezidente nian. Ha’u -nia parte hanesan Prezidente PLP ha’u hatete ba Sr. Prezidente-da-Repúblika katak solusaun ne’e iha rua de’it, ida polítika no ida seluk legál ka Konstitusionál. Iha dalan rua ne’e oinsa? Polítikamente iha komplikasaun tanba evolusaun konsertasaun husi Partidu Oposzsaun la’o maka’as liu tiha ona, segundu ita iha dalan legál ka Konstitusionál tanba ita hare took tempu hira ne’e mai ne’e saida mak sei akontese.”

Taur Matan Ruak hatete situasaun polítika ne’ebé oras ne’e akontese ne’e problema ida ne’ebé ki’ik liu bainhira kompara ho situasaun sira ne’ebé Timor-Lest enfrenta iha tempu passadu, tanba ne’e nia fiar katak sei hetan solusaun ba problema refere.

Enkontru ho Prezidente CNRT Xanana Gusmão, ne’ebé tuir planu sei halo mós iha loron hanesan, sei adia ba loron seluk, tamba Xanana Gusmão sei iha hela rai-liur hodi trata asuntu sira relasionadu ho delimitasaun Fronteira Marítima entre Timor Leste ho Australia.

Prezidente-da-Repúblika sei iha pasiensia nafatin hodi halibur lidér Partidu Polítika sira liuliu lidér istoriku sira hodi buka solusaun ba tensaun polítika ne’e.

Prezidente-da-Repúblika foti inisiativa ne’e nu’udar kontinuasaun husi dialogu sira ne’ebé hahú tiha ona ho líder partidu polítiku sira iha prosesu ba kampaña eleisaun Parlamentár no formasaun Governu hafoin Tribunál Rekursu anunsia rezultadu eleisaun Parlamentár.

Mídia PR