KONSELLU ESTADU FIAR PREZIDENTE-da-REPÚBLIKA SEI FOTI SOLUSAUN DI’AK

by Mídia PR Posted on

KOMUNIKADU IMPRENSA-

Membru Konsellu Estadu iha nia reuniaun dahuluk fiar Prezidente-da-Repúblika, Francisco Guterres Lú Olo sei foti solusaun di’ak ba situasaun polítika atuál iha rai-laran, ne’ebé akontese hafoin formasaun VII Governu Konstitusionál.

Molok ezerse nia funsaun, membru Konsellu Estadu halo juramentu ba posse.

Membru Konsellu Estadu ne’ebé partisipa iha reuniaun dahuluk ne’ebé Prezidente-da-Repúblika preside mak: atuál Xefe-de-Estadu Francisco Guterres Lú Olo, eis Prezidente-da-Repúblika Taur Matan Ruak, atuál Prezidente Parlamentu Nasionál Aniceto Guterres, atuál Primeiru Ministru Mari Alkatiri no José Marcelino Cabral Belo, Aurora Ximenes, Virgílio da Costa Hornai, Virgílio Smith, José dos Santos “Naimori Bukar” ne’ebé Parlamentu Nasionál mak hili, Oscar Lima, Faustinho Godinho Gonçalves da Costa, Alcino de Araújo Barris, Maria Dadi Soares Magno no Laura Soares Abrantes ne’ebé nomeia husi atuál Prezidente-da-Repúblika.

Konsellu Estadu nu’udar orgaun konsulta polítika ba Prezidente-da-Repúblika, iha kazu ne’e, relasiona ho situasaun polítika atuál ne’ebé nasaun enfrenta.

Tuir Konstituisaun RDTL, Prezidente-da-Repúblika sei foti desizaun hafoin rona opiniaun husi Konsellu Estadu.

Prezidente-da-Repúblika rasik desde fulan-Outobru 2017 halo tiha ona diálogu ho entidade oioin husi konfisaun relijioza sira, organizasaun sosiedade sivil, veteranu, organizasaun feto, defisiente, setór privadu no universitária hodi rona opiniaun sira relasiona situasaun polítika atuál.

Eis Prezidente-da-Repúblika na’in-rua Xanana Gusmão no Ramos Horta la tuir iha reuniaun ne’e tanba hala’o atividade estadu nian iha tasi-balun.

Palásiu Prezidente Nicolau Lobato, Bairru Pite, Díli, loron-24 fulan-Janeiru.

Mídia PR