Prezidente-da-Repúblika Sei Konsulta ho Partidu Polítiku no Prezide Reuniaun Dahuluk Konsellu-de-Estadu

by Mídia PR Posted on

Dili, 23 Janeiru 2018

Prezidente-da-Repúblika Ohin Konsulta ho Partidu Polítiku no Prezide Reuniaun Dahuluk Konsellu-de-Estadu

Prezidente-da-Repúblika Francisco Guterres Lú Olo, Tersa-feira, loron-23, sei halo konsulta ho Partidu Polítika sira ho asentu iha Parlamentu Nasionál no iha loron tuir mai, 24 Janeiru, sei konvoka reuniaun dahuluk Konsellu Estadu.

Xefe-de-Estadu sei aproveita sorumutu ho partidu polítika sira hanesan mós reunian Konsellu Estadu, hodi rona opiniaun ikus husi partidu ida-idak no membru sira Konsellu Estadu nian, molok foti desizaun hodi hakotu atuál impase polítika ne’ebé país infrenta.

Prezidente Francisco Guterres Lú Olo, sei ko’alia ho lideransa partidu sira ho oráriu hanesan tuir mai:

PARTIDU ÓRAS
FRETILIN 09.00
CNRT 10.00
PLP 11.00
PD 15.00
KHUNTO 16.00

Iha Kuarta-feira, loron-24, óras: 09:00 OTL, Prezidente-da-Repúblika sei hasoru malu ho membru Konsellu Estadu, ne’ebé ba periodu 2017 – 2022, kompostu aleinde atuál Xefe-de-Estadu, eis Prezidente-da-Repúblika sira, atuál Prezidente Parlamentu Nasionál, atuál Primeiru Ministru, hola mós parte membru sira ne’ebé Parlamentu Nasionál mak hili hanesan: José Marcelino Cabral Belo, Aurora Ximenes, Virgílio da Costa Hornai, Virgílio Smith, José dos Santos “Naimori Bukar” no membru sira ne’ebé nomeia husi atuál Prezidente-da-Repúblika mak hanesan: Oscar Lima, Faustinho Godinho Gonçalves da Costa, Alcino de Araújo Barris, Mari Dadi Soares Magno no Laura Soares Abrantes.

Molok ne’e, desde fulan Outobru 2017, Prezidente-da-Repúblika Francisco Guterres Lú Olo hala’o tiha ona dialogu ho entidade oioin hanesan konfisoen relijioza sira, reprezentante veteranu, reprezentante organizasaun juventude rezisténsia, organizasaun sosiedade sivil, organizasaun estudantil hodi rona sira-nia opiniaun atu bele foti desizaun hodi hakotu impase polítika ne’ebé mosu hafoin formasaun VII Governu Konstitusionál.

ROHAN

Para mais informações, contacte:

SERVIÇO DE COMUNICAÇÃO SOCIAL DA PRESIDÊNCIA DA REPÚBLICA DEMOCRÁTICA DE TIMOR-LESTE

Contactos: Telemóvel:(+670) 77746223/ 77304491

E-mail: nelson.quintao@presidenciarepublica.tl/nuno.rodrigues@presidenciarepublica.tl